Read luo Jo-Hibrania 3 Bible Online

Jo-Hibrania 3 - luo bible

Jo-Hibrania 3

¹Emomiyo owetena ma Nyasaye osemiyo obedo joge owuon, kendo ma bende oseluongo mondo odhi ire e polo, paruru Yesu, mane ooro mondo obed Jadolo Maduong’ mar yie ma wahulo.

² Ne obedo jaadiera ni Nyasaye mane okete e tich mana kaka Musa bende nobedo jaadiera e od Nyasaye.

³Kwar jodhoot moro nigi duong’ moloyo jodhoode. Mano emomiyo Yesu bende duong’ moloyo Musa.

⁴Jodhoot ka dhoot nigi kwargi, to wuon gik moko duto en Nyasaye.

⁵Musa nobedo jaadiera e od Nyasaye duto, to mana kaka jatich, kendo nowuoyo kuom gik ma Nyasaye nowacho e ndalo mabiro.

⁶To Kristo en jaadiera e od Nyasaye kaka wuowi ma jatend od wuon mare. Wan e jood Nyasaye, to mana ka wasiko gi chir kod geno ma ok dog chien.

⁷ Onego watim mana gima Roho Maler wacho e Muma ni, “Winjuru dwond Nyasaye kawuono.

⁸Kik wiu dog matek kaka ne wi kwereu odoko matek kane ging’anyo ni Nyasaye, e kinde mane giteme e thim.

⁹Nyasaye wacho niya, ‘Kwereu notema kuno mondo ong’e chunya, kata obedo ni giseneno gik mane atimo kuom higni piero ang’wen.

¹⁰Mano emomiyo nakecho kod tieng’ni, mi awacho niya, “Ndalo duto gitamore winjo chikena, kendo ok ging’eyo yorena,”

¹¹Kuom mano mirima ne omaka, mi akuong’ora ni, “Ok ginidonj kama antie mondo giyue koda.” ’ ”

¹²Owetena, beduru motang’ mondo kik ng’ato kuomu bed gi chuny marach matamore yie, mamiyo oweyo Nyasaye mangima.

¹³To moloyo, jiwreuru ng’ato gi ng’ato kapod iluongo ndalo ni ‘Kawuono’, mondo kik richo gal ng’ato kuomu, mi bed gi chuny matek,

¹⁴nimar ka wamako geno mane wachakogo nyaka giko matek, to wanabed jocham gikeni kaachiel gi Kristo.

¹⁵ Muma wachonwa wan bende niya, “Winjuru dwond Nyasaye kawuono. Kik wiu dok matek kaka ne wi kwereu odoko matek kane ging’anyo ni Nyasaye.”

¹⁶ Ng’ano giri mane ong’anyo kane owinjo dwonde? Donge gin jogo duto mane Musa owuokgo Misri?

¹⁷To ng’ano giri mane Nyasaye okechogo kuom higni piero ang’wen? Donge gin joma ne otimo richo, mi ringregi odong’ e thim?

¹⁸Koso ng’ano giri mane Nyasaye okuong’ore ni ok nodonj kama entie mondo oyue kode? Ne gin joma notamore winjo wachne.

¹⁹Omiyo waneno ni ne ok ginyal donjo kar yueyone nikech ne gitamore yie.