Read luo Jong’ad Bura 3 Bible Online

Jong’ad Bura 3 - luo bible

Jong’ad Bura 3

¹Ruoth Nyasaye noweyo ogendini moko mondo otemgo jo-Israel mane ok okedo e ndalo mane gikawo piny Kanaan.

²Notimo kamano ni mondo tienge jo-Isarel mabiro, kod joma ne pok opuonjore kaka ikedo, ong’e lweny.

³Ogendinigo e magi: ruodhi abich mag jo-Filistia gi jo-Kanaan duto, gi jo-Sidon kod jo-Hivi mane odak Lebanon, chakre god Baal-hermon nyaka kama idonjogo Hamath.

⁴Ruoth Nyasaye noweyo jogo mondo otemgo jo-Israel, kendo ong’ego ka ginyalo rito chike mane omiyo Musa mondo omi kweregi.

⁵Omiyo jo-Israel nodak e kind jo-Kanaan gi jo-Hiti gi jo-Amon gi jo Perizi gi jo-Hivi kod jo-Jebus.

⁶Ne ginywomo nyi jogo, to nyigi bende ne gimiyo yawuot jogo, kendo ne gilamo nyisechegi.

⁷Wi jo-Israel nowil gi Ruoth Nyasaye ma Nyasachgi, mi timbegi nodoko maricho e nyime, ka gilamo Baal kod nyiseche ma mon miluongo ni Asher.

⁸Kuom mano, Ruoth Nyasaye nokecho kodgi, mochiwogi e lwet Kushan-rishathaim ruodh Mesopotamia, mi gibedo e bwo lochne kuom higni aboro.

⁹To kane jo-Israel oywak ni Ruoth Nyasaye mondo okonygi, nomiyo ng’ato moresogi. Ne en Othniel wuod Kenaz ma owadgi Kaleb matin.

¹⁰Much Ruoth Nyasaye nobiro kuome, mi nobedo jatend jo-Israel. Nodhi kedo gi Kushan-rishathaim ma ruodh Mesopotamia, mi noloyo, nikech Ruoth Nyasaye nochiwo ruodhno e lwete.

¹¹Omiyo piny Israel nobet gi kue kuom higni piero ang’wen. Bang’e Othniel wuod Kenaz notho.

¹²Timbe jo-Israel nochako obedo maricho kendo e nyim Ruoth Nyasaye, omiyo Ruoth Nyasaye nothuwo Eglon ruodh Moab mondo oked kodgi.

¹³Eglon nochoko jo-Amon gi jo-Amalek, eka ne gidhi mi giloyo jo-Israel, kendo ne gikawo dala mar othidhe.

¹⁴Jo-Israel nobedo e bwo loch Eglon ruodh Moab kuom higni apar gaboro.

¹⁵To kane jo-Israel oywak ni Ruoth Nyasaye mondo okonygi, Ruoth Nyasaye nomiyogi ng’ato moresogi. Ne en Ehud wuod Gera ja-Benjamin, mane ng’at ma racham. Chieng’ moro jo-Israel noore mondo odhi ochul osuchgi ni Eglon ruodh Moab.

¹⁶Ehud nothedho pand ligangla ma dhoge ariyo, to borne romo nus mita, mi notweye ei lawe e bathe ma korachwich.

¹⁷Eka notero ni Eglon ruodh Moab osuru. Eglon ne ng’at machwe ahinya.

¹⁸Kane Ehud osetieko chulo osuru, nowacho ni joma noting’o osuru mondo odhi adhiya.

¹⁹To en owuon nowichore kar Kite Mopa man Gilgal, modok ir ruoth, kendo owachone niya, “Ruoth, an kodi gi wach ma ling’ling’.” Eka Ruoth nowacho ni joge mondo owuog oko, owenigi thuolo.

²⁰Noyudo Eglon obet e ode man ewi tado, mane ojabetie ka chieng’ kech. Ehud nosudo bute, mowachone niya, “Akeloni wach moa kuom Nyasaye.” Kane Eglon owinjo wachno, nochung’ e kome,

²¹mi Ehud notero lwete ma kor acham, mowuodho ligangla e bathe ma kor achwich, mohobogo bund i Eglon.

²²Ligangla nodonjo e iye, molal kuno gi loge duto. Ehud ne ok oywaye oko to noweye, mi dhoge opowore mowuok kabang’ Eglon.

²³Eka Ehud nowuok oko mochiego dhoudi.

²⁴Kane osedhi, jotich Eglon nodwogo, mi giyudo ka dhoot ochiegi, to ne giparo ni ruoth odonjo e ot maiye mondo olsre.

²⁵To kane gineno ni koro giserito motamo wang’gi, ne gikawo kifungu mi giyawogo dhoot, kendo ne ginwang’o ruodhgi koriere piny e dier ot kotho.

²⁶To Ehud noseringo e sa mane jogo pod ogalore ka girito e dhod cha. Nokadho kar Kite Mopa, motony odhi Seira.

²⁷Kane ochopo kuno, nogoyo tung’ e piny gode mag Efraim mondo ji oyuor ni lweny. Eka notelo ni jo-Isarel, kendo ne gilor kode e ka gia e piny godego.

²⁸Nowachonigi niya, “Luwauru, nimar Ruoth Nyasaye osechiwo wasiku ma jo-Moab e lwetu.” Omiyo ne gilor ka giluwe, kendo ne girito kwonde ming’adogo aora Jordan mondo kik jo-Moab kadhi. Ne ok giyie mondo ng’ato oidh loka.

²⁹Ne ginego jo-Moab marateke kendo ma jochir alufu apar, kendo chieng’no onge kata ng’ato achiel mane otony.

³⁰Kamano jo-Israel noloyoo jo-Moab, mi pinyno nobedo gi kue kuom higni piero aboro.

³¹Jatelo mane owuok bang’ Ehud ne en Shamgar wuod Anath. Nonego jo-Filistia mia achiel mana gi bidhi. En bende noreso jo-Israel.