Read luo Joshua 20 Bible Online

Joshua 20 - luo bible

Joshua 20

¹ Ruoth Nyasaye nochiko Joshua

²ni mondo owach ni jo-Israel kama: “Koro yieruru miechu mag tony mane awacho ni Musa mondo onyisu.

³Ng’at moneko kobothne nyalo dhi kuondego mondo opond ni ng’at madwaro chulone kuor.

⁴Ka ng’ato dwaro tony kamano, moringo nyaka e achiel kuom miego, to nochung’ e dhorangach, kendo nonyis jodong dalano gima osetimorene. Eka giniyiene odonji, kendo ginimiye kar dak.

⁵Ka ng’ato madwaro chulo kuorno oluwe nyaka kuno, to jodalano kik chiwe, to girite, nikech nonego nyawadgi mana kuom both, to ok nikech ne gimonre.

⁶Janekno nodag e dalano nyaka chop yale e nyim oganda, kendo ka jadolo maduong’ e kindeno osetho, eka onyalo dok dalagi, kuma noseringo oaye.”

⁷Kuom mano ne giyiero Kadesh-galili manie piny gode mag Naftali, gi Shekem manie piny gode man Efraim kod Kiriath-arba, miluongo bende ni Hebron, manie piny gode mag Juda.

⁸To yo wuok chieng’ mar aora Jordan, e piny mamalo momanyore gi Jeriko, ne giyiero Bezer-me-thim kuom piny jo-Reuben, gi Ramoth-gilead kuom piny jo-Gad, kod Galon-bashan kuom piny jo-Manase.

⁹Mago ne gin mier mane ng’at moneko nyalo tonyie. Ne oketgi ne jo-Israel duto, kendo ni jodak mane ni kodgi. Ng’ato ang’ata mane oneko kobothne, ne nyalo ringo kuno, mondo ng’at ma dwaro chulone kuor kik nege, kapok oyale e nyim oganda.