Read luo Jong’ad Bura 18 Bible Online

Jong’ad Bura 18 - luo bible

Jong’ad Bura 18

¹E kindego piny Israel ne pok obedo gi ruoth. To e ndalogo, jo-Dan ne dwaro piny mondo odagie, nikech ne pok giyudo lopgi giwegi kaka dhout Israel mamoko.

²Kuom mano, jo-Dan noyiero jolweny abich kuom dhoutgi duto man Zora gi Eshtaol, mi ne giorogi mondo gidhi giwuoth e piny, kendo gine kaka piny chalo. Kamano ji abichgo nochopo e piny gode mag Efraim, mi gibworo e dala Mika.

³Kane gin kanyo, ne giwinjo ka wuowi ma ja-Lawi cha wuoyo, mi giyango dhoge. Omiyo ne gipenje niya, “Ng’ama okeli ka, to ang’o mitimo ka?”

⁴Nodwokogi niya, “Mika ema oketa ka. Atiyone ka jadolo, kendo ochula.”

⁵Ne gikwaye niya, “Penjnwa Nyasaye wach ka wuodhwani biro bedo maber.”

⁶Jadolono nodwokogi niya, “Dhiuru gi kue, Ruoth Nyasaye ni kodu e wuodhu.”

⁷Omiyo ji abichgo nowuok mochako wuodhgi. Ne giwuotho awuotha mi gipo ka gichopo Laish. Ne gineno ka jokuno odak gi kue mana kaka jo-Sidon. Ne gin ji mamuol man gi kue, ma ok par ni ng’ato dimonjgi, kendo ne gin gi gik moko, ma onge gimoro ma gichando. Ne gidak mabor gi jo-Sidon, kendo ne ok gitimo winjruok moro amora gi jo-Aram.

⁸Kane ji abichgo odok Zora gi Eshtaol, jothurgi nopenjogi wach mane giyudo kuma ne giaye.

⁹Ne gidwokogi niya, “Waseneno piny momew ahinya. Omiyo wadhiuru wamonj joma odakie. Kik udeki kayiem nono, to returu umonj pinyno kendo ukaw,

¹⁰nikech Nyasaye osekete e lwetwa. Kudhi kuno to unuyud ni en piny malach man gi gik moko duto, kendo jopinyno ok par ni ng’ato dimonjgi.”

¹¹Kuom mano, jo-Dan mia auchiel nowuok Zora gi Eshtaol, koikore ni lweny.

¹²Ne gidhi mi gibworo yo podho chieng’ mar Kiriath-jearim e piny Juda. Mano emomiyo kanyo pod iluongo Kambi-jo-Dan.

¹³Ne gia kanyo, mi gichopo dala Mika e piny gode mag Efraim.

¹⁴Eka ji abich mane osedhi nono piny mokiewo gi Laish kande nowacho ni jowetegi mamoko niya, “Bende ung’eyo ni nitie kido mopa mag nyiseche manono e udigi? Koro paruru ane gima onego watim!”

¹⁵Mi ne gibaro e dala Mika, kuma wuowi ma ja-Lawi cha nodakie, mi gimose.

¹⁶E sa nogo jolweny mia auchiel ma ja-Dan nochung’ e dhorangach.

¹⁷Eka ji abichgo nodonjo ei ot mondo okaw nyiseche manonogo, to jadolo nodong’ kochung’ e dhorangach ka wuoyo gi jolweny mia auchiel ka.

¹⁸Kane jogo osedonjo e od Mika mokawo nyisechego, jadolo nopenjogi niya, “Ang’o mutimono?”

¹⁹Ne gidwoke ni, “Ling’ thi, kendo kik iwach gimoro. Bi kodwa mondo ibed jadolowa kendo jang’adnwa rieko. Ere gima ber moloyo? Bedo jadolo mar dhood Israel ngima, koso jadolo mar od ng’at achiel kende?”

²⁰Kane jadolo owinjo wachno, nodoko mamor ahinya, omiyo nokawo nyisechego, modhi gi jogo.

²¹Jo-Dan-go nowichore moa, ka giketo nyithindgi gi jambgi kod gigi nyimgi.

²²Kane gisedhi mochwalore gi dala Mika, eka jogweng’ gi Mika noyworo. Ne gilawo jo-Dan, mi gijuko.

²³Ne gigoyonigi koko, to jo-Dan nolokore, mopenjo Mika niya, “En ang’o mathagi? Marang’o ilawowa gi jogi duto?”

²⁴Nodwokogi niya, “Usekawo nyisechena mane aloso, kaachiel gi jadolona, uago, kendo koro adong’ nono, to eka pod upenja ni en ang’o ma thaga!”

²⁵Jo-Dan nowachone niya, “Kiriek to kik iwach gimoro, nimar wan ji ma chunygi lit, kendo kapo nono wagore kuomi, to mano ema dibed thoni kaachiel gi joodi!”

²⁶Bang’ mano jo-Dan nodhi nyime gi wuodhgi, to Mika bende kane oneno ni gitek ahinya moloye, noa modok dala.

²⁷Kamano jogo noa gi jadolo Kachiel gi gik mane Musa oloso. Ne gidhi mi gimonjo Laish, kuma ji nodakie gi kue, kendo ok par ni ng’ato dimonjgi. Ne ginego joma nodak kuno, kendo ne giwang’o dalagi gi mach.

²⁸Jo-Laish ne onge gi joma dikonygi, nikech ne gidak mabor gi Sidon, to bende ne ok gitimo winjruok moro amora gi jo-Aram, kata obedo ni Laish ne ni e holo man but Beth-rehob kamano. Jo-Dan-go nochako ogero dalano manyien, mi gidakie.

²⁹Ne gichake ni Dan, nying kwargi ma wuod Israel. To nying dalano mokwongo ne Laish.

³⁰Bang’e jo-Dan nochungo kido manono cha mondo gilam, kendo Jonathan nyakwar Gershom ma wuod Musa, kaachiel gi yawuote kod nyikwaye, nobedo jodolo mag dhood Dan nyaka ndalo mane odarie jo-Israel, moter e tuech.

³¹Kido manono mane Mika olosono nosiko kuno ndalo duto mane od Nyasaye ni Shilo.