Read luo 2 Jo-Thesalonika 3 Bible Online

2 Jo-Thesalonika 3 - luo bible

2 Jo-Thesalonika 3

¹To koro owetewa, lemnwauru mondo Wach Ruoth olandre piyopiyo, kendo oyud duong’ kaka osetimore e kindu.

²Lemuru bende mondo Nyasaye oreswa kuom joma okethore, kendo kuom joma timbegi richo, nikech ji duto ok gin joma oyie.

³To Ruoth en jaadiera, omiyo enojiwu, kendo enoritu kuom Ng’ama Rach.

⁴To wan, Ruoth miyo wageno ni utimo gik moko duto ma wawachonu, kendo ni ubiro medo timo kamano.

⁵Ruoth mondo omi chunyu omed hero Nyasaye, kendo ubed gi kinda machalo gi kinda mane Kristo nigo.

⁶To owetewa, wachikou e nying Ruodhwa Yesu Kristo ni, pogreuru kuom owete mabudho abudha kayiem nono, kendo ok luw chik mane uyudo kuomwa.

⁷Un uwegi ung’eyo kaka onego uluw timwa, nimar kane wan kodu ne ok wabudh abudha.

⁸Ne ok wayudo chiemo nono kuom ng’ato ma ok wachulo, to ne watiyo matek gi luchwa odiechieng’ gotieno, mondo kik wami ng’ato kuomu ting’ mapek.

⁹Ok ne watimo kamano nikech ne waonge gi ratiro mar yudo konyruok kuomu, to ne watimo kamano mana ni mondo wabed ranyisi munyalo luwo.

¹⁰Adier, kane wan kodu to ne wamiyou chik ni ka ng’ato ok dwar mondo oti, to kik ochiem.

¹¹Wawacho kamano nikech wawinjo ni nitie jomoko kuomu mabudho abudha ka ok tim gimoro, to tije jowadgi ema gikeloe weche.

¹²E nying Ruoth Yesu Kristo wagolo chik ni joma kamago, kendo wasiemogi ni mondo giti gi kue, giyud gik ma gikonyorego.

¹³To un owetewa, kik uol gi timo maber.

¹⁴Ka ng’at moro ok oyie winjo gima wawacho e baruani, to ng’iuru ng’atno maber, kendo pogreuru kode, nikech mano dipo ka okuodo wiye.

¹⁵To kik ukwane ka jasigu, to siemeuru ka owadu kuom Kristo.

¹⁶Ruodh kue owuon mondo omiu kue mare pile e yore duto. Ruoth obed kodu uduto.

¹⁷An Paulo andiko mosni gi lweta awuon. En kido ma aketo e barupena duto, kendo mano e kaka andiko.

¹⁸Ng’wono mar Ruodhwa Yesu Kristo obed kodu uduto.