Read luo Jong’ad Bura 19 Bible Online

Jong’ad Bura 19 - luo bible

Jong’ad Bura 19

¹E ndalo mane piny Israel pok obedo gi ruoth, ja-Lawi moro nodak mabor e chuny gode mag Efraim. Nokendo nyako moro ma nyar Bethlehem-Juda.

²To nyakono nodhaw kode, moweye, kendo odok dalagi Bethlehem. Kane osebet kuno kuom kinde ma dirom dueche ang’wen,

³chwore noluwo bang’e mondo odwoke dala. Nokawo jatichne gi kenjene ariyo, modhigo. Kane ochopo, chiegeno nomose, mokele e od wuon mare, mi wuon mare norwake gi mor.

⁴Jaduong’neno nogeng’e, mi noriyo kuno kuom ndalo adek, korite maber.

⁵Chieng’ mar ang’wen ne gichiew chon, mi giikore mondo gia. To wuon nyako nowacho ni ore niya, “Rit chiemo, icham, mondo iyud teko. Eka bang’e inyalo a.”

⁶Omiyo ji ariyogo nobet piny, mochiemo kendo ometho. Eka wuon nyako nowacho ni ore niya, “Yie mondo iri, imed nenowa.”

⁷To ja-Lawi nochung’ mondo ochak wuoth. Kata kamano, jaduong’ne nomedo kwaye mondo ori, omiyo noyie, monindo kanyo kendo.

⁸Chieng’ mar abich nochiew gokinyi mondo odhi, to jaduong’ne nowachone niya, “Rit mondo igagi mondi.” Kamano ji ariyogo nobet piny mi ochiemo kendo ometho, mi gibudho nyaka odhiambo.

⁹Bang’e ng’atno nochung’ mondo oa gi chiege kod jatichne, to jaduong’ne nochako owacho niya, “Ok ine ka sa koro ng’eny, kendo piny dwaro yuso? Omiyo ri, mondo inewa kendo, to kiny inyalo chiew gokinyi, mondo idog thuru.”

¹⁰To ng’atno ne ok dwar riyo kendo, omiyo nochung’ momako wuoth, kaachiel gi chiege kod kenjene.

¹¹Ne gichopo Jebus, (ma tinde iluongo ni, Jerusalem), ka piny dwaro yuso, mi jatichne nopenje niya, “Ere monowa bworo e dala jo-Jebus ka?”

¹²To ruodhe nodwoke niya, “Ok wanyal bworo e dala ma ok mar jo-Israel.

¹³Omiyo bi wadhi wabuor Gibea kata Rama.”

¹⁴Kamano ne giwuotho mi gikadho Jebus, kendo ne gichopo Gibea e piny jo-Benjamin ka chieng’ podho.

¹⁵Ne gibaro, mi gidonjo e dalano mondo gibworie, to ne gibet mana e laru manie dier dala, nikech onge ng’amaa norwakogi mondo ginind e ode.

¹⁶E sano, jaduong’ moro nobiro kanyo koa e puothe. Ne en ja piny gode mag Efraim, to kata kamano nodak Gibea ma en dala jo-Benjamin.

¹⁷Noting’o wang’e moneno ng’at ma jawuothno, mi nopenje kuma oaye kendo kuma odhiye.

¹⁸Ng’atno nodwoke niya, “Waa Bethlehem-Juda, to wadhi mabor e chuny gode mag Efraim, kuma adakie. Nyocha adhi Bethlehem-Juda to koro adok dala. Kata kamano onge ng’ama oserwaka mondo abwor e ode.

¹⁹Wan gi lum kod chiemo moko mag kenjewa. Bende wan gi chiemo kod divai moromowa, kendo onge gimoro mwachando.”

²⁰Jaduong’no nowachone niya, “Ber. Biuru oda. Abiro ritou maber. Kik unind e laru ka.”

²¹Kamano nokawogi, moterogi e ode, kendo nomiyo kenjegi lum. Welogo nolwoko tiendegi, mi gichiemo kendo gimetho.

²² Eka sa mane gichiemono, ne gipo ka jodalano moko ma acheje obiro, molworo ot ka goyo dhoot, kendo wacho ni jaduong’ ma wuon ot niya, “Golnwa ng’at mane obiro kodi cha mondo waterrego.”

²³To jaduong’no nodwoko, mowacho niya, “Ooyo jowadwa, kik utim gima achach marach kamano, nikech ng’atni wendona.

²⁴Neuru nyara ma pok ong’eyo chwo eri, kendo chi ng’at onogo bende eri. Weuru agolnugi oko mondo uterru kodgi kendo utim kodgi gimoro amora mudwaro. To kik utim gima lich kamano ni ng’atni.”

²⁵To jogoo nodagi winje. Omiyo ja-Lawino nogolo chiege oko momiyogi. Ne ginindo kode gi thwon, ka gidwanye nyaka kogwen, eka ne giweye odhi.

²⁶Dhakono nodwogo ka piny yawore, mopodho e dhood ng’at cha, kama chwore ne nitie, kendo noriere kanyo nyaka piny oru.

²⁷Chwore nochiew gokinyi, kendo kane oyawo dhoot mondo ochak wuodhe, noyudo ka chiege oriere e nyim dhoot.

²⁸Nowachone niya, “Chungi, mondo wadhi.” To ne ok odwoke. Omiyo nokawo ringre chiege moriwo e kanje, kendo nochako wuoth.

²⁹ Kane ochopo dala, nokawo pala, mopogo ringre chiegeno migepe apar gariyo, mi noorogi e piny Israel duto.

³⁰Nowacho ni joma nooro ni mondo openj jo-Israel duto kama: “Bende gima kama osetimoree kata oseneye chakre ndalo mane jo-Israel owuokie Misri nyaka chil kawuono? Paruru wachni, kendo uchiw parou.” Kamano ng’ato ka ng’ato ma nonenogi nowacho niya, “Gima chal kama pok otimore kata pok one nyaka nene!”