Read luo Jong’ad Bura 2 Bible Online

Jong’ad Bura 2 - luo bible

Jong’ad Bura 2

¹Malaika mar Ruoth Nyasaye noa Gilgal, modhi Bokim. Nowacho ni jo-Israel niya, “Ne agolou e piny Misri, mi akelou e piny mane asingora ni nami kwereu. Ne awacho ni ok naketh singruokna kodu.

² Omiyo un bende kik utim winjruok gi weg pinyni, to nyaka uketh kendegi mag liswa. Kata kamano ne ok uwinjo chikna kendo koro neuru gima usetimoni.

³Mano emomiyo nawacho ni ok nariemb ogendnigo mondo owenu thuolo, to ginithagu kendo nyisechegi nobednu obadho.”

⁴Kane malaika mar ruoth Nyasaye osewacho ni jo-Israel wechego, ne giywak malit giduto.

⁵Omiyo nochak kanyo ni Bokim, (tiende ni, joywak). Jo-Israel notimo ni Ruoth Nyasaye misengni kanyo.

⁶Joshua nomiyo jo-Israel thuolo mi ne gidhi mi gidak e pinyno, ng’ato ka ng’ato e lowo mopogne.

⁷Jo-Israel notiyo ni Ruoth Nyasaye e ndalo duto mag Joshua, kendo e ndalo mag jodongo mane odong’ bang’e, kendo mane oneno timbe madongo duto mane Ruoth Nyasaye otimo ni jo-Israel.

⁸Joshua wuod Nun jatich Ruoth Nyasaye notho ka ja-higni mia achiel gapar.

⁹ Ne giyike e lope owuon Timnath-heres, man yo nyandwat mar got Gaash e piny gode mag Efraim.

¹⁰Tieng’no duto notho, moluwo kweregi, kendo tieng’ machielo mane ok ong’eyo Ruoth Nyasaye, kata gik mane osetimo ni jo-Israel, noluwo bang’gi.

¹¹Timbe jo-Israel nodoko maricho e nyim Ruoth Nyasaye, kendo ne gilamo nyiseche manono miluongo ni Baal.

¹²Ne giweyo Ruoth Nyasaye ma Nyasach kweregi mane ogologi Misri, mi giluwo nyiseche mamoko mag ogendini mane gidakgo. Ne gilamo nyisechego, mi gimiyo Ruoth Nyasaye mirima.

¹³Ne giweyo Ruoth Nyasaye mi gilamo Baal kod Ashtaroth.

¹⁴Omiyo Ruoth Nyasaye nokecho kodgi, mi nochiwogi e lwet mony moyakogi. To bende noketogi e lwet wasikgi duto mane olworogi, mi koro ne ok ginyal sirogi kata matin.

¹⁵Kinde duto mane gidhi kedo, Ruoth Nyasaye ne kelonigi chandruok, mana kaka nosiemogi kokuong’orenigi. Kamano ne gichandore malit.

¹⁶To Ruoth Nyasaye noketonigi jotelo moresogi e lwet joyekogo.

¹⁷To kata kamano ne ok gidewo kata mana jotelogo. Ne giduwore, mi gitiyo ni nyiseche mamoko, kendo ne gilamogi. Piyopiyo nono ne gibaro, mi giweyo rito chik Ruoth Nyasaye mane kweregi orito, kendo ne ok giluoro Ruoth Nyasaye.

¹⁸Kinde ka kinde mane Ruoth Nyasaye oketoe ni jo-Israel jotelo, nokonyo jatelono, kendo norito jo-Israel e lwet wasikgi kuom ndalo duto mane jatelono pod ngima. Ruoth Nyasaye ne kecho jo-Israel nikech ne giywak ka wasikgi sandogi kendo thirogi.

¹⁹To pile kane jatelo ma kamano osetho, ne gidok e timbe maricho moloyo mane kweregi timo, kendo ne giluwo nyiseche mamoko, ka gitiyonigi kendo gilamogi. Ne ok giweyo timbegi maricho, kata yoregi mag wich teko.

²⁰Kuom mano, Ruoth Nyasaye nokecho gi jo-Israel, mowacho niya, “Ogandani oseketho singruok mane atimo ni kweregi, kendo ok gisemako chikna.

²¹Omiyo koro ok nariemb kata ng’at achiel kuom ogendini duto mane Joshua oweyo bang’ thone.

²²Abiro temo jo-Israel gi tim jogo, mondo ane ane ka digiluw yorena adimba kaka kweregi notimo.”

²³Kamano Ruoth Nyasaye noweyo ogendinigo, kendo ne ok odewo riembogi, kata chiwogi e lwet Joshua.