Read luo Joshua 19 Bible Online

Joshua 19 - luo bible

Joshua 19

¹Ombulu mar ariyo nolwar kuom dhout Simeon. Pinygi ne nie dier piny jo-Juda.

² Noting’o Beer-sheba gi Molada

³gi Hazar-shual gi Bala gi Ezem

⁴gi Eltolad gi Bethul gi Horma

⁵gi Ziklag gi Beth-mar-kaboth gi Hazar-susa

⁶gi Beth-lebaoth kod Sharuhen. Giduto ne gin mier apar gadek, ka ok okwan mier matindo ma nokiewo kodgi.

⁷Bende ne giyudo Ain gi mier Rimon gi Ether kod Ashan, duto mier ang’wen, ka ok okwan mier matindo ma okiewo kodgi,

⁸nyaka Baalath-beer miluongo bende ni Ramath-negeb. Pinyno ema nopog ni dhout Simeon,

⁹to pinyno ne en dir piny jo-Juda, nikech jo-Juda nomi piny malach mohingogi.

¹⁰Ombulu mar adek nolwar kuom dhout Zebulun. Piny mane opognigi nochopo nyaka Shadub.

¹¹Koa kuno tong’gi mochiko yo podho chieng’ nodhi nyaka Marala, moluwo bath Debesheth kod Apra man yo wuok chieng’ mar Jokneam.

¹²To tong’gi moa Shedub kochomo yo wuok chieng’, nochiko tong’ Kisloth-tabor modhi Daberath kod Jafia.

¹³Nomedo dhi yo wuok chieng’, mochopo Geth-hefer kod Ita-kazin nyaka Rimon, mogomo kochiko Nea.

¹⁴Tong’ ma yo nyandwat nolworo nyaka Hanathon mogik e holo Jethael.

¹⁵Pinyno noting’ Katath gi Nahalal gi Shimron gi Idala kod Bethlehem. Giduto ne gin mier apar gariyo ka ok okwan mier matindo ma nokiewo kodgi.

¹⁶Miegi kaachiel gi mier matindo ma nokiewo kodgi ema nopog ni dhout Zebulun.

¹⁷Ombulu mar ang’wen nolwar kuom dhout Isakar.

¹⁸Jezreel gi Kesiloth gi Shunem

¹⁹gi Hafaraim gi Shion gi Anaharath

²⁰gi Rabith gi Kishion gi Ebez,

²¹gi Remeth gi En-ganim gi En-haga kod Beth-pazez ne nie pinygi.

²²Tong’gi nokadho but Tabor gi Shahazuma kod Beth-shemesh mogik e aora Jordan. Giduto ne gin mier apar gauchiel, ka ok okwan mier matindo ma nokiewo kodgi.

²³Miego duto, kaachiel gi mier matindo ma nokiewo kodhi ema nopog ni dhout Isakar.

²⁴Ombulu mar abich nolwar kuom dhout Asher.

²⁵Pinygi noting’o Helkath gi Hali gi Beten gi Akshaf

²⁶gi Alamelek gi Amad kod Mishal. Yo podho chieng’ tong’gi noluwo Karmel gi Shihor-libnath.

²⁷Eka nochiko yo wuok chieng’ modhi Beth-lagon, koluwo bath piny Zebulun kod holo Jiftael, kochomo yo nyandwat nyaka Beth-emek gi Neyel. Yo nyandwat, pinyno noting’o Kabul

²⁸gi Abdon gi Rehob gi Hamon kod Kana, mochopo Sidon Maduong’.

²⁹Eka tong’ nogomo mochomo Rama, nyaka Turo dala mochiel, kuma nogomoe kochiko Hosa, mogik e Nam Mediterenia. Yo podho chieng’ noting’o Mehalab gi Akzib

³⁰gi Ako gi Afek kod Rehob. Giduto ne gin mier piero ariyo gariyo ka ok okwan mier matindo mane okiewo kodgi.

³¹Miego duto kaachiel gi mier matindo ma nokiewo kodgi ema nopog ni dhout Asher.

³²Ombulu mar auchiel nolwar kuom dhout Naftali.

³³Pinygi nochakore Helef kendo e yath maduong’ man Zaananim moluwo Adami-negeb gi Gabneel nyaka Lakum, mogik e aora Jordan.

³⁴Tong’gi ma yo podho chieng’ noluwo Azmoth-tabor nyaka Hukoth. Piny jo-Zebulun ne ni yo milambo, kendo piny jo-Asher ne ni yo podho chieng’, to aora Jordan nobedo tong’ ma yo wuok chieng’.

³⁵Miechgi mane ochiel gi ohinga ne gin Zidim gi Zer gi Hamath gi Rakath gi Kinereth

³⁶gi Adama gi Rama gi Hazor

³⁷gi Kedesh gi Edrei gi En-hazor

³⁸gi Yiron gi Migdalel gi Horem gi Beth-anath kod Beth-shemesh. Giduto ne gin mier apar gochiko, ka ok okwan mier matindo mane okiewo kodgi.

³⁹Miego duto kaachiel gi mier matindo mane okiewo kodgi ema ne opog ni dhout Naftali.

⁴⁰Ombulu mar abiriyo nolwar kuom dhout Dan.

⁴¹Pinygi noting’o Zora gi Eshtaol gi Ir-shemesh

⁴²gi Shaalabin gi Aijalon gi Ithla

⁴³gi Elon gi Timna gi Ekron

⁴⁴gi Elteke gi Gibethon gi Baalath

⁴⁵gi Jehud gi Bene-berak gi Gath-rimon

⁴⁶gi Mejarkon kod Rakon, kaachiel gi piny momanyore gi Jopa.

⁴⁷ Kane oriemb jo-Dan e pinygi, ne gidhi nyaka Leshem, mi gimonjo dalano. Ne gikawe, kendo ne ginego ji duto ma nodakie. Ne gidak kuno, mi giloko nyinge ni Dan, nying kwargi.

⁴⁸Miego duto, kaachiel gi mier matindo ma nokiewo kodgi ema nopog ni dhout Dan.

⁴⁹Kane jo-Israel osetieko pogo piny, kendo guro mbapgi, ne gimiyo Joshua lowo e pinygi,

⁵⁰kaka Ruoth Nyasaye nosechiko. Ne gimiye Timna-sera e piny gode mag Efraim, nikech mano ema nokwayo. Nochako ogero dalano, modakie.

⁵¹Mano e kaka Eleazar jadolo, gi Joshua wuod Nun, kod jodong dhout Israel, nopogo lowo gi ombulu e nyim Ruoth Nyasaye e dho Hemb Romo, ka ne gin Shilo. Kamano ne gitieko pogo piny.