Read luo Joshua 3 Bible Online

Joshua 3 - luo bible

Joshua 3

¹Gokinyi mang’ich, Joshua kod jo-Israel duto nowuok Shitim, mi gidhi aora Jordan. Ne gibworo kanyo ka pok ging’ado aora.

²Bang’ ndalo adek jotelo nowuotho e kambi duto,

³ka ginyiso ji niya, “Kuneno ka jo-Lawi ma jodolo otelo e nyimu koting’o Sandug Muma mar Ruoth Nyasachu, eka un bende unuchak wuoth kuluwo Sanduk.

⁴Kuluwe kamano, eka unung’e yo monego uluw, nimar yandi pok ubiro koni. To kik usud machiegni kode; weuru thuolo ma dirom ondamo alufu achiel.”

⁵Joshua nowacho ni ji niya, “Puodhreuru nikech kiny Ruoth Nyasaye notimnu hono maduong’.”

⁶Eka nowacho ni jodolo niya, “Ting’uru Sandug Muma, kendo utel ni ji.” Mi ne gitimo kamano.

⁷Ruoth Nyasaye nowacho ni Joshua niya, “Tinendeni abiro chako miyi bedo gi duong’ e nyim jo-Israel duto kendo gining’e ni abedo kodi mana kaka nabedo gi Musa.

⁸Omiyo nyis jodolo moting’o Sandug Muma, ni, ka gichopo e aora Jordan, to mondo gichung’ e pi.”

⁹Joshua nowacho ni jo-Israel niya, “Biuru ka mondo uwinj gima Ruoth Nyasaye ma Nyasachu owacho.

¹⁰Tinende unuyud ranyisi ni Nyasaye mangima ni kodu, kendo nodarnu jo-Kanaan gi jo-Hiti gi jo-Hivi gi jo-Perizi gi jo-Girgash gi jo-Amor kod jo-Jebus.

¹¹Sandug Muma mar Ruoth Nyasaye ma Ruodh piny ngima notelnu kung’ado aora Jordan,

¹²kendo ka jodolo moting’e nonyon pi Jordan, to aora nowe mol, mi pi moa malo nogudre kogingore ka pith. Koro yieruru ji apar gariyo kuom dhout Istrael, kugolo ng’at achiel e dhoot ka dhoot.”

¹⁴Omiyo ji nowuok e kambi mondo ong’ad aora Jordan, ka jodolo otelonigi koting’o Sandug Muma. Ne en ndalo keyo, kinde mane aora pong’ie mao.

¹⁵Kane jodolo ochopo e dho aora, mi giketo tiendegi e pi,

¹⁶gikanyono pi nochung’ gi yo ka malo, kogingore machiegni gi Adam, dala man but Zarethan. Pi mane mol kochomo nam mar Araba, miluongo ni Nam Kado, noduono chuth, mi jo-Israel nong’ado aora kama omanyore gi Jeriko.

¹⁷Jodolo ma noting’o Sandug Muma mar Ruoth Nyasaye nochung’ e lowo motwo e dier Jordan nyaka jo-Israel duto notieko kadho, ka giwuotho e lowo motwo.