Read luo Joshua 23 Bible Online

Joshua 23 - luo bible

Joshua 23

¹Ruoth Nyasaye nomiyo jo-Israel kue e kindgi gi wasigu ma nolworogi kuom ndalo mang’eny nyaka koro Joshua nodoko moti.

²Eka Joshua noluongo jodongo gi jong’ad bura kod jotelo duto mag Israel, mowachonigi niya, “Koro aseti ahinya,

³to useneno gik moko duto ma Ruoth Nyasaye ma Nyasachu osetimo ni ogendini duto, nikech oherou. En ema osebedo kokedonu.

⁴Omiyo winjuru! Asepogo ni dhoutu piny ogendini ma aseriembo kaachiel gi piny jogo ma pod odong’, chakre aora Jordan yo wuok chieng’, nyaka Nam Maditerenia man yo podho chieng’.

⁵Ruoth Nyasaye ma Nyasachu noriembnugi, mi unukaw pinygi kakaa osesingorenu.

⁶Omiyo timuru chir mondo uluw chike duto mondik e Kitap Chik mar Musa, mak ubaro korachwich kata koracham.

⁷Kik utim osiep gi joma odong’ e kindugo, bende kik uluong nying nyisechegi kata kuong’oru gi nyinggi, kata lamogi.

⁸To padreuru kuom Ruoth Nyasaye gi chuny modimbore, mana kaka usetimo nyaka chil kawuono.

⁹Ruoth Nyasaye oseriembonu ogendini madongo kendo marateke, ma onge kata achiel kuomgi mane nyalo sirou.

¹⁰ Ng’at achiel kuomu nyalo riembo ji gana achiel, nikech Ruoth Nyasaye ma Nyasachu ema kedonu kaka nosingore.

¹¹Omiyo neuru ni uhero Ruoth Nyasaye ma Nyasachu,

¹²nikech ka udok chien, mutimo osiep kod ogendini ma pod odong’ e kindu, kendo ukendoru kodgi,

¹³to Ruoth Nyasaye ma Nyasachu ok noriembnugi kendo. Ginibednu mana kaka obadho mochiknu, kata bur mokunynu, kendo ginibednu malit ka del michwadogo otengau, kata ka kuthe ma tucho wengeu. Mano notimrenu nyaka uduto karu lal chuth e piny maber ma Ruoth Nyasaye osemiyouni.

¹⁴“An koro achiegni tho. To ng’ato ka ng’ato kuomu ong’eyo e chunye ni Ruoth Nyasaye ma Nyasachu osemiyou gik mabeyo duto ma nosingorenu. Onge kata achiel kuom gik moko duto ma nosingore ma pok otimo.

¹⁵Adier, Ruoth Nyasaye ma Nyasachu osetimonu gik moko duto mabeyo ma nowacho ni notimnu.

¹⁶To ka ok urito singruok ma nomiyou, mi ulamo nyiseche mamoko, to enokech kodu, mi karu nolal nono piyopiyo e piny maber mosemiyouni.”