Read luo Joshua 18 Bible Online

Joshua 18 - luo bible

Joshua 18

¹Ka ne jo-Israel osekawo pinyno, ne gichokore Shilo giduto, mi giguro Hemb Romo kuro.

²To dhout Israel abiriyo ne pok okawo lowo,

³omiyo Joshua nowacho ni jo-Israel niya, “Ang’o murito momiyo pok ukawo piny ma Ruoth Nyasaye ma Nyasach kwereu osemiyou?

⁴Dhoot ka dhoot mondo omiya ji adek ma anyalo oro mondo odhi onon kaka dipog pinyno duto e migepe abiriyo, ka gindiko kaka migawo ka migawo chalo. Ka gisetieko, eka giduog ira

⁵mondo opog pinyno ni dhoudi abiriyogo. To jo-Juda to nobed abeda e pinygi man yo milambo, kendo joka Josef bende nobed e pinygi man yo nyandwat.

⁶Kusepogo piny nyadibiriyo kamano, kendo usendiko kaka ochalo, eka ukelna ndiko manyiso migepego, kendo nopognugi gi ombulu e nyim Ruoth Nyasaye.

⁷To jo-Lawi ok noyud lowo kaka uyudo, nimar pokgi en bedo jodolo mag Ruoth Nyasaye, kendo jo-Gad gi jo-Reuben gi jo-Manase konchiel bende ok nopognigi nikech giseyudo lopgi loka Jordan mane Musa jatich Ruoth Nyasaye omiyogi.”

⁸Joma noyiergo nodhi, mowuotho e pinyno duto ka ginono kaka ochalo, nikech Joshua nosechikogi niya, “Dhiuru uwuoth e pinyno duto, kendo undik kaka ochalo; eka uduog ira Shilo ka. Bang’e napognu piny gi ombulu e nyim Ruoth Nyasaye.”

⁹Kuom mano jogo nodhi monono pinyno duto, kendo ne gindiko e kitabu kaka ochalo. Ne gipogo piny nyadibiriyo, ka gichano nying mier duto mane ni kuno. Bang’e ne giduogo ir Joshua e kambi Shilo,

¹⁰kendo Joshua nogoyonigi ombulu e nyim Ruoth Nyasaye, mopogo ni dhoot ka dhoot lope.

¹¹Ombulu mokwongo nolwar kuom dhout Benjamin, mi giyudo lowo e kind jo-Juda gi joka Josef.

¹²To malo yo nyandwat tong’gi nochakore e aora Jordan modhi nyaka gode man yo nyandwat mar Jeriko. Noluwo piny godego, kochomo yo podho chieng’ nyaka e thim machiegni gi Beth-aven.

¹³Eka nochomo Luz yo milambo nyaka god Luz ma tinde iluongo ni Bethel. Bang’e nodhi nyaka Ataroth-adar e got man yo milambo mar Beth-horon mamwalo.

¹⁴Nogomo koa yo podho chieng’ mar godno, mochomo yo milambo mar got man but Beth-horon, mogik Kiriath-baal, dala jo-Juda, miluongo bende ni Kiriath-jearim. Mano e tong’gi ma yo podho chieng’.

¹⁵Tong’gi ma yo milambo nochakore Kiriath-jearim, kochomo yo podho chieng’ nyaka soko mar Neftoa.

¹⁶Eka nodhi nyaka bath got mochomore gi holo Ben-hinom man yo nyandwat mar holo Refaim. Noluwo holo Hinon tir kochomo yo milambo mar god jo-Jebus nyaka En-rogel.

¹⁷Bang’e nogomo kochomo yo nyandwat nyaka Enshemesh, kendo nyaka Geliloth momanyore gi yo maidho Adumin. Eka nolor nyaka Lwanda Bohan wuod Reuben,

¹⁸mokadho yo nyandwat mar Beth-araba kendo noridore nyaka holo mar aora Jordan.

¹⁹Bang’e nodhi yo nyandwat mar got Beth-hogla, mogik yo nyandwat mar Nam Kado e dho aora Jordan gi yo milambo. Mano ne tong’gi ma yo milambo.

²⁰To tong’gi ma yo wuok chieng’ ne en aora Jordan. Mano ne tong’ piny ma nopog ni dhout Benjamin.

²¹Miech jo-Benjamin, kaluwore gi dhoutgi, ne gin Jeriko, gi Beth-hogla, gi Emek-keziz,

²²gi Beth-araba, gi Zemaraim, gi Bethel,

²³gi Avim, gi Para, gi Ofra

²⁴gi Kefar-amoni, gi Ofni, kod Geba. Giduto ne gin mier apar gariyo, ka ok okwan mier matindo mane okiewo kodgi,

²⁵to bende ne gin gi Gibeon, gi Rama, gi Beeroth,

²⁶gi Mizpe, gi Kefira, gi Moza,

²⁷gi Rekem, gi Irpeel, gi Parala

²⁸gi Zela, gi Ha-elef gi Jebuz (ma tinde iluongo ni Jerusalem,) gi Gibea, kod Kiriath-jearim. Giduto ne gin mier apar gang’wen ka ok okwan mier matindo mane okiewo kodgi. Mago e mier mane opog ni dhout Benjamin.