Read luo Joshua 6 Bible Online

Joshua 6 - luo bible

Joshua 6

¹Ranga Jeriko nolor matek mondo ogeng’ jo-Israel oko, kendo onge ng’ama ne nyalo donjo kata wuok.

²Ruoth Nyasaye nowacho ni Joshua niya, “Asechiwo Jeriko gi ruodhe e lweti.

³Nyaka ilwor dalano gi jogi mag lweny kuom ndalo auchiel, kilwore odiechieng’ kodiechieng’ dichiel.

⁴Jodolo abiriyo nyaka dhi e nyim Sandug Muma, koting’ tunge abiriyo molos gi tunge imbe. To chieng’ mar abiriyo nyaka ilwor dala gi jogi mag lweny nyadibiriyo, ka jodolo goyo tungegi.

⁵Ka giselwore kamano, to mondo gigo tung’ dichiel matek. Gikanyono muwinjoe tung’, to ji duto mondo okog matek. Eka ohinga mar Jeriko nopodh riep, kendo oganda lweny nodonj e dala, ka ng’ato ka ng’ato ochomo nyime tir.”

⁶Omiyo Joshua wuod Nun nolwongo jodolo, mowacho nigi niya, “Ting’uru Sandug Muma mar Ruoth Nyasaye, to ji abiriyo kuomu mondo otel e nyime, koting’o tunge abiriyo molos gi tunge imbe.”

⁷Eka nowacho ni jolweny niya, “Wuothuru mondo ulwor dala Jeriko, ka jolweny moa e dhoudi ariyo gi nus kande otelo gi Sanduk mar Ruoth Nyasaye.”

⁸Kane Joshua osechiko jolweny kamano, jodolo abiriyo moting’o tunge abiriyo e nyim Ruoth Nyasaye nochako wuoth ka goyo tung’, kendo Sandug Muma mar Ruoth Nyasaye ne luwo bang’gi.

⁹Jolwenygo notelo e nyim jodolo mane goyo tung’, to moko ne luwo bang’ Sanduk, kendo e kindeno duto tung’ ne ywak.

¹⁰To Joshua nokwero ji ni kik gikogi, kendo kik gilos nyaka chop chieng’ ma enogol chik, eka ginikog matek.

¹¹Kane Joshua osegolo chik kamano, ne gilworo dala dichiel gi Sanduk mar Ruoth Nyasaye. Eka bang’e ne gidok e kambi mi ginindo kanyo.

¹²Joshua nochiew gokinyi mang’ich, kendo jodolo noting’o Sanduk mar Ruoth Nyasaye.

¹³Jodolo abiriyo moting’o tunge abiriyo notelo e nyim Sanduk mar Ruoth Nyasaye ka goyo tung’. Jolweny moko notelonigi, to moko ne luwo Sanduk, kendo e kindego duto tung’ ne ywak.

¹⁴Kamano ne gilworo dala dichiel chieng’ mar ariyo eka gidok e kambi. Ne gitimo kamano kuom ndalo auchiel.

¹⁵To chieng’ mar abiriyo, ne gichiew ka ugue wang’, mi gilworo dala dibiryo. Chieng’no kende ema ne gilworoe dalani dibiriyo.

¹⁶E sa mane gilworee mar abiriyo jodolo ne goyo tung’. Eka Joshua nowacho ni jolweny niya, “Koro gueuru, nikech Ruoth Nyasaye osemiyou dalani.

¹⁷To joma odakie kaachiel gi gik moko duto manie iye noketh chuth, kendo dhano ok nomulgi, to ginibed gik mochiw ni Ruoth Nyasaye. Rahab gi ji duto manie ode kende ema nowe ka ngima, nikech en ema nopando jombetre mane waoro.

¹⁸To un, beduru motang’ kendo kik ugomb gik mokwer! Kik ukaw kata achiel kuomgi, nikech kutimoo kamano to masira momako jodalano nomak kambi jo-Israel, kendo nokelnigi chandruok.

¹⁹To fedha gi dhahabu duto kod gik moko molos gi mula kod molos gi nyinyo ema nobed gik mochiw ni Ruoth Nyasaye, kendo nyaka tergi e kar keno mare.”

²⁰ Jodolo nogoyo tung’, kendo kane jolweny owinjo, ne gigueyo gi duol maduong’, mi ohinga mar dala nopodho. Eka jolweny duto nodonjo e dala, ka ng’ato ka ng’ato ochomo nyime tir, mi gikawe.

²¹Ne giketho gik moko duto e dalano, bende ne ginego ng’ato ang’ata ma dichwo kata ma dhako, ma rawera kata moti, kod dhok gi romb kod kenje.

²²Joshua nowacho ni jombetre ariyo kande mondo odhi e od Rahab okele kaachiel gi joode, kaka ne gisesingore ni ginitim.

²³Omiyo yawuowigo nodhi, mogolo Rahab gi wuon kod min, gi owetene kod ji duto mane ni kode. Ne gikelogi duto, mi giweyogi e kambi mar jo-Israel gi yo ka oko.

²⁴Eka ne giwang’o dala gi gik moko duto manie iye, mak mana fedha gi dhahabu kod gik molos gi mula kod molos gi nyinyo ema ne gikawo, mi gikano kar keno mar od Ruoth Nyasaye.

²⁵ Kamano Joshua noreso ngima Rahab gi joode kod ji duto mane nii kode, nikech nosepando jombetre ma noor mondo ocheng Jeriko. Nyikwa Rahab pod odak gi jo-Israel nyaka chil kawuono.

²⁶ Chieng’no Joshua nokwero ji gi kuong’ niya, “Ruoth Nyasaye mondo okum ng’at ma notem gero Jeriko kendo! Koketo mise mare, to wuode makayo notho, kendo kochungo dharangaye, to wuode ma chogo notho.”

²⁷Kamano Ruoth Nyasaye ne ni kod Joshua, mi humbe nolak e pinyno duto.