Read luo 2 Johana 1 Bible Online

2 Johana 1 - luo bible

2 Johana 1

¹An jaduong’, andikoni in Minwa[1] ma Nyasaye oyiero, kendo andiko ni nyithindi ma ahero adier. Ok an kenda ema aheri to ji duto moseng’eyo adiera bende oheri,

²nikech adiera manie iwa, kendo ma osiko kodwa nyaka chieng’.

³Ng’wono gi miwafu kod kue moa kuom Nyasaye Wuoro gi Yesu Kristo Wuod Wuoro nobed kodwa e adiera.

⁴Ne amor ahinya kane ayudo ni nyithindo moko wuotho e adiera, ka giluwo chik mane wayudo kuom Wuoro,

⁵ omiyo koro Minwa, akwayi ni mondo ng’ato ka ng’ato kwomwa oher wadgi. Gima andikoni ok en chik manyien, to en chik ma wasebedogo nyaka a chakruok.

⁶To hera ma awuoyo kuomeni dwaro ni mondo wawuothi kaka chik Nyasaye dwaro. En e chik achiel ma usewinjo a chakruok, ni, “Daguru e hera.”

⁷Jowuond mathoth osewuok e piny. Gin e jogo ma ok oyie ni Yesu Kristo nobiro kaka dhano. Ng’at ma kamano en jawuond, kendo en Jasik Kristo.

⁸Ritreuru mondo kik gima usetiyone lalnu, to uyud poku duto.

⁹Ng’at makalo tong’, kendo ok sik e puonj Kristo ok nigi Nyasaye. To ng’at mosiko e puonj Kristo nigi Wuoro, kaachiel gi Wuowi.

¹⁰Ka ng’ato obiro iru ma ok okelo puonj Kristo, to kik urwake e uteu, kata mana mos kik umose,

¹¹nimar ng’at momose, bende oriwore kode e timbene maricho.

¹²Kata obedo ni an gi weche mathoth ma adwaro nyisou, to ok abi ndikogi e barua, to ageno ni abiro biro iru mondo alos kodu wang’ gi wang’, mondo waduto wabed mamor kaachiel.

¹³Nyithind Nyameru,[2] ma bende Nyasaye oyiero, omosi.