Read luo Joshua 17 Bible Online

Joshua 17 - luo bible

Joshua 17

¹Nopog ni jo-Manase dir piny nikech Manase ne e wuod Josef maduong’. Makir wuon Gilead nomi piny Bashan gi piny Gilead nikech ne en wuod Manase maduong’.

²Dhout jo-Manase modong’ ma gin joka Abiezer gi joka Helek gi joka Asriel gi joka Shekem gi joka Hefer kod joka Shemida, bende nopognigi piny. Mago ne gin dhout nyikwa Manase wuod Josef.

³Zelofehad wuod Hefer, ma wuod Gilead, ma wuod Makir, ma wuod Manase, nonywolo mana nyiri lilo, ma nyinggi Mala gi Noa gi Hogla gi Milka kod Tirza.

⁴ Ne gibiro ir Eleazar jadolo gi Joshua wuod Nun kod jotend Israel mi giwachonigi niya, “Ruoth Nyasaye nochiko Musa mondo opognwa piny mana kaka opog ni jowetewa.” Kuom mano Joshua nopogonigi piny kaka nopog ni owete wuon-gi, kaluwore gi chik Ruoth Nyasaye.

⁵Jo Manase noyudo pok apar, ka ok okwan piny Gilead gi piny Bashan man yo wuok chieng’ mar aora Jordan,

⁶nikech nopog piny ni nyikwa Manase manyiri kaachiel gi nyikwaye ma yawuowi. Piny Gilead nobedo pok mar nyikwa Manase modong’.

⁷Tong’ piny jo-Manase nochakore e piny Asher mochopo nyaka Mikmethath man yo wuok chieng’ mar Shekem. Eka tong’gi nochomo yo milambo nyaka Jashub, kokadho but En-tapua.

⁸Piny Tapua nobedo mar jo-Manase, to dala Tapua hie, mane nie mbapgi, nobedo mar jo-Efraim.

⁹Koa kuno, tong’gi noluwo aora Kana, to mier man yo milambo mar aorano ne mag Efraim, kata obedo ni gin e dier miech jo-Manase kamano. Tong’ Manase noluwo geng aora Kana gi yo nyandwat, mogik e Nam Mediterenia.

¹⁰Piny Efraim ne ni yo milambo mar aorano, to piny Manase ne ni yo nyandwat, ka Nam Mediterenia obedo tong’gi giduto. Jo-Manase nokiewo kod jo-Asher gi yo nyandwat, kendo kod jo-Isakar gi yo milambo.

¹¹Bethshean kaachiel gi mier mokiewo kode gi joma nodak Ibleam gi Dor manie dhonam, gi En-dor gi Taanak kod Megido, kaachiel gi mier matindo ma nokiewo kodgi ne nie bwo jo-Manase, kata obedo ni ne gin e pinje mag jo-Isakar gi jo-Asher kamano.

¹² Jo-Kanaan pod weg pinyno nyaka chil kawuono, nikechh jo-Manase ne ok nyal riembogi.

¹³To kane jo-Israel osebedo motegno, ne gichuno jo-Kanaan mondo obed wasumbgi.

¹⁴Joka Josef nopenjo Joshua niya, “Ere gima omiyo isemiyowa mana pok achiel kende e pinyni? Wasenya ahinya, nikech Ruoth Nyasaye oseguedhowa.”

¹⁵Joshua nodwokogi niya, “Kusenya kamano, kendo uhingo piny gode mag Efraim, to koro dhiuru e bungu manie piny jo-Perizi gi jo-Refaim, mondo ubete obed lopu.”

¹⁶To joka Josef nowachone niya, “Adier piny godeno ok oromowa, to bende jo-Kanaan modak Beth-sheam gi mier mokiewo kode kaachiel gi mago modak e paw Jezreel, nigi geche lweny mag nyinyo!”

¹⁷Joshua nowacho ni jo-Efraim gi jo-Manase ma nyikwa Josef niya, “Un ji mang’eny, kendo man gi nyalo. Ok unubed gi pok achiel kende,

¹⁸to piny gode bende nobed maru. “Kata otimo bungu kamano, to kaweuru, kendo ubete nyaka uchop e tong’. Adier, jo-Kanaan ni gi geche lweny mag nyinyo, to pod unuriembgi ariemba.”