Read luo Jakobo 1 Bible Online

Jakobo 1 - luo bible

Jakobo 1

¹ An Jakobo, misumba Nyasaye kod Ruoth Yesu Kristo, amoso jo-Nyasaye duto ma oseke e piny ngima.

²Owetena, ka uyudo tem mayoreyore, to kwanreuru ka johawi,

³nimar ung’eyo ni tem mitemogo yieu ema miyo ubedo gi kinda.

⁴To nyaka utim kinda nyaka giko mondo ubed joma olony kendo makare chutho, ma ok urem e yo moro amora.

⁵To ka ng’ato kuomu riekone orem, to ber mondo okwa Nyasaye, kendo Nyasaye nomedne rieko, nikech ochiwo gi ng’wono mak ochayo ng’ato.

⁶To ka ukwayo, to nyaka ubed gi yie, ma ok uriwo gi kiawa kata matin, nikech ng’ama riwo gi kiawa chalo gi apaka mar nam ma yamo tugo kendo tagore.

⁷Ng’at ma kamano kik par ni doyud gimoro kuom Ruoth,

⁸nikech en jahubagabaga, kendo ok oket chunye e gimoro achiel.

⁹Ka Nyasaye oting’o owadwa moro modhier malo, to mondo obed mamor.

¹⁰ To owadwa ma jamoko bende mondo obed mamor ka Nyasaye odwoke piny, nikech jamoko biro lal nono mana ka maua mae thim.

¹¹Ka chieng’ owuok makech to wang’o maua kendo thiepene lwar piny, bang’e kite maber lal nono. Kamano e kaka jamoko bende biro lal nono mana ka tiyo tichne.

¹²Ng’at ma nano ka iteme en jahawi, nikech koseloyo tem to noyud osimbo mar ngima ma Ruoth nosingore ni nomi jogo mohere.

¹³To ng’at ma itemo kik wach ni Nyasaye teme, nikech onge richo manyalo temo Nyasaye, kendo en owuon ok otem ng’ato.

¹⁴To ng’ato ka ng’ato gombone owuon ema temo kendo yondho.

¹⁵Eka ka gombo osemako ich, to onywolo richo, to richo kosedongo mogik to kelo tho.

¹⁶Owetena mahero, ng’ato kik wuondu.

¹⁷Mich mabeyo duto, kod chiwo malong’o duto, a e polo malo. Gia kuom Nyasaye Wuoro mane ochueyo ler mag polo. En ok olokre, bende ok owichre owewa e mudho.

¹⁸Kuom dwarone owuon ne ochweyowa manyien kuom wach mar adiera, mondo wabed kaka olemo mokwongo nyak kuom chuechne duto.

¹⁹Owetena mahero, mago duto ung’eyo. To ng’ato ka ng’ato nyaka bed ng’at mawinjo wach piyo, kendo materore mos kuom wuoyo, kendo ma mirima ok mak piyo.

²⁰Nikech mirimb dhano ok kel tim makare ma Nyasaye dwaro.

²¹Emomiyo wituru gik mochido, gi timbe maricho mogundho. Bolreuru e nyim Nyasaye, kendo yieuru wach mane opidhi e chunyu, nikech en gi teko mar warou.

²²To kik uwuondru, kuwinjo wach awinja, to beduru joma timo gima uwinjo.

²³Ng’at ma winjo wach awinja to ok tim, chalo gi ng’at mang’iyore e rang’i.

²⁴Koseng’iyo kamano, to bang’e odhi, to piyopiyo nono wiye wil gi kite kaka chalo.

²⁵To ng’at mang’iyo chik makare mamiyo wabedo thuolo, kendo mosiko ka timo kamano, bende ma ok winj wach mi wiye wilgo to tiyo gi wachno, e ng’at ma oguedhi e gimoro amora motimo.

²⁶Ka ng’ato galo ni en jalemo maber to ok orito lewe, to mano owuondore awuonda, kendo lemo mare onge tich.

²⁷Lemo mar adier kendo maler e nyim Nyasaye wuoro, en limo nyithi kiye gi mond liete e chandruokgi, kendo bende gi ritruok kuom richo mag piny.