Read luo Joshua 5 Bible Online

Joshua 5 - luo bible

Joshua 5

¹Ruodhi duto mag jo-Amor ma nodak yo podho chieng’, kod jo-Kanaan ma nodak mokiewo gi Nam Mediterenia nowinjo ni Ruoth Nyasaye osemiyo aora Jordan oduono ka jo-Israel kadho. Omiyo kihondko nomakogi, mi gidoko maluor, kendo chunygi noa nikech jo-Israel.

²E ndalogo, Ruoth Nyasaye nowacho ni Joshua niya, “Los miriye mag kite, mondo ochak oter jo-Israel nyangu kendo.”

³Omiyo Joshua noloso miriye, motero ji nyangu e Gibeathhaaraloth.

⁴ Notimo kamano nikech ji duto ma nosebedo madongo moromo kedo e kinde mane gia Misri nosetho e thim kane pod gin e yo.

⁵To kata obedo ni joma chwo duto ma noa Misri noseter nyangu, ji duto ma nonywol e kinde mane ging’ado thim ne pok oter nyangu.

⁶Jo-Israel nosewuotho e thim kuom higni piero ang’wen, kendo joma dongo duto mane oa Misri koseromo kedo nosetho, nikech ne ok girito chik Ruoth Nyasaye. Ruoth Nyasaye noramo ni ok nowe gine piny momew kendo man gi mwandu mane osesingore ni kwerewa ni nomiwa.

⁷To yawuotgi ma nodongo bang’gi ne ok oter nyangu kane giwuotho e thim. Omiyo gin ema Joshua noterogi nyangu.

⁸Kane osetergi nyangu, ji duto nobet e kambi nyaka ne gichango.

⁹Eka Ruoth Nyasaye nowacho ni Musa niya, “Tinendeni asegolo ayanj jo-Misri oko kuomu.” Mano emomiyo nochak kanyo ni Gilgal, kendo pod iluonge kamano nyaka chil kawuono.

¹⁰ Kane jo-Israel obworo Gilgal e paw Jeriko, ne gitimo Pasaka godhiambo due apar gang’wen mar dueno.

¹¹Kinyne ne gichamo chamb Kanaan. Ne en chamb abula, kod makati moted maonge thowi.

¹² Chakre chieng’ mane jo-Israel ochamoe chiemb Kanaanno, chiemb Manna mane oyudo gichamo norumo, mi ne ok giyudo moko kendo. Higano ne gichamo mana chemb Kanaan.

¹³Kane Joshua ochopo machiegni gi Jeriko, noneno ng’at mochung’; e nyime, koting’o ligangla, Joshua nodhi ire, mopenje niya, “In jakorwa, koso jasikiwa?”

¹⁴Ng’atno nodwoke niya, “An ka kaka jaduong’ jolweny mag Ruoth Nyasaye.” Joshua nogoyo chonge piny, mokulore nyaka e lowo, mowacho niya, “Ang’o midwaro mondo atim ruodha?”

¹⁵Jaduong’ jolweny mag Ruoth Nyasaye nodwoke niya, “Lony wuocheni nimar kama ichung’ieno en kama ler.” Mi Joshua notimo kamano.