Read luo 1 Timotheo 2 Bible Online

1 Timotheo 2 - luo bible

1 Timotheo 2

¹Koro wach mokwongo ma akwayo en ni mondo ji oter ywakgi ir Nyasaye ka gilemo kendo ka gisayo ni ji duto, kendo gigoyo erokamano.

²Nyaka gilem ni ruodhi gi jotelo duto, mondo wadag e ngima mokue kendo moboch, kwaluoro Nyasaye, kendo ka wan joma odimbore chuth.

³Lemo ma kamago en gima ber kendo malong’o ni Nyasaye Jawarwa,

⁴ma dwaro mondo ji duto okwo, kendo ong’e adiera.

⁵Nyasaye en achiel, to e kinde kod ji bende nitie jagach achiel, ma en Yesu Kristo, ma bende en dhano kaka ji.

⁶En ne ochiwore mondo owar ji duto. Kamano kane kinde mowinjore ochopo, to nonyiso ratiro ni Nyasaye dwaro waro ji duto.

⁷ Mano emomiyo noketa jaote, mondo aland wachno, kapuonjo joma ok jo-Yahudi wach mar yie maradier. Ok ariambi, to awacho adiera!

⁸Emomiyo adwaro ni mondo kamoro amora ma ji ochokoree e lemo, to chwo ema mondo olem. To nyaka gibed joma ler, manyalo ting’o luetgi malo kaonge gi mirima kata mbaka moro e chunygi.

⁹ Mon bende onego rwakre gi lewni mowinjore, ka gibidhore kendo giritore kare. Rwakruokgi kik bed mana mar kado wich, kata mar dhahabu, kata kite mabeyo, kata lewni ma nengogi tek,

¹⁰to onego girwakre gi timbe mabeyo kaka owinjore gi mon ma wacho ni oluoro Nyasaye.

¹¹Mon mondo opuonjre koling’, kendo koyie winjo wach.

¹²Ok ayie mondo dhako opuonj ji kata mondo otel ni chwo, to ber mondo oling’,

¹³ nikech Adam ema nochue mokwongo, eka ochue Hawa.

¹⁴ Bende ok Adam ema ne owuondi, to Hawa ema nowuondi modoko jaketho.

¹⁵To kata kamano, dhako noyud resruok e yor nywolo nyithindo, ka osiko e yie gi hera gi puodhruok kod ritruok.