Read luo Jong’ad Bura 20 Bible Online

Jong’ad Bura 20 - luo bible

Jong’ad Bura 20

¹Jo-Israel duto, chakre Dan nyaka Beer-sheba, kaachiel gi Gilead, noyworo ni lweny, mochokore Mizpa e nyim Ruoth Nyasaye maonge ng’at modong’.

²Dhout Israel duto, kaachiel gi jodonggi nobiro e chokruok maduong’ mar jo-Nyasayeno, ka gin jolweny alufu mia ang’wen.

³Mi jo-Benjamin nowinjo ni jo-Isarel osedhi Mizpa. Jo-Israel nopenjo niya, “Ere kaka gima rach machalo kama notimore?”

⁴Ja-Lawi mane oneg chiege cha nodwoko niya, “Noyudo wan e wuoth gi chiega, mi ne wabuoro Gibea e piny Benjamin.

⁵To jo-dalano nobiro mondo omonja gotienono, mi gilworo ot mane antie, ka gidwaro nega. Eka ne ginindo gi chiega gi thwon, motho.

⁶Bang’e nakawo ringre, mi apogo kidienje kidienje, kendo naoro sidienjego e piny Israel duto, nikech jogo osetimo tim mochido kendo makuero e Israel.

⁷Koro en wachu, un jo-Israel, mondo upar ane gima onego utim.”

⁸Mi ji duto nochung’ rat, mowacho niya, “Onge kata ng’ato achiel kuomwa ma biro dok e hembe kata ode.

⁹To ma e gima nyaka watim: Wabiro yiero jomoko gi ombulu, mondo omonj Gibea.

¹⁰To achiel kuom apar mar jo-Israel duto biro choko chiemo kuom ji ni joma kedo. Jomoko duto modong’ biro dhi chulo kuor ni jo-Gibea kuom tim marach kendo makuero ma gisetimo e Israel.”

¹¹Kamano jo-Israel nowuok gi chuny achiel mondo omonj dalano.

¹²Dhout Israel nooro joote e piny jo-Benjamin, ka giwacho niya. “Mano tim marach manade musetimo!

¹³Miwauru joma acheje man Gibeago mondo waneg: kamano wabiro pwodho Israel kuom tim marachno.” To jo-Benjamin notamore winjo wach jo-Israel wetegi.

¹⁴Ne giwuok e miechgi duto, mi gibiro Gibea mondo giked gi jo-Isarel.

¹⁵Chieng’no jolweny alufu piero ariyo gauchiel moa e miech Benjamin noyworo ni lweny. To bende ne nitie jo-Gibea mia abiriyo moyier,

¹⁶ma jo-orujre ma rachembe kendo ma josaba, ma nyalo goyo kata mana yie wich ma ok obayo.

¹⁷Jolwenj Israel marateke ma nochokore noromo alufu mia ang’wen ma onge jo-Benjamin.

¹⁸Jo-Israel nowuok modhi Bethel, mi gipenjo Nyasaye wach niya, “Ere dhoot monego kuong dhi monjo jo-Benjamin?” Ruoth Nyasaye nodwoko ni, “Dhood Juda ema mondo okuong monjogi.”

¹⁹Kuom mano, jo-Israel nowuok kogwen mojot kuma omanyore gi Gibea.

²⁰Ne gisudo machiegni gi dalano mondo giked gi jo-Benjamin, kendo ne giriedo jolwenjgi kanyo.

²¹Jo-Benjamin nowuok Gibea, morado gi jo-Israel kuno, kendo ne ginego jolwenj jo-Israel alufu piero ariyo gariyo chieng’no.

²²Jo-Israel nodok Bethel moywak e nyim Ruoth Nyasaye nyaka odhiambo, ka gipenje niya, “Ber mondo waked gi jowetewa ma jo-Benjamin kendo koso?” Ruoth Nyasaye nodwokogi niya “Ee, ber, keduru kodgi kendo.”

²³

²⁴Kamano jo-Israel nojiwore, mochako oriedo mana kama ne giriedoe chieng’ mokwongo. Ne gimonjo jo-Benjamin kendo mar ariyo.

²⁵Jo-Benjamin nowuok Gibea. Mi chieng’no ne ginego ji alufu apar gaboro, ma duto ne gin jolweny marateke.

²⁶Eka jo-Israel duto nodok Bethel, mi gibet kuno e nyim Ruoth Nyasaye, ka gilemo kendo giriyo kech nyaka odhiambo. Ne gitimo ni Ruoth Nyasaye misengni miwang’o pep, kod misengni mag sawo.

²⁷E ndalono Sandug Muma mar Nyasaye ne ni kuno,

²⁸kendo Finehas wuod Eleazar ma wuod Harun ne e jadolo e nyim Ruoth Nyasaye. Jo-Israel nopenjo Nyasaye niya, “Wadog mondo waked gi owetewa ma jo-Benjamin, koso wawe?” Ruoth Nyasaye nodwoko niya, “Monjgiuru, kendo kiny nachiwgi e lwetu.”

²⁹Mi jo-Israel noketo ji obuto, molworo Gibea duto.

³⁰Chieng’ mar adek, jo-Israel nodhi kedo gi jo-Benjamin, kendo ne giriedo jolwenjgi Gibea, mana kaka ne gisetimo mokwongo.

³¹Jo-Benjamin nowuok mondo orad kodgi, mi giyware mabor gi dala. Ne gichako nego jo-Israel kaka ne gisetimo mokwongo. Ne ginego ji moromo piero adek e pap, moko e yo madhi Bethel, to moko e yo madhi Gibea.

³²Jo-Benjamin ne paro ni gibiro loyo jo-Israel mana kaka pile, to kata kamano jo-Israel nosechano mondo oyondhgi giwuog oko e wang’ yore madongo.

³³Thoth jolwenj Israel nowuok kuonde mane gintie, mi gichokore kanyakla Baal-Tamar, to joma oyier alufu apar nothinyore kowuok kuonde mane gisebutoe machiegni gi Gibea,

³⁴mi gimonjo dalano, ka gia yo wuok chieng’. Lweny nodoko mager, to jo-Benjamin ne pok ong’eyo ni ibiro tiekogi.

³⁵Kamano Ruoth Nyasaye nomiyo jo-Israel oloyo jo-Benjamin, kendo ne ginegogi alufu piero ariyo gabich gi mia achiel chieng’no.

³⁶Mi jo-Benjamin nong’eyo ni kara ologi. Jo-Israel noseringo e nyim jo-Benjamin mondo oyondhgi, nikech ne ging’eyo ni jogi ma obuto kolworo Gibea biro konyogi.

³⁷Joma nobutogo nowuok mothinyore Gibea koni gi koni, mi ginego ji duto mane nie dalano.

³⁸Jo-Israel noyudo osewinjore gi jogi mane obuto ni ka gineno iro madum e dalano kochomo polo, to mano biro bedonigi ranyisi

³⁹ni onego gilokre gichom lweny tir. Kane jo-Benjamin osenego ji moromo piero adekgo, mi giparo ni giloyo jo-Isarel kaka ne gisetimo mokwongo,

⁴⁰iro nodum e dala, kochomo polo. E sano ne gigoyo machiemo, mi gineno ka dala duto wang’.

⁴¹Omiyo jo-Israel nolokore gi jo-Benjamin, mi luoro maduong’ nomako jo-Benjamin, ka gifwenyo ni kara oselogi.

⁴²Ne giringo jo-Israel, ka gichiko yo thim, to ne ok ginyal yombo, nimar thoth jolwenj jo-Isarel nothung’ogi, to bende jo-Israel ma noa e dalano nopodho kuomgi gi kang’egi, monegogi.

⁴³Ne giromo jo-Benjamin koni gi koni, mi giriembogi ka ginegogi nyaka ne gichopo kamoro man yo wuokchieng’ mar Gibea.

⁴⁴Jolwenj jo-Benjamin marateke alufu apar gaboro nonegi.

⁴⁵Joma notony noringo kochomo Lwanda Rimon, to ji alufu abich kuomgi noneg e yo. Jo-israel nolawo joma nodong’, monego alufu piero ariyo moko kendo.

⁴⁶Kamano jolwenj jo-Benjamin marateke mane oneg chieng’no noromo alufu piero ariyo gabich.

⁴⁷To ji mia auchiel notony, moringo odhi e thim nyaka Lwanda Rimon, mi gidak kuno kuom dueche ang’wen.

⁴⁸Jo-Israel noduogo chien momonjo jo-Benjamin ma nodong’, mi ginego ji gi jamni mane nie miechgi, kod gik moko duto mane ginwang’o, kendo mier duto mane gidhiye, ne giwang’o gi mach.