Read luo Jo-Hibrania 4 Bible Online

Jo-Hibrania 4 - luo bible

Jo-Hibrania 4

¹Koro Nyasaye oseweyonwa singruok ni wanyalo donjo kama entie mondo wayue kode. Omiyo watang’uru mondo ng’ato kuomwa kik par ni thuolo mar donjo e yueyono osekadhe,

²nikech Wach Maber oseyalnwa mana kaka noyal ni joma chon. To wach mane giwinjo ne ok okonyogi, nikech, kata ne giwinje gi itgi kamano, to ne ok giyie gi chunygi.

³ To wan mwaseyie koro wadonjo kama Nyasaye nitie mondo wayue kode. Nyasaye wacho e Muma niya “Mirima ne omaka, mi akuong’ora ni, ok ginidonji kama antie mondo giyue koda.” Owacho kamano, kata obedo ni tije noserumo, chakre ndalo mane otieko chueyo piny,

⁴ mana kaka Muma wacho kamoro kuom ndalo mar abiriyo niya, “Nyasaye noweyo tijene duto, mi oyueyo chieng’ mar abiriyo.”

⁵ To kaka waseneno, Muma wacho bende ni, “Ok ginidonj ngang’ kama antie, mondo giyue koda.”

⁶Mano nyiso malong’o ni nitie jomoko moyienigi donjo kama Nyasaye nitie mondo giyue kode. To kaka joma ne okwongo winjo Wach Maber ne otamore yie mi ok odonjo mondo oyue gi Nyasaye,

⁷ Nyasaye oseketo kinde machielo miluongo ni, ‘Kawuono’. Owuoyo kuome e Muma higni mang’eny achien, komiyo Daudi wacho niya, “Winjuru dwond Nyasaye kawuono. Kik chunyu dok matek.”

⁸ Ka dine bed ni Joshua osemiyogi kar yueyo, to Nyasaye ok dochako owuoyo kuom kinde machielo.

⁹Mano nyiso ni yueyo machalo gi yueyo mar chieng’ Sabato pod nitie ma jo-Nyasaye nyalo yudo,

¹⁰ nimar ka ng’ato odhi yueyo gi Nyasaye to oweyo tichne owuon mi oyueyo, mana kaka Nyasaye bende noweyo tichne ni oyueyo.

¹¹Emomiyo waketuru chunywa mondo wadonji e yueyono. Kik watamre yie kaka jogo notamore, nono to walal.

¹²Wach Nyasaye ngima kendo tiyo, bende obith moloyo ligangla ma dhoge ariyo. Opowo chuny dhano, kendo odonjo nyaka iye mogik, kama opogoe paro gi chuny, kod fuoni gi ondhudho. Bende oketo bura ni paro kod dwaro manie chuny ng’ato.

¹³Onge gimoro amora mochue, manyalo pondo ni Nyasaye, to gik moko duto elore e lela ni Jal ma nyaka wanyis gik ma wasetimo.

¹⁴Emomiyo koro wamakuru yie ma wahulo matek, nikech wan gi Jadolo Maduong’ nosedhi nyaka e nyim Nyasaye. En Yesu Wuod Nyasaye.

¹⁵Wan gi Jadolo Maduong’ manyalo kecho nyawowa nikech noteme e yore duto ma wan bende itemowae, to ne ok otimo richo.

¹⁶Emomiyo wasuduru gi chir e nyim kom Nyasachwa mang’won, mondo okechwa, kendo okonywa kuom ng’wonone e kinde ma wadwaroe kony.