Read luo Jong’ad Bura 16 Bible Online

Jong’ad Bura 16 - luo bible

Jong’ad Bura 16

¹Chieng’ moro Samson nodhi Gaza, kuma noyudoe nyako moro ma jachode, moterorego.

²Jo-Gaza nowinjo ni Samson ni kuno, ne gilworo kama ne entieno, ka gibutone otieno duto e dhoranga dala to ne ok gitimone gimoro ka giparo ni gibiro nege ka piny oru.

³To Samson nonindo aninda nyaka dier otieno. Eka nochiew modhi omako thike mag ranga dala, gi sirni kargi ariyo. Nopudhogi kaachiel gi lodi mag dhorangach moterogi nyaka ewi got momanyore gi Hebron, koting’ogi e goke.

⁴Bang’ mano, Samson nomako osiep gi nyako moro ma nyinge Delila ma nodak e holo Sorek.

⁵Ruodhi mag jo-Filistia nodhi ir nyakono, mowachone niya, “Ho ane Samson, mondo ing’e kuma tekone malichno aye, kendo ing’e kaka wanyalo loye mi watueye kendo wamake. Kitimo kamano to ng’ato ka ng’ato kuomwa biro miyi fedha alufu achiel gi mia achiel.”

⁶Omiyo Delila nowacho ni Samson niya, “Yie inyisa kuma tekoni malichni aye. Ka ng’ato dwaro tueyi mondo omayi teko, onyalo timo ang’o?”

⁷Samson nodwoke niya, “Ka otueya, gi puye abiriiyo mag atung’ ma pok otwo, to anyalo bedo mana machalre gi ng’ato ang’ata.”

⁸Omiyo ruodhi mag jo-Filistia nokelo ni Delila puye abiriyo ma pok otwo, motueyogo Samson.

⁹To noyudo nyakono osepando jomoko e ot moro maiye. Eka nokok niya, “Samson! Jo-Filistia osebiro monji!” Samson nochodo puyego mana ka omimi ma much mach ogoyo. Omiyo ne pod ok ong’eyo kuma tekone aye.

¹⁰Delila nowacho ni Samson niya, “Aseneno kaka ichal kendo iwuonda. Koro yie inyisa malong’o kaka ditueyi.”

¹¹Samson nodwoke niya, “Ka itueya gi tonde manyien ma pok otuechgo to anyalo bedo mana machalre gi ng’ato ang’ata.”

¹²Omiyo Delila nokawo tonde manyien, motueyego. Eka nokok niya, “Samson, jo-Filistia osebiro monji!” E sano noyudo ka jomoko osebuto e ot maiye. Samson nochodo tonde mane otuego bedene, mana ka gima gin tond otieng’.

¹³Delila nowachone niya, “Pod ichaya achaya, kimedo mana wuonda. Nyisa kaka ng’ato nyalo tueyi.” Samson nowachone niya, “Kikawo orimba yie wiya abiriyo, mi ikado gi usi manie fremb chuecho mondo obed machal gi nanga, to anyalo bedo machal mana gi ng’ato ang’ata.”

¹⁴Bang’e Delila nohoye nyaka onindo. Eka nokawo orimba mag yie wiye abiriyo, mi okado motegno gi usi kamano. Eka nokok niya, “Samson, jo-Filistia osebiro monji!” Samson nochiew oa e nindo, moywayo usi kaachiel gi yie wiye, mopudhogo frembe chwecho.

¹⁵Bang’e Delila nochako openje niya, “Ang’o momiyo iwuonda ni ihera, to chutho ok ihera? Koro isewuonda nyadidek, to pod ok inyisa kuma tekoni aye.”

¹⁶Nodudo ni Samson pilepile, nyaka Samson nojok modwaro mana dere.

¹⁷Omiyo nohulone adiera, konyise niya, “Nyaka ne nywola mirich pok okayo wiya, nikech an ja-Nazir, ng’at mowal ni Nyasaye. Koliela, to tekona dirum, kendo anyalo bedo mana machalre gi ji mamoko.”

¹⁸Kane Delila oneno ni Samson osehulone adiera, nooro wach ni ruodhi mag jo-Filistia niya, “Duoguru kendo nikech koro osehulona adiera.” Mi ne gibiro gi pesa e lwetgi.

¹⁹Delila nohoyo Samson, mi Samson nonindo koteno wiye e chonge. Eka Delila noluongo ng’at moroo molielo orimba yie wi Samson abiriyo. Bang’e Delila nochako tueyo Samson, mane oyudo tekone koro osea.

²⁰Eka delila nokok niya, “Samson, jo-Filistia osebiro monji!” Mi Samson nochiew, ka paro ni obiro guecho kendo wuok kaka pile. To ne ok ong’eyo ni Ruoth Nyasaye oseweye.

²¹Jo-Filistia nomake, motoko wang’e oko. Bang’e ne gitere Gaza, mi gitueye kuno gi tarege mag mula, kendo ne gikete jareg cham e od tuech.

²²To mosmos yie wiye nochako twi.

²³Chieng’ moro ruodhi mag jo-Filistia nochokore e sawo maduong’, mondo otim misango ni Dagon nyasachgi, ka gigoyone erokamano kuom chiwo jasikgi ma Samson e lwetgi.

²⁴Kane ji oneno Samson, ne gipako nyasachgi, ka giwer niya, “Jasikwa moseketho pinywa, kendo onego jowa mang’eny, koro nyasachwa oseketo e lwetwa.”

²⁵Kane gisemetho, mi giromo, ne giwacho niya, “Kelnwauru Samson, mondo obi otugnwa.” Omiyo ne gigole e od tuech, motugonigi. Bang’e ne gimiyo ochung’ e kind sirni mag ot.

²⁶Samson nowacho ni wuowi mane taye niya, “Yie iketa kama anyalo muloe sirni mag ot, mondo ayiengrae.”

²⁷Noyudo ka chwo gi mon opong’o ot, kendo ruodhi duto mag jo-Filistia bende ne ni kanyo, kendo chwo gi mon alufu adek ne ni ewi tado. Giduto ne ging’iyo Samson katugo.

²⁸Samson noywak ni Ruoth Nyasaye niya, “A Ruoth Nyasaye ma Nyasacha, yie ipara. Nyasacha, para, kendo miya teko mana dichiel kende, mondo achulgo kuor ni jo-Filistia kuom toko wengena duto oko.”

²⁹Eka nomako sirni ariyo madiere mosiro ot, mi nonyono piny matek, ka lwete ma korachwich ni kuom siro achiel, to ma koracham kuom siro machielo.

³⁰Nodhiro sirnigo gi muche duto, kokok niya, “We atho gi jo-Filistiagi.” Mi ot noruombore piny kuom ruodhi gi ji duto mane ni e iye. Kamano ji mane Samson onego kotho, ne ng’eny moloyo mago mane onego ka pod ongima.

³¹Owetene gi joodgi nobiro moomo ringre. Ne giyike e liend Manoa wuon mare, manie kind Zora gi Eshtaol. Nosebedo jatelo e Israel kuom higni piero ariyo.