Read luo Jong’ad Bura 4 Bible Online

Jong’ad Bura 4 - luo bible

Jong’ad Bura 4

¹Bang’ tho Ehud, timbe jo-Israel nochako obedo maricho e nyim Ruoth Nyasaye,

²omiyo nochiwogi e lwet Jabin ruodh jo-Kanaan ma nodak Hazor. Jaduong’ jolweny Jabin ne nyinge Sisera. Nodak Harosheth-hahagoim,

³kendo ne en gi geche lweny mag nyinyo mia ochiko. Nothago jo-Israel malit kuom higni piero ariyo. Omiyo jo-Israel noywak ni Ruoth Nyasaye mondo okonygi.

⁴E ndalogo Debora janabi madhako ma chi Lapidoth ne jang’ad bura e Israel.

⁵Nothoro bet e tiend yadh othidhe man e kind Rama gi Bethel e piny gode mag Efraim. Yadhno niluongo ni yadh Debora. Jo-Israel ne dhi ire mondo ong’adnigi bura kanyo.

⁶Chieng’ moro Debora noluongo Barak wuog Abinoam ma nodak Kedesh e piny Naftali, mowachone niya, “Ruoth Nyasaye ma Nyasach Israel ochiki mondo idhi e piny Naftali gi Zebulun, ikawie ji alufu apar mondo idhigo e got Tabor.

⁷Enomi Sisera jaduong’ jolweny Jabin bi e aora Kishon, kaachiel gi gechene kod ogandane, kendo nochiwgi e lweti kuno.”

⁸Barak nodwoke niya, “Anyalo mana dhi ka in bende idhi koda, to ka ok idhi to an bende ok adhi.”

⁹Debora nowachone niya, “Adier abiro dhi kodi, to kata kamano, lwenjni ok nokelni duong’, nimar Ruoth Nyasaye biro chiwo Sisera mana e lwet dhako.” Kamano Debora noa malo, modhi gi Barak Kedesh.

¹⁰Barak noluongo jo-Zebulun gi jo-Naftali ire Kedesh, mi nodhi gi ji alufu apar ma nobiro. Debora bende nodhi kode.

¹¹Noyudo ka ng’at moro miluongo ni Heber ja-Keni oguro hembe Elonbezaananim man but Kedesh, nimar nosedar moweyo jo-Keni ma nyikwa Hobab, ma or Musa.

¹²Ka ne onyis Sisera wach ni Barak wuod Abinoam osedhi got Tabor,

¹³nochoko gechene mia ochiko mag nyinyo kod jolwenje duto. Eka ne giwuok Harosheth-mar-ogendini, mi gidhi e aora Kishon.

¹⁴Debora nowacho ni Barak niya, “A malo! Kawuononi Ruoth Nyasaye biro keto Sisera e lweti. Ruoth Nyasaye osewuok kedo e nyimi.” Kamano Barak nobiro koa got Tabor gi ji alufu apar.

¹⁵Ruoth Nyasaye nodhuolo Sisera gi gechene kod jolwenje e nyim Barak, mi Sisera nolor e gache moringo gi tiende.

¹⁶Barak nolawogi nyaka Harosheth, monego jolwenygo duto, mi kargi olal ma onge kata ng’at achiel ma nodong’.

¹⁷To Sisera noringo modhi e hemb Jael chi Heber ma ja-Keni, nikech ne nitie winjruok e kind Jabin ruodh Hazor gi jood Heber.

¹⁸Jael nowuok moso Sisera, mowachone niya, “Donji, ruoth, donji. Kik iluor.” Omiyo nodonjo e hema, mi Jael noume gi law.

¹⁹Sisera nokone niya, “Riyo oloya, miyae pi amodhi.” Jael noyawo dho puk chak, moolone chak omadho, bang’e noume kendo.

²⁰Sisera nowachone niya, “Chung’ e dho hema, mondo ka ng’ato obiro ma penjo ka ng’ato ni ka, to ikwere ni onge.”

²¹To Jael chi Heber nokawo tuor kod mulo migurogo hema. Nolidho, modhi ir Sisera mane oyudo nindo ogoyo ngoga. Noguro wiye gi mulono, mi obwongone othichore. Sisera nogwecho, motho.

²²Kane Barak obiro ka dwaro Sisera, Jael nodhi romone kawacho ne niya, “Bi mondo anyisi ng’ama idwaro.” Nodhi kode, moneno Sisera koriere piny otho, ka mulo migurogo hema othir e wiye.

²³Chieng’no Ruoth Nyasaye nomiyo jo-Israel oloyo Jabin ruodh Kanaan,

²⁴kendo ne githung’e ahinya gi lweny, nyaka ne gitieko kare chuth.