Read luo 1 Johana 5 Bible Online

1 Johana 5 - luo bible

1 Johana 5

¹Ng’ato ka ng’ato moyie ni Yesu e Mesia, en nyathi Nyasaye, kendo ng’at mohero wuon nyathi, to ohero nyathi bende.

²Kuom mano, ka wahero Nyasaye, kendo wamako chikene, to eka wang’eyo ni wahero nyithind Nyasaye,

³ nikech hero Nyasaye en mako chikene. Chike Nyasaye ok tek rito,

⁴nikech nyithind Nyasaye duto loyo piny. Yie ma wan-go kuom Nyasaye ema oseloyo piny.

⁵Ere ng’ama oloyo piny? Ng’ama oloyo piny en mana ng’ama oyie ni Yesu Kristo en Wuod Nyasaye.

⁶Yesu Kristo e jal mane obiro gi pi mar batisone, kod remo mar thone. To winjuru ni ne ok obiro gi pi kende, to nobiro gi pi kod remo. Roho owuon nyiso ni mano en adier, nikech Roho e adiera.

⁷Nitie gik moko adek manyiso ni mano en adier:

⁸gin Roho gi pi kod remo, kendo gik moko adekgo nyiso mana gimoro achiel.

⁹Ka wanyalo yie ni weche ma dhano wacho gin adier, to nyaka wayie gima Nyasaye wacho moloyo, kendo Nyasaye owuon osenyisowa ni gima owacho kuom Wuode en adier.

¹⁰Ng’at moyie kuom Wuod Nyasaye to ong’eyo e chunye ni gima Nyasaye wacho en adier. To ng’at ma ok oyie Nyasaye miyo Nyasaye doko jamriambo, nikech ok oseyie gi gima Nyasaye osewacho kuom Wuode.

¹¹ To gima Nyasaye osewacho e ma: Osemiyowa ngima ma nyaka chieng’, kendo ngimano ni kuom Wuode.

¹²Ng’at man gi Wuowi to nigi ngimano, to ng’at maonge gi Wuod Nyasaye to onge gi ngimano.

¹³Andikonu wechegi, un joma oyie kuom nying Wuod Nyasaye, mondo ung’e ni un gi ngima ma nyaka chieng’.

¹⁴Wageno kuome chuth nikech wang’eyo ni ka wakwaye gimoro mowinjore gi dwarone, to owinjowa.

¹⁵To ka wang’eyo ni pile owinjo kwayowa kamano, to wang’eyo bende ni ose mana miyowa gik ma wakwayo.

¹⁶Ka ng’ato oneno wadgi katimo richo ma ok kel tho, to mondo olamne Nyasaye, to Nyasaye biro miyo owadgino ngima. Mano timore mana ni joma osetimo richo ma ok kel tho. To nitie richo makelo tho. Ok awachi ni mondo olem ni ng’at mosetimo richo ma kamano.

¹⁷Gik moko duto ma ok kare gin richo, to nitie richo ma ok kel tho.

¹⁸Wang’eyo ni onge nyathi Nyasaye mosiko katimo atima richo, nikech Wuod Nyasaye orite, omiyo Ng’ama Rach ok nyal mule.

¹⁹Wang’eyo ni wan mag Nyasaye, to piny duto bende nie lwet Ng’ama Rach.

²⁰Wang’eyo bende ni Wuod Nyasaye osebiro, mi omiyowa rieko mondo wang’ego Nyasaye maradier. Wan kuom Jal maradier, ma en Yesu Kristo Wuod Nyasaye. En e Nyasaye maradier, kendo en e ngima ma nyaka chieng’.

²¹Nyithinda, tang’uru ni nyiseche manono.