Read luo Jo-Hibrania 10 Bible Online

Jo-Hibrania 10 - luo bible

Jo-Hibrania 10

¹To Chik Musa oting’o mana kido mar gik mabeyo mabiro, to ok giting’o gigo hie. Misengni ma jodolo timo ka luwore gi Chik gitimo higa ka higa. To mano nyiso ni Chik ok nyal miyo jolemo bed kare chutho,

²nikech ka dine ni Chik nyalo timo kamano, to misengnigo dowe chuth, nimar ka osepwodh jolemo chuth, to richo ok dichak chand parogi kendo.

³To kar golo richo, to misengni mitimogo paronigi mana richogi higa ka higa,

⁴nikech remb ruedhi gi remb diek ok nyal golo richo.

⁵ Mano emomiyo, kane Kristo biro e piny, nowacho ni Nyasaye niya, “Ok misengni kod chiwo ema nidwaro, to ringruok ema iseikona.

⁶Misengni miwang’o pep, gi misengni mag golo richo, bende ne ok imorgo.

⁷Omiyo nowacho niya, ‘Era e! A Nyasaye, asebiro mondo atim dwaroni, mana kaka Muma wacho kuoma e Kitap Chik.’ ”

⁸Waneno ni mokwongo Kristo nowacho niya, “Misengni gi chiwo, kata misengni miwang’o pep, gi misengni mag golo richo, ne ok idwaro, bende ne ok imorgo,” kata obedo ni Chik dwaro mondo otimgi kamano.

⁹To eka nowacho niya, “Era e! A Nyasaye, asebiro mondo atim dwaroni.” Kamano Yesu Kristo ketho yo machon mar chiwo chiayo ka misango, to okelo yo manyien ma ng’ato chiwoe ngimane owuon.

¹⁰Wan to opwodhowa nikech Yesu Kristo nochiwo ringre owuon nyadichiel kende, kotimo mana gima ne Nyasaye dwaro.

¹¹ Jodolo duto mag jo-Yahudi chung’ katiyo tich lemo odiechieng’, kendo ginwoyo mana misengni ma gitimo pile, ma ok nyal golo richo kata matin.

¹² Kristo to notimo misango achiel kende mar golo richo, moromo nyaka chieng’, mi obet e bad Nyasaye korachwich, mana kaka Muma wacho.

¹³Chakre kindeno orito nyaka Nyasaye ket wasike bed raten tiende.

¹⁴Osemiyo joma opwodhi kamano odoko joma long’o chuth nyaka chieng’ kuom misango achiel mane otimono.

¹⁵Roho Maler bende nyisowa ni mano en adier. Mokwongo owacho niya,

¹⁶ “Singruok ma anatim kodgi bang’ ndalogo e ma: Anaket chikena e chunygi, kendo anandikgi e parogi. An Ruoth Nyasaye ema awacho kamano.”

¹⁷ To omedo wacho ni, “Ok nachak apar richogi kod kethogi ngang’.”

¹⁸To ka richo osewe, to misango mar golo richo onge gi tich.

¹⁹Emomiyo owetena, koro wanyalo donjo Kama Ler Moloyo gi chir, nikech Yesu osethonwa,

²⁰mi oyawonwa yo manyien kendo mangima kuom ringre owuon, mondo wakadh nanga mar rageng’ wadonj e nyim Nyasaye.

²¹Kaka koro wan gi jadolo maduong’ e od Nyasaye,

²² wasuduru ir Nyasaye gi chuny maradier, kendo ka wan gi yie motegno, bende ka chunywa manyisowa ni wan joketho opwodhi, kendo ka ringrewa olwoki gi pi maliw.

²³Wamakuru matek gik mwahulo ni wageno kuomgi, mak wamindni, nikech Nyasaye mane omiyowa singruokne en jaadiera.

²⁴Ng’ato ka ng’ato nyaka par kaka onyalo jiwo wadgi omed bedo gi hera kod timbe mabeyo.

²⁵Kik wawe mak wachokore kaachiel, kaka jomoko oseweyo timo, to nyaka wajiwreuru ng’ato gi ng’ato, to moloyo onego utim kamano kuneno ka Chieng’ Ruoth sudo machiegni.

²⁶Ka wasiko watimo richo mana mar ayiem, bang’ ng’eyo adiera, to onge misango moro mapod odong’ manyalo golo richowa.

²⁷ Gima odong’ en mana kibaji, kwang’eyo ni wachomo bura, gi mirima mager ka mach, ma Nyasaye biro tiekogo joma otamore yie kuome.

²⁸ Ja-Yahudi moro amora machayo Chik Musa to inego ma ok okechi, ka nitie joneno ariyo kata adek manyalo hulo ni otimo kamano.

²⁹ To koro parieuru kum malit moloyo ma ng’at machayo Wuod Nyasaye onego yudi! Ng’at ma kamano osekawo remo mar singruok mane opwodhego ka gima nono, kendo osejaro Roho mar ng’wono!

³⁰ Wang’eyo Jal mane owacho niya, “An ema nachul kuor. Adier, anachul maonge kiawa!” kendo mane owacho ni ni, “Ruoth nong’ad bura ni joge.”

³¹En gima lich miwuoro, lwar e lwet Nyasaye mangima!

³²Parieuru gik mane otimorenu e ndalo mokadho, kane ler mar Nyasaye orieny e chunyu. Kata obedo ni ne un e lweny mager kendo matek, to ne utimo kinda ka udhil.

³³Jomoko kuomu nodoko ka joma ourore e nyim ji, kiyanyogi kendo isandogi, to moko bende ne ok oringo oweyo joma ne itimonigi kamano.

³⁴Ne usandoru kaachiel gi joma ne otue e jela, bende ne uyie mondo oyak giu, kung’eyo ni un gi mwandu maber moloyo, kendo mosiko.

³⁵Emomiyo kik uwit geno ma un-go, nikech obiro kelo pok maduong’.

³⁶To timuru kinda mondo utim gima Nyasaye dwaro, mi uyud gima osesingore ni nomiu,

³⁷ Kaka Muma wacho niya, “Pod odong’ mana kinde matin kende, eka jal monego bi nobi. Ok nodeki!

³⁸Yie ema nomi ng’ata makare bed mangima. To ka odok chien, to ok nabed mamor kode.”

³⁹Wan to ok wan kuom jogo madok chien kendo lal, to wan kuom jogo moyie, kendo ma Nyasaye biro reso.