Read luo Jong’ad Bura 6 Bible Online

Jong’ad Bura 6 - luo bible

Jong’ad Bura 6

¹Timbe jo-Israel nochako obedo maricho e nyim Ruoth Nyasaye mi nochiwogi e lwet jo-Midian kuom higni abiriyo.

²Jo-Midian nothung’ogi ahinya, omiyo nochunogi ni nyaka gipondi kuonde madiny e kor gode, kod kuonde motimo rogo, gi kuonde moko ma ginyalo geng’oree.

³Pile kane jo-Israel osechwoyo, jo-Midian kod jo-Amalek kod ogendini mamoko moa yo wuok chieng’ ne biro monjogi.

⁴Ne giguro hembegi e piny jo-Israel, kendo ne giketho cham nyaka mbap Gaza, ma ok giweyo gimoro amora mane jo-Israel nyalo konyorego, kaka rombo kata dhiang’, kata kanyna.

⁵Ne gibiro gi jambgi kod hembegi, kendo ne ging’eny mana ka bonyo. Kane oriwgi gi ngamia mane gin-go, to ne ging’eny mokalo akwana. Ne gibiro e pinyno mondo giketh cham.

⁶Kamano jo-Midian nomiyo jo-Israel obedo modhier, mi jo-Israel noywak ni Ruoth Nyasaye mondo okonygi.

⁷Kane giywak ni Ruoth Nyasaye nikech thagruok mane giyudo e lwet jo-Midian,

⁸Ruoth Nyasaye nooronigi janabi mowachonigi niya, “Ruoth Nyasaye ma Nyasach Isarel owacho ni, ‘Nagolou e piny Misri kuma ne unie wasumbini,

⁹mi aresou e lwet jo-Misri, kendo e lwet jogo duto mane thagou. Nariembogi oko mondo giwenu thuolo, mi amiyou pinjegi.

¹⁰Nawachonu ni an e Ruoth Nyasaye ma Nyasachu, kendo ni kik ulam nyiseche jo-Amor ma koro udak e pinygi. To ne ok uwinjo wachna.’ ”

¹¹Bang’ mano, malaika mar Ruoth Nyasaye nobiro, mobet piny e tiend yath moro man Ofra. Yadhno ne mar Joash ja-Abiezer. Noyudo ka Gideon wuod Joash dino cham e bur lwanda mar biyo mzabibu, mondo kik jo-Midian juke gi chamgo.

¹²Malaika mar Ruoth Nyasaye nofwenyorene mowachone niya, “In ng’at ma thwon kendo Ruoth Nyasaye ni kodi.”

¹³Gideon nodwoke niya, “To Ruoth, to ka en adier ni Ruoth Nyasaye ni kodwa to ang’o momiyo gigi duto osetimorenwa? Ere honni duto mane kwerewa owachonwa ni Ruoth Nyasaye notimo kogologi e piny Misri? Ruoth Nyasaye osejwang’owa, kendo oseweyowa e lwet jo-Midian.”

¹⁴Eka Ruoth Nyasaye nochike ni “Dhiyo mondo ires jo-Israel e lwet jo-Midian gi teko ma in-go. An ema aori.”

¹⁵Gideon nodwoke niya, “To Ruoth ere kaka dares jo-Israel? Dhoodwa e dhoot matinie moloyo dhoudi duto mag Manase, to bende an mana ng’at marachrachie moloyo e dhoodwa.”

¹⁶Ruoth Nyasaye nowachone niya, “Anabed kodi mi initiek jo-Midian. Inilogi mana ka gima en ng’at achiel.”

¹⁷Gideon nokone niya, “Ka iyie koda adier, to timna gima nyisa ni in ema iwuoyo koda.

¹⁸Yie kik ia ka nyaka akelni chiwo moro mondo aket e nyimi.” Nodwoke ni, “Abiro riti nyaka iduogi.”

¹⁹Kamano Gideon nodhi moyang’o nyadiel kendo otedo. Nokawo mogo ma dirom kilo piero ariyo molosogo makati ma ok ketie thowi. Noketo ring’o e adita to kado noolo e tawo, eka nokelo ni malaika mar Ruoth Nyasaye e tiend yath.

²⁰Malaika nowachone niya, “Ket ring’ono kod makatino e lwandani, kendo iol kado kuomgi.” Mi notimo kamano.

²¹Eka malaika mar Ruoth Nyasaye norieyo lwete, momulo ring’o kod makati gi luth mane en-go e lwete. Mach nomwoch e lwanda, mowang’o ring’o gi makati te. Bang’ mano malikano nolal nono e wang’e.

²²Mano nomiyo Gideon ong’eyo ni kara malaika mar Ruoth Nyasaye ema aye loso kode, mi nowacho niya, “Yaye Ruoth Nyasaye! Kara en adier ni asewuoyo gi malaika mari wang’ gi wang’.”

²³To Ruoth Nyasaye nowachone niya, “Bed gii kue, kendo kik iluor, nimar ok nitho.”

²⁴Bang’ mano, Gideon nogero ni Ruoth Nyasaye kendo-mar-misango kanyo, mochako ni, ‘Jehova Shalom’, (tiende ni, Ruoth Nyasaye en kue.) Kendono pod ni Ofra kuno e piny jo-Abieze, nyaka chil kawuono.

²⁵Otienono Ruoth Nyasaye nowacho ni Gideon niya, “Kaw rwadh wuoru, gi rwath machielo ma hike abiriyo, kendo imuk kendo-mar-liswa mar baal ma wuoru orito, bende ing’ad siro milamo mochung’ e bathe.

²⁶Eka iger ni Ruoth Nyasaye ma Nyasachi kendo-mar-misango maber mowinjore ewi pidhni. Kaw rwath machielo iwang’ kaachiel gi siro miseng’adono, ka misango miwang’o pep.”

²⁷Omiyo Gideon nokawo jotichne apar, mokonye timo gima ne Ruoth Nyasaye ochike. To ne ok ohedhore timo kamano godiechieng’, nikech noluoro joodgi kod jodalagi, omiyo notime mana gotieno.

²⁸Kane jodala ochiew gokinyi, ne giyudo ka omuk kendo-mar-liswa mar Baal, kendo otong’ siro mane ochung’ e bathe, mi ochiw rwath ka misango miwang’o pep e kendo-mar-misango mane Gideon ogero.

²⁹Ne gipenjore ka gidwaro ng’eyo ng’ama otimo kamano, mi bang’e ne giyudo wach ni en Gideon wuod Joash.

³⁰Omiyo ne giwacho ni Joash niya, “Gol wuodi oko, nimar osemuko kendo-mar-liswa mar Baal, kendo oseng’ado siro mane ochung’ e bathe. Omiyo nyaka otho.”

³¹To kane Joash oneno ka ji ochokore molwore, nopenjogi niya, “Un ema uwuoyo ni Baal koso? Un ema uyalone? Ng’ato ka ng’ato ma yalone ang’ nonegi ka piny pok oru! Ka Baal en nyasaye adier, to mondo owach wachne owuon, nimar en ema nende omuk kendone mar liswa.”

³²Chieng’no nochak Gideon ni Jerubaal, (tiende ni, ‘We Baal owach wechene owuon’,) nimar Joash nosewacho ni, “We Baal owach wechene owuon, kodonjo ni ng’atno kuom muko kendone-mar-liswa.”

³³Jo-Midian gi jo-Amalek kod ogendini duto ma yo wuok chieng’ noriwo jolwenjgi kaachiel. Ne ging’ado aora Jordan, mi gijot e holo Jezreel.

³⁴Much Ruoth Nyasaye nobiro kuom Gideon, mi nogoyo tung’, koluongo joka Abiezer mondo oluwe.

³⁵Nooro joote e piny Manase duto mondo gin bende giluwe, kendo nooro joote ir jo-Asher gi jo-Zebulun kod jo-Naftali mi gin bende ne gibiro.

³⁶Gideon nowacho ni Nyasaye niya, “Ka idwaro ni mondo ires jo-Israel gi lweta kaka isewacho,

³⁷to eri aketo pien rombo e laru kama wadinoe cham. Ka kiny ayudo ka pien rombo kende ema tho omokoe, to piny odong’ kotwo, eka nang’e ni kara adier, idwaro ni mondo ares jo-Israel.”

³⁸Mi notimore kaka nokwayono. Kane Gideon ochiew gokinyi, nobiyo pien rombono, mogolo kuome pi moromo pong’o bakul.

³⁹Eka Gideon nowacho ni Nyasaye niya, “Kik ikech koda, to yie awuo kodi kendo. Yie mondo pien kende ema mondo odong’ kotwo, to piny ema mondo tho omokie.”

⁴⁰Otienono bende, Nyasaye notimo kamano, mi pien kende ema nodong’ kotwo, to piny duto nomoko tho.