Read luo Jong’ad Bura 21 Bible Online

Jong’ad Bura 21 - luo bible

Jong’ad Bura 21

¹Kane jo-Israel ni Mizpa, ne gisekuong’ore ni onge ng’ato kuomgi ma noyie mondo ja-Benjamin okend nyare.

²Koro ne gibiro Bethel, mi gibet kanyo e nyim Ruoth Nyasaye nyaka odhiambo ka giywak matek.

³Ne gipenjo Ruoth Nyasaye niya, “Ruoth Nyasaye ma Nyasach Israel, ang’o motimore e Israel, momiyo Israel achiel lal kama?”

⁴Kinyne gokinyi, ji nochiew chon, mogero kendo-mar-misango kanyo, mi gitimoe misengni miwang’o pep kod misengnii mag sawo.

⁵Ne gipenjore kendgii ka nitie jomoko kuom dhout Israel mane ok obiro e chokruok mar Ruoth Nyasaye, nikech ne gisekuong’ore matek ni nyaka neg ng’ato ang’ata mane ok obiro Mizpa e nyim Ruoth Nyasaye.

⁶Ne gikuyo, ka giparo owetegi ma jo-Benjamin, mi giwacho niya, “Kawuono dhood Israel achiel oselal.

⁷Ere gima dwatim mondo wayud mon ni jo dhoodno modong’ nikech ne wakuong’ore e nyim Nyasaye ni ok wayie mondo gikend nyiwa.”

⁸Mano emomiyo ne gipenjore ka nitie jomoko kuom dhout Israel mane ok obiro Mizpa e nyim Ruoth Nyasaye. To nobedo ni onge ja-Jabesh-gilead mane obiro e chokruokno,

⁹omiyo kane okwan ji, to ne oyud ni onge ja-Jabesh-gilead kata achiel kanyo.

¹⁰Omiyo jo-Israel nooro jogi ma jochir alufu apar gariyo, ka gichikogi niya, “Dhiuru Jabesh-gilead mondo uneg joma odakie, chwo gi mon kod nyithindo.

¹¹Neguru chwo gi mon duto, to kik uneg nyiri ma pok ong’eyo chwo.” Mi jogo nodhi, motimo kamano.

¹²Ne giyudo nyi Jabesh-gilead mia ang’wen ma pok ong’eyo chwo, mi gikelogi e kambi man Shilo e piny Kanaan.

¹³Bang’e jo-Israel duto nooro joote mondo odhi ir jo-Benjamin mane ni e bur lwanda man Rimon, mondo olos kodgi winjruok.

¹⁴Eka jo-Benjamin-go noduogo, mi jo-Israel nomiyogi nyi Jabesh-gilead mane ok ginego kande. To kata kamano ne ginok, ma ok giromo jo-Benjamin-go.

¹⁵Chuny jo-Israel ne pod ywago jo-Benjamin, nikech Ruoth Nyasaye nosemiyo nying jomoko olal kuom dhout Israel.

¹⁶Kuom mano, jodong Israel nowacho niya, “Koro watim ang’o mondo wayud mon ni joma odong’gi, nikech mond jo-Benjamin duto osenegi?

¹⁷Nyaka wayud mon ni jo-Benjamin modong’, mondo kik nyinggi lal,

¹⁸to ok wanyal yienigi mondo gikend nyiwa, nikech wasekuong’ore ni nokuong’ ng’at momiyo ja-Benjamiin nyare okendo.”

¹⁹Bang’e ne giparo ni Sap Ruoth Nyasaye mitimo Shilo higa ka higa biro timore machiegni. (Shilo ni yo nyandwat mar Bethel, kendo en yo milambo mar Lebona, to kendo en yo wuok chieng’ mar yo moa Bethel, kadhi Shekem.)

²⁰Omiyo ne giwacho ni jo-Benjamin niya, “Dhiuru mondo ubuti e puothe mzabibu,

²¹kendo urit une ka nyi Shilo wuok dhi miel e nyasi. Eka uwuogi, mondo ng’ato ka ng’ato kuomu omak nyako moro gi thwon, odoggo e piny Benjamin mondo obed chiege.

²²Ka wuonegi kata owetegi obiro iru mondo ogolgi, to unyalo wachonigi niya, ‘Yieuru wakendgi, nikech ne ok wamayougi e lweny mondo gibed mondewa. To bende ne ok umiyowagi, oomiyo pok uketho singruok ma dikelnu bura!’ ”

²³Mi jo-Benjamin notimo kamano. Ng’ato ka ng’ato nomako nyako kuom nyiri mane mielgo, modhigo mondo obed chiege. Bang’e ne gidok e pinygi giwegi, mi gichako gigero mier, gidakie.

²⁴To jo-Israel mamoko bende noke, modok kuom dhoutgi kendo kuom joodgi e miechgi giwegi.

²⁵ E ndalogo Israel ne pok obedo gi ruoth, kendo ng’ato ka ng’ato ne timo mana gima ohero.