Read luo Jo-Hibrania 8 Bible Online

Jo-Hibrania 8 - luo bible

Jo-Hibrania 8

¹ To wach maduong’ kuom weche ma wasewacho e ma: Chutho wan gi jadolo maduong’ ma kamano. Obet e bat korachwich mar Kom Duong’ manie polo.

²Obet kanyo ka otiyo Kama Ler maradier, ma en hema ma Nyasaye ema oguro, to ok dhano.

³Jodolo madongo duto oketi mondo ochiw mich, kendo otim misengni, omiyo jadolowa maduong’ni bende nyaka bed gi gimoro mochiwo.

⁴Ka da en e pinyka, to da ok obedo jadolo kata matin, nikech nite jodolo machiwo mich kaka Chik Musa dwaro.

⁵ Tich ma jodologo chiwo en kido gi tipo mar tich manie polo, mana kaka tich Musa bende nobet, nikech kane Musa chako tich gero Hema mar Romo gi Nyasaye, to Nyasaye nowachone niya, “Neni iloso gik moko duto machal gi kido mane onyisi e got.”

⁶To tich ma Yesu oseyudo ber moloyo tich jodologo, mana kaka winjruok ma okelo ber moloyo winjruok machon, nikech en winjruok ma singruok mabeyo moloyo ema guro.

⁷Ka dine winjruok mokwongo bed ma onge wach moro moremie, to Nyasaye ok dodwaro winjruok mar ariyo.

⁸ To Nyasaye noneno wach moro morem kuom joge, mana kaka Muma wacho ni, “Ruoth Nyasaye owacho niya, ‘Ndalo biro ma anatimie singruok manyien gi dhood Israel kod dhood Juda.

⁹Ok nochal gi singruok mane atimo gi kweregi, kane atayogi, kagologi e piny Misri, nimar ne ok girito singruok mane atimo kodgino, mi an bende ne ajwang’ogi’

¹⁰To Ruoth medo wacho niya, ‘Singruok ma anatim gi dhood Israel bang’ ndalogo e ma: Anaket chikena e parogi, kendo anandikgi e chunygi. Anabed Nyasachgi, mi ginibed joga

¹¹Onge ng’ama nopuonj wadgi, kata ma nopuonj omin mare, kawachone ni, “Ng’e Ruoth,” nikech giduto gining’eya, chakre ng’at matinie moloyo nyaka ng’ama duong’ie moloyo.

¹²Anang’wonnigi giduto kuom timbegi maricho, kendo ok nachak apar richogi ngang’.’ ”

¹³To ka Nyasaye wuoyo kuom singruok manyien kamano, to mano nyiso ni osemiyo singruok mokwongo odoko machon, kendo ong’ere ni gima odoko machon, kendo oti, chiegni rumo.