Read luo 2 Timotheo 2 Bible Online

2 Timotheo 2 - luo bible

2 Timotheo 2

¹Omiyo in nyathina, bed motegno kuom ng’wono ma wan-go kodi, ka wan kuom Kristo Yesu.

²Weche duto mane iwinjo ka apuonjo e nyim joneno mang’eny, to in bende nyaka inyis joma igeno, ma bende nyalo puonjo jomoko.

³Yie mondo osandi kodwa kaka jalweny maber mar Kristo Yesu.

⁴Jalweny maber ok dwar mondo oduodre gi weche mag dala, nimar odwaro bedo malong’o ni jal mane ondike.

⁵Jang’uech maringo kar tugo bende ok yud osimbo mar locho ka ok oringo kaka chik dwaro.

⁶Japur motiyo matek bende ema onego kuong yud pokne kuom cham moka.

⁷Par gima awachoni, kendo Ruoth nokonyi ng’eyo tiend weche duto.

⁸Par ni Wach Maber ma alando en wach Yesu Kristo, ma nyakwar Daudi, mane ochier oa kuom joma otho.

⁹Wach Maberno ema omiyo isanda kendo itueya gi nyororo ka ng’at motimo gik maricho. To wach Nyasaye ok nyal tue!

¹⁰Mano emomiyo adhil e weche duto nikech joma Nyasaye oseyiero, mondo gin bende giyud warruok man kuom Kristo Yesu, kod duong’ne mochwere.

¹¹Nitie wach moro maradier mawacho niya, “Ka wasetho gi Kristo, to wanabed mangima kode bende.

¹² Ka watimo kinda to wanalochi kode bende, to ka wakwede, to en bende nokwedwa.

¹³Kata ka wan ok wabedo joadiera, en to pod en mana jaadiera, nikech ok onyal loko kite.”

¹⁴Nyaka ibed kiparo ni ji wechego, kendo chikgi matek e nyim Nyasaye, ni kik gimin wach, nimar timo kamano ok kony gimoro kata matin to kelo mana kethruok ni joma winjo.

¹⁵Tem matek mondo inyis ji ni in ng’at ma Nyasaye oyiego, kendo mapuonjo wach mar adiera e yo makare, kaka jatich ma tichne ok kuod wiye.

¹⁶To bed mabor gi weche manono mag oyuma, nikech joma ohero weche ma kamago medo mana bedo mabor gi Nyasaye,

¹⁷kendo gik ma gipuonjo chalo mana gi adhola manyamore.

¹⁸Gisebayo yor adiera, ka giwacho ni ndalo chier osekadho, mi giketho yie mar jomoko.

¹⁹ To Nyasaye oseketo mise motegno mochung’ kogurore, kendo ondikie niya, “Ng’ato ka ng’ato mahulo nying Ruoth nyaka pogre gi richo.”

²⁰Ong’ere ni e ot moro amora maduong’ nitie agulini mopogore opogore, ma moko olos gi dhahabu kata fedha, to moko bende olos gi bao kata lowo. Mokwongo itiyogo tije mogen, to mokogo itiyogo tich aticha.

²¹Omiyo ka ng’ato opuodhore oa e yore ma ok ler, to enobed kaka agulu mitiyogo tich mogen, nikech en ng’at mochiwore ni Nyasaye, ma Ruoth nyalo konyorego kuom tiyo tich moro amora maber.

²²Nyaka iring ia e gombo mag yawuowi, to ibed e kanyakla mar joma sayo Ruoth gi chuny maradier, kendo madwaro bedo joadiera, kendo madwaro tim makare gi hera kod kue.

²³Bed mabor gi mbekni mofuwo maonge rieko, king’eyo ni gikelo miero.

²⁴Jatich Ruoth ok owinjore bed makwiny, to onego obed ng’ama ng’won gi ji duto, kendo obed japuonj molony, mahore mos,

²⁵kendo marieyo joma dagi wachne gi muolo. Kamoro dipo ka Nyasaye nyalo miyo chunygi lokre mondo ging’e adiera,

²⁶kendo giyud rieko, mi gitony gia e obadho mar Satan, mosemakogi mondo gitim dwarone.