Read luo Filemon 1 Bible Online

Filemon 1 - luo bible

Filemon 1

¹Kuom Filemon, osiepwa kendo jatich wadwa: An Paulo, ng’at motue nikech Yesu Kristo, ema andiko baruani gi owadwa Timotheo. Wandikoni kaachiel gi kanyakla mar jo-Kristo malemo e odi.

² Bende wadikoni nyaminwa Afia kod Arkipo jalweny wadwa.

³Ng’wono gi kue moa kuom Nyasaye Wuonwa gi Ruodhwa Yesu Kristo obed kodu.

⁴Agoyo ni Nyasaye erokamano pile ka aluongo nyinge e lemona,

⁵nikech awinjo wach yie ma in-go kod hera ma iherogo Ruoth Yesu, kaachiel gi jo-Nyasaye duto.

⁶Akwayo Nyasaye ni, kaka ilando ni jomoko yie ma in-go, waduto wamed ng’eyo malong’o gueth mogundho ma wan-go nikech wayie kuom Kristo.

⁷Owadwa, kane awinjo ni hera ma iherogo jo-Nyasaye oseduogo chunygi, ne amor ahinya, kendo an bende chunya noduogo.

⁸Kuom mano, kata obedo ni an-gi ratiro kuom Kristo mar chuni timo gima onego itim,

⁹to akwayi mana gi muolo nikech hera ma waherorego. An Paulo ng’at moti, bende ma koroni otue nikech Yesu Kristo,

¹⁰ asayi kuom wach nyathina Onesimo, mane odoko wuoda ka an e od tuech ka.

¹¹Onesimo[1] yandi ok konyi, to koro okonyowa ahinya, in kaachiel kod an.

¹²Aduoge iri, kata obedo ni ochalo ringra awuon kamano!

¹³Da ahero mondo obed koda ka okonya kaeri, e kinde ma anie tuech nikech Injili ni.

¹⁴To ok adwar chuni mondo ikonya, to daher mondo ikonya mana kuom ng’wononi. Kuom mano, ok anatim gimoro ka ok iyiego.

¹⁵Kamoro nyalo bet ni Onesimo nowuok kuomi kuom ndalo manok, mondo chieng’ moro oduog iri ubed kode nyaka chieng’.

¹⁶To koro ok oduog mana kaka misumba kende, to oduogo ka ng’ama oloyo misumba, nikech osedoko owadu ma ihero kuom Kristo. An owuon ahere, to in ema ibiro here moloyo, nikech ibiro here kaka dhano, kendo ibiro here kaka owadu kuom Ruoth!

¹⁷Omiyo, ka ikwano ni an kod in wan e achiel kuom yie, to rwak Onesimo kaka dirwaka.

¹⁸Ka osetimoni gimoro marach, kata ka en gi gopi moro to kwan mano ka gima an ema an gi gopi.

¹⁹Koro andiko wechegi gi lweta awuon, ka asingora niya, “An Paulo, abiro chuli,” ka ok aparoni ni gopa ma in-go en mana ngimani iwuon!

²⁰Par wachno owadwa! Adwaro ni mondo itimna ng’wono kuom Ruoth e wachni. Duog chunya kaka ja-Kristo wadwa.

²¹Andikoni ka ang’eyo ni ibiro timo gima asewacho, kata moloyo mano.

²²To bende, ikna kar bet, nimar ageno ni Nyasaye biro winjo kwayou uduto, mi oduoga iru.

²³ Epafra, motuewago nikech Kristo Yesu, omosi.

²⁴ Mariko gi Aristarko gi Dema kod Luka, ma gin jotich wetena, bende jomosi.

²⁵Ng’wono mar Ruoth Yesu Kristo obed kodu.