Read luo Jong’ad Bura 9 Bible Online

Jong’ad Bura 9 - luo bible

Jong’ad Bura 9

¹Abimelek wuod Jerubaal nodhi Shekem thurgi min mare, mi owuoyo gi owete gi min kod jodhoodgi min mare duto.

²Nowachonigi niya, “Yieuru upenjna jodong Shekem kama: ‘Ere gima bernu? Bedo e bwo loch yawuot Jerubaal, ma gin ji piero abiriyo duto, koso bedo e bwo loch ng’at achiel?’ Bende nyisgiuru ni nyaka ging’e ni an remo achiel kodgi.”

³Owete min mare nowuoyone gi jo-Shekem e wachno, mi jo-Shekem noyie luwe, nimar ne en watgi.

⁴Ne gimiye fedha piero abiriyo mogol e od Baal-berith ma nyasachgi, mong’iewogo jomoko ma acheje kendo ma jomahundu mondo oluwe.

⁵Abimelek nodhi Ofra dala Jerubaal wuon mare, mi onego owetene piero abiriyo ma yawuot wuon ewi lwanda achiel, mak mana Jotham ma wuod Jerubaal machogo ema nopondo, mi ne ok onego.

⁶Bang’e jo-Shekem duto kod jo-Beth-milo nochokore kanyakla, kendo ne gidhi e tiend yath man but siro milamo man Shekem, mi giketo Abimelek ruoth kuno.

⁷Kane Jotham owinjo wachno, nodhi mochung’ ewi got Gerizim, kendo nokok niya, “Winjuru un jo-Shekem, kendo Nyasaye bende mondo owinju.

⁸Chieng’ moro yien mae bungu nodhi yiero ruodhgi, mi ne giwacho ni yadh zeituni mondo obed ruodhgii.

⁹To yadh zeituni nodwokogi niya, ‘Ere kaka dawe mo miyudo kuom olembena, kendo mimiyogo nyiseche kod ji duong’, mondo abed ruodhu?’

¹⁰Eka yien nowacho ni ng’owo ni, ‘To in diyie mondo ibed ruodhwa?’

¹¹To ng’owo nodwokogi niya, ‘Ere kaka dawe olembena mabeyo kendo mamit, mondo abed ruodhu?’

¹²Omiyo yien nokwayo yadh mzabibu mondo oyie bedo ruodhgi.

¹³To yadh mzabibu nodwokogi niya, ‘Ere kaka dawe mzabibuna, ma miyo nyiseche kod ji mor, mondo abed ruodhu?’

¹⁴Bang’ mano, yien duto nokwayo kudho ni, ‘In koro yie mondo ibed ruodhwa.’

¹⁵Mi kudho nowachonigi niya, ‘Ka udwaro keta ruodhu adiera to ara biuru mondo uyue e tipona. Ka ok kamano, to mach biro muoch kuom kudho kendo biro wang’o kata mana yiend sida man Lebanon.’ ”

¹⁶To Eka Jotham nomedo wacho niya, “Koro un bende uparo ni usetimo gima kare kendo mowinjore kuom keto Abimelek ruoth? Bende usetimo maber adier ni Jerubaal kod joode?

¹⁷Bende usetimo ni wuora gima owinjore gi timne maber mane otimo kokedonu kendo kowitore e nyim lweny, moresou e lwet jo-Midian?

¹⁸Kawuono useriwo ni jood wuora, mi unego yawuote piero abiriyo e lwanda achiel, kendo uketo Abimelek, ma wuod chiege ma misumba, mondo obed ruodh Shekem, mana nikech en watu.

¹⁹Bende uparo ni gima usetimo ni Jerubaal kod joode kawuononi en gima ber kendo ma kare adier? Ka en kamano, to onego ubed mamor gi Abimelek, kendo en bende onego obed mamor kodu.

²⁰To ka ok kamano, to mach mondo omuoch kuom jo-Shekem gi jo-Beth-milo mondo owang’ Abimelek.”

²¹Bang’ mano Jotham noringo moa. Nodhi modak Beer, nikech noluoro Abimelek owadgi.

²²Abimelek norito jo-Israel kuom higni adek.

²³Bang’e Nyasaye nomiyo jo-Shekem odhaw kode, mi ging’anyone.

²⁴Mano notimore ni mondo nek marach mar yawuot Jerubaal piero abiriyo ochul ewi Abemelek owadgi ma nonegogi, kendo ewi jo-Shekem ma nokonye negogi.

²⁵Jo-Shekem nooro ji mondo odhi obut ni Abimelek ewi gode, to jogo ne yako ji duto mane kadho kuno, omiyo Abimelek noyudo wach, motang’.

²⁶Ng’at moro ma nyinge Gaal wuod Ebed nobiro Shekem, kaachiel gi owetene, mi jo-Shekem noyie bedo e bwo lochne.

²⁷Ne gidhi e puothegi, mi gipono mzabibu, kendo gikelo kuonde mag bicho, mondo gilosgo divai. Bang’’e ne gitimo sawo e hekalu mar nyasachgi, kuma ne gichiemoe kendo gimethoe, mi giyanyoe Abimelek.

²⁸Gaal wuod Ebed nowacho niya, “Abimelek to en ng’a? Koso ere gima omiyo wan jo-Shekem dwatine? Donge wuod Jerubaal kod ng’ate ma Zebul josebedo ka tiyo ni jo-Hamor ma wuon Shekem? Koro ere gimomiyo wan dwatine?

²⁹Ka dabed ni an jatend jogi, to dariembo Abimelek, kendo da awachone ni mondo okel jolwenje wakedgo.”

³⁰Kane Zebul wuod Shekem owinjo wachno, nokecho ahinya,

³¹mooro joote ling’ling’ ir Abimelek gi wach niya, “Gaal wuod Ebed, kaachiel gi owetene,

³²josebiro Shekem, kendo gisethuwo jo-Shekem kodi. Omiyo koro kaw jogi mondo ubi gotieno upond e bungu.

³³To kiny gokinyi ka piny oru, uwuog kuma upondoe, mondo umonj dala apoya. Ka Gaal gi jogi jowuok mondo oked kodu, to timnegiuru gima uneno!”

³⁴Kamano, Abimelek gi joge nobiro gotieno. Ne gipogore e migepe ang’wen mi gibuto mondo gimonj Shekem.

³⁵Kiny, kane Gaal owuok, mochung’ e dhoranga dala, Abimelek kaachiel gi joge nowuok kuonde mane gipondoe.

³⁶Gaal nonegogi, mowacho ni Zebul niya, “Neye joma biro ka ewi gode ka.” To Zebul nodwoke niya, “Maka mana tipo mag gode, to ok gin ji.”

³⁷Bang’e matin, Gaal nochako owachone ni, “Ne! Ji e kande lor ewi got, kendo migawo moro e cha, biro koluwo yor yadh ajuoga.”

³⁸Eka Zebul nopenje niya, “Koro ere wecheni ma nyocha isungorigo ka? Ok in ema nyocha ipenjo ni ere gima omiyo dwabed e bwo ng’at ma Abimelekni? Donge magi e joma nyocha icharo? Koro dhiyo iked kodgi!”

³⁹Kane Gaal owinjo kamano, nokawo jo-Shekem, modhi omonjo Abimelek, to Abimelek nodhuole gi lop tiende, moringo, odok Shekem.

⁴⁰Ringre jomotho nopie kanyo mochopo e dhoranga Shekem.

⁴¹Abimelek nodhi modak Aruma, to Zebul noriembo Gaal kaachiel gi owetene mi ok oweyo nigi thuolo mondo gidag Shekem kendo.

⁴²Kinyne jo-Shekem nowuok oko e lela mi nonyis Abimelek wachno.

⁴³Nokawo joge, mopogo e migepe adek, mi ne gidhi gipondo e bungu. To kane oneno ji kawuok e dala, nowuok kama nopondoe, momonjogi.

⁴⁴Noreto gi migawo mane en go, modhi ochung’ e dhoranga dala. To migepe moko ariyo mag joge nomonjo ji duto mane ni e bungu, mi ne ginegogi duto.

⁴⁵Abimelek nokedo gi joma ne ni e dala odiechieng’no duto, mi nomako dala, kendo nonego ji ma nodakie. Eka noketho dalano, mokworo bala kuome.

⁴⁶Kane ji duto mane odak kama oger motegno mane ni Shekem owinjo wachno, ne gidonjo e ot ma iye mar hekalu mar El-berik nyasachgi mondo gipondie.

⁴⁷To kane onyis Abimelek ni jodalano ochokore kanyakla,

⁴⁸nokawo joge, modhigo e got Zalmon. Nokawo le, mong’adogo bad yath moro, moketoe goke. Eka nowacho ni joge niya, “Uneno gima atimoni. Returu mondo un bende utim kamano.”

⁴⁹Omiyo ng’ato ka ng’ato nong’ado bad yath, mi ne giluwo bang’ Abimelek, kendo ne gichano bede yien-go e kor ot ma iye mar hekaluno gi oko eka ne gimokoe mach mi jo dalano duto notho. Duto ne gin ji moromo alufu achiel, chwo gi mon.

⁵⁰Bang’e Abimelek nodhi Thebez, molworo, kendo okawo.

⁵¹To ne nitie gorofa mar lweny moger motegno e dier dala, omiyo jo dalano duto, chwo gi mon, nodhi mopondo kanyo. Ne gilorore e iye, mi giidho e tado.

⁵²Abimelek nomonjo gorofano, to kane ochopo machiegni gi dhoot mondo omokie mach,

⁵³ dhako moro nogolo pong’ rego mogoyo wi Abimelek, mi wiye obarore.

⁵⁴Eka noluongo wuowi mane jating’ne gi lweny piyopiyo, mowachone niya, “Wuodh liganglani, inegago, nimar dipo ka ji owacho ni dhako ema onega.” Kamano wuowino nochwowe, motho.

⁵⁵Kane jo-Israel oneno ni Abimelek osetho, ne gike, mi gidhi miechgi giduto.

⁵⁶Kamano Nyasaye nochulo richo mane Abimelek otimo ni wuon, mare kuom nego yawuot wuon piero abiriyo.

⁵⁷To bende Nyasaye nochulo kuor ni jo-Shekem kuom richogi, mana kaka Jotham wuod Jerubaal nonyisogi chieng’ mane okuong’ogi.