Read luo Tito 3 Bible Online

Tito 3 - luo bible

Tito 3

¹Par ni ji mondo ochiw luor ni joma nigi loch kod joma nigi teko, ka giwinjo wachgi kendo giikore tiyo tije mabeyo duto.

²Nyisgi ni kik giwuo marach kuom ng’ato, kata kik gibed joma ohero dhaw, to gibed joma dwaro kelo winjruok, ka ginyiso ji duto muolo ma gin go.

³Wan wawegi chon ne waonge rieko. Ne ok wawinjo wach, kendo ne wan joma ne olal. Ne wan wasumbini mag gombo mayoreyore mag ringruok, klendo pile ne wan gi ichlit gi nyiego e chunywa. Ne wamon gi jowetewa, kendo jowetewa bende ne mon kodwa.

⁴Kane ng’wono mar Nyasaye Jawarwa kod hera ma oherogo dhano ofwenyore,

⁵nowarowa. Ne ok owarowa nikech tim makare moro amora ma wan wawegi ne wasetimo, to nowarowa mana nikech ng’wonone owuon. Nowarowa gi lwok mane Roho Maler okelonwago nywol manyien kod ngima manyien.

⁶Kuom Yesu Kristo Ruodhwa, Nyasaye noolo Roho mogundho kuomwa,

⁷ni mondo ka osemiyo wabedo e winjruok kode kuom ng’wonone, to wadok joma geno chamo gikeni mag ngima mochwere.

⁸Wechego gin adier, kendo adwaro ni mondo ine ni ji owinjore, mondo joma oyie kuom Nyasaye oket chunygi kuom timo gik mabeyo. Adier, wechego beyo kendo konyo ji.

⁹To nyaka iwe mbekni mofuwo, gi sigendini mag anywola, kod dhaw gi piem kuom weche mag Chik Musa, nikech weche ma kamago onge ohala, kendo gin weche manono.

¹⁰Kisesiemo ng’at makelo pogruok diriyo, to weri kode chuth!

¹¹Nyaka ing’e ni ng’at ma kamano parone osekethore. Okethore aketha kong’eyo.

¹² Kinde akinda ma aoroe Artema iri, kata aoro Tukiko, to reti mondo ibi ira Nikopoli, nikech kuno ema aseneno ni ber mondo abedie ndalo chwiri.

¹³ Tem matek mondo ikony Zena ma jabura kod Apolo e wuodhgi mondo kik gichand gimoro e yo.

¹⁴To nyaka ine ni jowa opuonjore tiyo tije mabeyo, mondo giyud gik ma gichando. Kik gibed joma budho abudha.

¹⁵Ji duto ma wan-go omosou. Mosnwa osiepewa man gi yie. Ng’wono mar Nyasaye obed kodu ndalo duto.