Read luo Joshua 21 Bible Online

Joshua 21 - luo bible

Joshua 21

¹Jodong dhout jo-Lawi nodhi Shilo e piny Kanaan, mowacho ni Eleazar jadolo gi Joshua wuod Nun, kod jodong dhout Israel niya,

² “Ruoth Nyasaye nochiko Musa ni mondo wayud mier mag dak kaachiel gi lege jamni mokiewo kodgi.”

³Kuom mano jo-Israel nomiyo jo-Lawi miechgi gi lege mokiewo kodgi mana e pinygi giwegi, kaluwore gi chik Ruoth Nyasaye.

⁴Joka Kohath ema nokwong pognigi mier gi ombulu. Jo-Lawi ma nyikwa Harun jadolo noyudo mier apar gadek e piny jo-Juda gi piny jo-Simeon kod piny jo-Benjamin.

⁵To joka Kohath modong’ nomi mier apar e piny jo-Efraim gi jo-Dan, kendo e piny jo-Manase konchiel.

⁶Joka Gershom nomi mier apar gadek e piny jo-Isakar gi piny jo-Asher kod piny jo-Naftali kendo e piny jo-Manase komachielo ma nodak bashan.

⁷Joka Merari to nomi mier apar gariyo e piny jo-Reuben gi piny jo-Gad kod piny jo-Zebulun.

⁸Kamano jo-Israel nopogo ni jo-Lawi miego gi ombulu, kaluwore gi chik mane Ruoth Nyasaye omiyo Musa.

⁹Ombulu mokwongo nolwar kuom jo-Lawi ma nyikwa Harun mane gin dhoot achiel kuom joka Kohath. Mier mane opognigi kuom piny jo-Juda gi mar jo-Simeon ne gin

¹¹Kiriath-arba, miluongo bende ni Hebron, e piny gode mag Juda, kaachiel gi lege ma nokiewo kode. (Arbano ne kwar jo-Anak.)

¹²To mier matindo ma nokiewo gi dalano, kaachiel gi gweng’ momanyore kode, nosemi Kaleb wuod Jefune.

¹³Mier mane opog ni nyikwa Harun jadolo e magi: Hebron, (ma achiel kuom mier ma ng’at moneko nyalo tonyie,) gi Libna

¹⁴gi Jatir gi Eshtemoa

¹⁵gi Holon gi Debir

¹⁶gi Ashan gi Juta kod Beth-shemesh. Ne gin mier ochiko ma nopog ni dhoudi ariyogo.

¹⁷To e piny jo-Benjamin nomigi mier ang’wen mane gin Gibeon gi Geba

¹⁸gi Anathoth kod Almon.

¹⁹Kamano jodolo ma nyikwa Harun noyudo mier apar gadek, kaachiel gi legegi.

²⁰Kane ogo ombulu, jo-Lawi ma jodhout Kohath modong’ nopognigi mier ang’wen kaachiel gi legegi e piny Efraim.

²¹Ne gin Shekem, (ma dala ma ng’ato moneko nyalo tonyie,) e piny gode mag Efraim, gi Gezer

²²Kibzaim kod Beth-horon.

²³Nopognigi bende mier ang’wen e piny jo-Dan. Ne gin Elteke gi Gibethon

²⁴gi Aijalon kod Gath-rimon.

²⁵To e piny jo-Manase konchiel nomigie Taanak kod Ibleam.

²⁶Kamano dhout Kohath modong’go noyudo mier apar, kaachiel gi legegi.

²⁷Nyikwa Gershom, ma achiel kuom dhout jo-Lawi, bende nomi mier kaachiel gi legegi. E piny jo-Manase komachielo ne giyudoe mier ariyo, mane gin Galon-gashan, (dala ma ng’at moneko nyalo tonyie,) kod Be-astaroth.

²⁸To e piny jo-Isakar ne giyudoe mier ang’wen mane gin Kishion gi Daberath

²⁹gi Jarmuth kod En-gamuth.

³⁰E piny jo-Asher bende nomigie mier ang’wen, mane gin Mishal gi Abdon

³¹gi Helkath kod Rehob.

³²E piny jo-Naftali to ne giyudoe Kedesh-galili, (dala ma ng’at moneko nyalo tonyie,) gi Hamothdor gi Kartan, duto mier adek.

³³Kamano dhout jo-Gershom koriwore noyudo mier apar gadek kaachiel gi legegi.

³⁴Koro magi e mier kaachiel gi legegi mane opogni jo-Lawi ma jodhout Merari modong’. E piny jo-Zebulun ne giyudoe mier ang’wen mane gin Joklean gi Karta

³⁵gi Dimna kod Nahalal.

³⁶To yo wuok chieng’ mar aora Jordan, e piny jo-Reuben momanyore gi Jeriko ne giyudoe mier ang’wen mane gin Bezer-me-thim, (dala ma ng’at moneko nyalo tonyie,) gi Jahaz

³⁷gi Kedemor kod Meraath.

³⁸To e piny jo-Gad ne giyudoe mier ang’wen, mane gin Ramoth-gilead, (ma bende dala ma ng’at moneko nyalo tonyie,) gi Mahanaim

³⁹gi Heshbon kod Jazer.

⁴⁰Kamano jo-Lawi ma jodhout Merari modong’go noyudo mier apar gang’wen, kaachiel gi legegi.

⁴¹Kuom mano, mier duto mane jo-Lawi oyudo e piny Israel, noromo piero ang’wen gaboro.

⁴²Dala ka dala ne nigi lege mokiewo kode.

⁴³Kamano Ruoth Nyasaye nomiyo jo-Israel piny duto mane osesingore ni kweregi ni nomigi. Ne gikawe, mi gidak kuno.

⁴⁴Ruoth Nyasaye nomiyogi kue e tong’gi duto kaka nosesingore ni kweregi. Onge wasikgi kata achiel mane nyalo sirogi, nikech Ruoth Nyaaye ema nomiyo giloyogi duto.

⁴⁵Ruoth Nyasaye nochopoi singruokne duto ma nosetimo ni jo-Israel.