Read luo Jong’ad Bura 15 Bible Online

Jong’ad Bura 15 - luo bible

Jong’ad Bura 15

¹Bang’ kinde moko e ndalo kayo ngano, Samson nokawo nyadiel modhigo limo nyako mane oyudo okendo cha. Nokwayo jaduong’ne niya, “Adwaro dhi neno chiega e ot ma entie.” To jaduongg’ne nodagi ni ok onyal donjo e odno,

²kowachone niya, “Ne ang’eyo ni ichaye, omiyo asemiye jal mane ochung’ni. To nyamin maluwe ber moloye, donge dikawe kar jalo?”

³To Samson nodwoke niya, “Sani, kata koro atimo ni jo-Filistia marach, to aonge gi ketho.”

⁴Omiyo nodhi momako bwe mia adek. Nokawogi ariyo ariyo, motueyo iwgi kanyakla, eka notueyo meny e iw ariyogo.

⁵Nomoko menygo gi mach, mogonyo bwego mondo odhi e puothe jo-Filistia mag ngano. Kamano nowang’o ngano mane oseka, kaachiel gi mago mane pok oka. Puothe mag olembe bende nowang’.

⁶Bang’e jo-Filistia nopenjore niya, “En ng’a motimo kama?” Mi nowachnigi ni Samson ema osetimo kamano nikech jaduong’ne ma ja-Timna nosekawo chiege momiyo jal mane ochung’ne kokendo. Omiyo jo-Filistia nodhi mowang’o dhakono kaachiel gi dalagi.

⁷Kane Samson owinjo wachno, nowacho niya, “Kara kama e kaka jogi timo! Asingora ni ok nayue ka pok achulogi kuor.”

⁸Nogoyogi arudha, monegogi mang’eny. Eka nodhi modak e lwanda morokore man Etam.

⁹Jo-Filistia nobiro mojot e piny Juda. Bang’e ne gimonjo dala moro miluongo ni Lehi.

¹⁰Jo-Juda nopenjogi niya, “Ang’o momiyo ubukowa?” Ne gidwokogi niya, “Wasebiro mondo watue Samson, kendo watimne mana kaka notimonwa.”

¹¹Kuom mano, jo-Juda alufu adek nolor modhi e lwanda morokore man Etam, mi giwacho ni Samson niya, “Donge ing’eyo ni wan e bwo loch jo-Filistia? Koro neye masira ma isekelo kuomwa.” En to nodwokogi niya, “Natimonigi mana kaka ne gitimona.”

¹²Ne giwachone niya, “Wasebiro mondo watueyi, kendo wachiwi e lwet jo-Filistia.” To Samson nowachonigi niya, “Kuong’renauru ni un uwegi ok ubi nega.”

¹³Ne gidwoke ni, “Ooyo, wabiro mana tueyi, eka bang’e waketi e lwet jo-Filistia, to ok wabi negi.” Kamano ne gitueye gi tonde ariyo manyien, mi gigole e lwanda morokoreno.

¹⁴Kane Samson ochopo Lehi, jo-Filistia nogoyo koko gi mor, kadhi ire. To Much Ruoth Nyasaye nobiro kuome gi teko, mochodo tonde mane oyudo otuego bedene, mana ka gima ne gin omimi ma much mach ogoyo.

¹⁵Eka noneno chok lemb kanyna ma pod numu, mokwanyo, mi onegogo ji alufu achiel.

¹⁶Bang’e nower niya, “Nanego ji gana achiel gi chok lemb kanyna, mi adhurogii tuche tuche gi chogono.”

¹⁷Bang’ mano nowito chogono, mi nochako kanyo ni Ramath-lehi, tiende ni, god chok lemb kanyna.

¹⁸Koro riyo noloyo Samson, omiyo noywak ni Ruoth Nyasaye niya, “Isemiya loch maduong’ni, to donge riyo biro nega, kendo jo-Filistia ma ok ong’eyigi biro maka?”

¹⁹Mi Nyasaye nobaro kama otimo bugo man Lehi, mi pi nowuok kanyo. Samson nomodho pigno, mi chunye oduogo. Mano emomiyo sokono nochak ni En-hakore, (tiende ni, soko ng’at maywak.) Sokono pod ni kuno nyaka chil kawuono.

²⁰Samson nobedo jatelo e Israel kuom higni piero ariyo, e ndalo mane jo-Filistia rito pinyno.