Read luo Joshua 8 Bible Online

Joshua 8 - luo bible

Joshua 8

¹Ruoth Nyasaye nowacho ni Joshua niya, “Kik iluor, kendo kik chunyi nyosre. Kaw jolweny duto, kendo dhi imonj Ai. Anachiw ruodh Ai gi dalane gi joge kod pinye e lweti,

²kendo unutim ni Ai kod ruodhe mana kaka nutimo ni Jeriko kod ruodhe. To wang’ni unyalo kawo dhok kod gik moko muyudo kuno. Koro or jolweny moko mondo odhi opond yo podho chieng’ mar dalano.”

³Omiyo Joshua kod jolweny duto noikore mondo omonj Ai. Noyiero jolweny alufu piero adek, moorogi gotieno, kowachonigi niya,

⁴“Ponduru yo podho chieng’ mar dalano, kubet machiegni kode, kendo kuikore.

⁵An to anamonje gi jolweny modong’, to ka jogo nowuog mondo orad kodwa kaka ne gitimo chieng’ mokwongo, to wanaring e nyimgi.

⁶Kuom mano ginipar ni waringogi kaka ne watimo mokwongo, mi ginilawwa nyaka chop waseywayogi mabor gi dalagi.

⁷Kwaringo kamano, eka uwuogi kama upondoe, kendo ukaw dalagino, nikech Ruoth Nyasaye ma Nyasachu biro chiwe e lwetu,

⁸kendo osechiko ni kusekawe to uwang’e. Koro timuru kamano.”

⁹Eka Joshua noorogi yo podho chieng’ mar Ai, mondo gipond e kind dalano kod Bethel. Joshua nonindo kanyachiel gi jolweny,

¹⁰to gokinyi mang’ich nochiew, mochokogi, kendo ne gidhi Ai, kotelo gi jodong Israel,

¹¹nyaka ne gichopo machiegni gi dalano. Ne gijot yo nyandwat mar Ai, to holo ne ni e kindgi gi dalano.

¹²To Joshua noseoro ji maromo alufu abich yo podho chieng mar Ai mondo opond e kind dalano kod Bethel.

¹³Kamano thoth jolweny nojot yo nyandwat mar Ai, to joma nopondo ne ni yo podho chieng’. Joshua to nonindo e holo.

¹⁴Kane ruodh Ai oneno ni jo-Israel nowuok mapiyo gi joge duto mondo oked kodgi. Ne ok ong’eyo ni jolweny moko osepondone yo podho chieng’ mar dala.

¹⁵Joshua kod jo-Israel nowuondore ni ologi, mi giringo ka gichomo thim.

¹⁶Eka noluong jo-Ai duto mane ni e dala mondo olawgi. To kane gilawo Joshua kamano, ne gichwalora mabor gi dalagi.

¹⁷Onge ng’ato kata achiel ma nodong’ e Ai, nikech ne gisewuok giduto mondo gilaw jo-Israel. Kuom mano ne giweyo dala nono.

¹⁸Eka Ruoth Nyasaye nowacho ni Joshua niya, “Siem yo Ai gi tong’i, nimar abiro chiwe e lweti.” Mi Joshua notimo kamano.

¹⁹Kane jo-Israel mopondo oneno ranyisi ma Joshua otimono, ne giwuok. Ne giringo piyopiyo, mi gidonjo e dala, kendo kane gisekawe, ne giwang’e gi kanyono.

²⁰Kane jo-Ai ogoyo machiemo, ne gineno iro kadum e dala kochomo polo. Onge kuma ne ginyalo tonyie, nikech jo-Israel ma noyudo wuondore ni ringo kochomo thim, nolokore gi joma ne lawogi.

²¹Joshua gi jo-Israel duto nolokore gi jo-Ai nikech ne gineno ka joma nopondo koro osekawo dala, mi owang’o.

²²Jo-Ai mane owuok mondo orad gi jo-Israel koro noket diere, mi jo-Israel nonegogi duto, maonge modong’ kata motony,

²³mak mana ruodh Ai ema ne gimako kangima, mi gitero ir Joshua.

²⁴Kane jo-Israel osenego jo-Ai duto mane ni e pap, kod mane ni e thim kuma ne giselawogie, ne gidok Ai, mi ginego ji duto ma nodong’ kuno.

²⁵Chieng’no noneg jo-Ai duto, ma onge ng’ama dichwo kata madhako ma nodong’. Ne giromo ji alufu apar gariyo.

²⁶Joshua ne ok oweyo siemo Ai gi tong’ nyaka noneg ji duto ma nodak kuno.

²⁷Jo-Israel nokawo mana dhok gi mwandu mane giyudo, kaluwore gi wach mane Ruoth Nyasaye owacho ni Joshua.

²⁸Kamano Joshua nowang’o Ai chuth, moweye kokethore, ma onge ji modakie nyaka chil kawuono.

²⁹Noliero ruodh Ai e yath, moweye kanyo nyaka odhiambo. To ka chieng’ podho, nogolo chik mondo ong’ade oko e yath. Ne giwito ringre e dhoranga dala, mi gidhuro kuome kite mogundho, ma pod ni kanyo nyaka chil kawuono.

³⁰ Joshua nogero kendo-mar-misango ni Ruoth Nyasaye ma Nyasach Israel e got Ebal.

³¹ Nogere gi kite ma ok opa gi gir nyinyo, kaluwore gi chik mane Musa jatich Ruoth Nyasaye omiyo jo-Israel, kaka ondik e kitap Chik mar Musa. Ne gitimo ni Ruoth Nyasaye misengni miwang’o pep kod mag sawo e kendono.

³²Joshua nondiko chik Musa e kitego e nyim jo-Israel.

³³ Mi jo-Israel duto gi joma nobiro kodgi, kaachiel gi jodongo gi jotelo kod jong’ad bura, nochung’ e dir Sandug Muma mar Ruoth Nyasaye koni gi koni, ka gimanyore gi jo-Lawi ma jodolo ma noting’e. Jo-Israel moko nochung’ kochomo got Gerazim, to modong’ nochomo got Ebal, mondo oguedhgi kaka Musa jatich Ruoth Nyasaye nosechiko chon.

³⁴Eka Joshua nosomo weche duto mag gueth kod mag kuong’ mana kaka ondik e Kitap Chik.

³⁵Ne ok oweyo kata wach achiel kuom weche mane Musa osechiko, to nosomogi duto gi dwol maduong’ ni jo-Israel duto, machwo gi mamon gi joma tindo, kod joma nobiro kodgi.