Read luo Jo-Hibrania 5 Bible Online

Jo-Hibrania 5 - luo bible

Jo-Hibrania 5

¹Jodolo madongo duto iyiero kuom ji, kendo iketogi mondo giti ni ji e nyim Nyasaye, ka gichiwo mich gi misengni migologo richo.

²Ginyalo dembo joma kia kod joma orwenyo, nikech gin giwegi bende nyawo obembogi e yore mang’eny.

³ Mano emomiyo nyaka gitim misengni ma gigologo richogi giwegi mana kaka gitimo ni ji.

⁴ Bende onge ng’ama nyalo yierore kende owuon mondo okaw tich maduong’ mar bedo jadolo maduong’, to Nyasaye kende ema yiero ng’ato, mi ket jadolo, mana kaka noketo Harun.

⁵ Kamano bende Kristo ne ok oyierore kende owuon mondo okaw duong’ mar bedo jadolo maduong’, to Nyasaye ema nokete jadolo maduong’ kawachone ni, “In e Wuoda, tinendeni asedoko Wuoru,”

⁶ Muma wacho bende kamoro machielo niya, “In jadolo nyaka chieng’ e kit tich dolo mar Melkizedek.”

⁷ E ndalo mane Yesu odak e pinyni ka dhano, ne olemo, kendo osayo Nyasaye mane nyalo rese e tho, ka oywak malit, kendo pi wang’e chuer. Nyasaye nowinjo ywakne nikech dembruokne.

⁸Kata obedo ni ne en Wuod Nyasaye kamano, to nopuonjore winjo wach kuom masiche mane oneno,

⁹Kendo kane osebedo ng’ama kare chuth, nodoko jakel warruok mosiko ni ji duto mawinjo wachne,

¹⁰mi Nyasaye nochake ni Jadolo Maduong’ e kit tich dolo mar Melkizedek.

¹¹Wan gi weche mathoth ma dwawachnu kuom Melkizedek, to tugo tiendgi tek, nikech itu nok.

¹² Tinde onego ubed jopuonj, to pod udwaro mana ng’ama puonjou nonro mar wach Nyasaye. Kar chamo chiemo motegno, to chak ema pod udwaro!

¹³To ng’at mamadho mana chak kende pod en mana nyathi makwar, ma ok ong’eyo puonj man kuom wach makare.

¹⁴Joma dongo to chamo chiemo motegno, nikech gisepuonjore, mi ging’eyo pogo gik mabeyo gi gik maricho.