Read luo Jong’ad Bura 8 Bible Online

Jong’ad Bura 8 - luo bible

Jong’ad Bura 8

¹Jo-Efraim nowacho ni Gideon niya, “Ang’o momiyo isetimonwa kama? Dak ne iluongowa kidhi kedo gi jo-Midian?” Ne gidhaw kode matek kuom wachno.

²To Gideon nodwokogi niya, “Ere ndhath gima asetimo? Kata mana gima tinie ma un jo-Efraim usetimo, oloyo mago duto ma dhoodwa osetimo.

³ Donge Nyasaye osechiwo e lwetu Oreb gi Zeeb ma ruodhi mag Midian e lwetu? Ere gima an asetimo minyalo pimo gi gima usetimo?” Kane osewacho kamano, mirimb jogo norumo.

⁴Kane Gideon gi joge mia adek osebiro mong’ado aora Jordan, ne giol. To kata kamano pod ne gilawo wasikgigo.

⁵Omiyo nokwayo joma nodak Sukoth niya, “Yieuru umi joga chiemo nikech giol, to pod walawo Zeba gi Zalmuna, ruodhi jo-Midian.”

⁶To jodong Sukoth nodwoke niya, “Ere gima omiyo onego wami jogi mag lweny chiemo, to pok imako Zeba gi Zalmuna?”

⁷Gideon nowachonigi niya, “Kara ber! To ka Ruoth Nyasaye osechiwo Zeba gi Zalmuna e lweta, to anayu ringreu gi kuth thim!”

⁸Noa kanyo modhi Penuel, kendo kuno bende nokwayoe chiemo mana kaka nosekwayo jo-Sukoth. To jo-Penuel nodwoke mana machal gi jo-Sukoth.

⁹Omiyo nowachonigi niya, “Ka aduogo ka angima, to abiro muko kama ochiel motegno mar siro lweny e dalauni!”

¹⁰Noyudo ka Zeba gi Zalmuna ne ni Karkor kaachiel gi jogi mag lweny alufu apar gabich. Ne gin joma nodong’ kuom oganda lweny mar jo wuok chieng’. To jolweny alufu mia achiel gi piero ariyo (120,000) noneg e lweny.

¹¹Gideon noluwo yor thim mane johala luwo, man yo wuok chieng’ man Noba gi Jogbeha, mi nomonjo jolwenygo apoya.

¹²Zeba gi Zalmuna ma ruodhi mag Midian noringo, to Gideon nolawogi, momakogi, jolwenjgi to noleny nono.

¹³Kane Gideon wuod Joash duogo koa e lweny, koluwo yor Heres,

¹⁴nomako wuod Sukoth moro, mi wuowino nondikone nying ruodhi mag Sukoth, kaachiel gi nying jodonggi. Duto ne gin ji piero abiriyo gabiriyo.

¹⁵Bang’e Gideon nodhi ir jo-Sukoth mowachonigi niya, “Neuru Zeba gi Zalmuna mane omiyo uchaya kupenja ni, ‘Isemako Zeba gi Zalmuna koso, momiyo idwaro ni mondo wami jogi chiemo?’ ”

¹⁶Eka nomako jodong dalano, kendo nokawo kuth thim moyuyogigo.

¹⁷To bende nomuko kama ochiel motegno mar siro lweny mane ni Penuel kendo nonego jo dalano.

¹⁸Bang’e nopenjo Zeba gi Zalmuna niya, “Joma nunego Tabor ne chal nadi?” Ne gidwoke ni, “Ne gichal kodi. Ng’ato ka ng’ato kuomgi ne chalo gi wuod ruoth.”

¹⁹Gideon nowachonigi niya, “Ne gin owetena ma yawuot mama. Akuong’ora e nying Nyasaye ni dine uwe negogi, to da ok anegou.”

²⁰Eka nowacho ni Jether ma wuode makayo niya, “A malo, ineggi!” To wuodeno ne pod mana rawera, omiyo noluor, mi ok owuodho liganglane.

²¹Zeba gi Zalmuna nowacho ni Gideon niya, “Bi inegwa mana in iwuon, nimar in e ng’at maduong’ ma bade otegno.” Omiyo Gideon noa malo, monegogi giduto. Eka nokawo odeyo mane nie ng’ut ngamia maggi.

²²Bang’ wechego jo-Israel nowacho ni Gideon niya, “Iseresowa e lwet jo-Midian, omiyo koro bed ruodhwa kendo wuodi gi nyikwayi bende nobed ruodhi bang’i.”

²³To Gideon nodwokogi niya, “Ok nabed ruodhu, kata mana wuoda bende ok nobedi, to Ruoth Nyasaye ema nobed ruodhu.”

²⁴Eka nomedo wacho niya, “Yieruru ng’ato kuomu mondo omiya stadi mugolo kuom gik moyaki.” (Jo-Midian mane giyakogo ne joma dak e thim, ma timgi en liero stadi mag dhahabu e itgi.)

²⁵Jo-Israel nodwoke niya, “Wayie miyigi.” Mi ne gipedho stadi mane oseyako.

²⁶Pek mar stadi mane gimiyo Gideon ne romo kilo piero adek. To bende ne nitie odeyo gi bonje kod nengni maralik mane ruodhi mag jo-Midian rwako, kaachiel gi thiwni mane otue e ng’ut ngamia maggi.

²⁷Gideon noloso kido mar nyasaye manono gi dhahabubugo, mochungo e dalane Ofra. Jo-Israel duto noweyo Nyasaye modhi kuno lamo nyasaye manonono. Ne odoko obadho ni Gideon kaachiel gi joode.

²⁸Kamano e kaka jo-Israel noloyo jo-Midian, mi jo-Midian koro ne ok nyal bwogogi. Omiyo piny nobet gi kue kuom higni piero ang’wen kane Gideon wuod Joash pod ngima.

²⁹Gideonno, ma bende iluongo ni Jerubaal, nodhi odak e dalane owuon.

³⁰Ne en gi yawuowi piero abiriyo, nikech ne en gi mon mang’eny.

³¹Bende ne en gi dhako moro Shekem, ma nonywolone wuowi, mochako ni Abimelek.

³²Gideon wuod Joash notho ka hike oniang’ mi oyike Ofra dala jo-Abiezer, e liend Joash wuon mare.

³³Bang’ tho Gideon, jo-Israel nolokore kendo, moweyo Nyasaye. Ne gichako gilamo Baal, mi giloko Baal-berith nyasachgi.

³⁴Ne giweyo lamo Ruoth Nyasaye ma Nyasachgi mane oseresogi kuom wasikgi mane olworogi.

³⁵To bende ne ok gitimo maber ni joka Gideon kuom ber mane Gideon osetimonigi. (Gideonno nyinge moro ne en Jerubaal)