Read luo 3 Johana 1 Bible Online

3 Johana 1 - luo bible

3 Johana 1

¹ An jaduong’, andikoni in Gayo, osiepna ma ahero gi hera maradier.

²Osiepna, akwayo Nyasaye ni mondo idhi maber e yore duto, kendo ibed mangima e ringri mana kaka ang’eyo ni ingima e chunyi bende.

³Ne abedo mamor ahinya kane owete moko obiro, mowacho kaka isiko kuom adiera, kendo kaka iwuotho e ngima mar adiera.

⁴Onge gima miya mor moloyo ka awinjo ni nyithinda wuotho e adiera.

⁵Osiepna, in jaadiera kuom gimoro amora mitimo ni owete, kata ka gin joma welo.

⁶Gisewuoyo kuom heranino e nyim kanyakla mar jo-Kristo man ka. Yie ikonygi e wuodhgi, kikowogi e yo malong’o ni Nyasaye mwatiyone,

⁷nimar ne giwuok gidhi e tich Kristo, ma ok giyie kawo kony moro amora kuom joma ok oyie.

⁸Omiyo wan jo-Kristo onego wakony joma kamago mondo wanywak kodgi tich mar lando adiera.

⁹Ne andiko ni jo-Kristo muchokorugo, to Diotrefe, madwaro bet jatendgi, notamore winjo gima wawacho.

¹⁰Omiyo ka abiro to anael gik ma otimo e lela, kaka ohangowa gi weche mamono maricho. To ewi mago duto, otamore rwako owete bende, to ok mano kende, to bende otamo joma dwaro timo kamano e kanyakla mar jo-Kristo.

¹¹Osiepna, kik iluw tim marach, to luw tim maber. Ng’at matimo maber en ng’at Nyasaye, to ng’at matimo marach, to pok oneno Nyasaye.

¹²Ji duto wuoyo maber kuom Demetrio. Adiera lilo ema wachore kuome. Wan bende wayie ni timbene beyo kendo ing’eyo ni gima wawacho en adier.

¹³An gi weche mathoth ma adwaro nyisi, to kata kamano ok adwar ndikogi e barua.

¹⁴To ageno ni abiro neni machiegni mondo walos wang’ gi wang’.

¹⁵Kue obed kodi. Osiepewa duto omosi. In bende mosnwa osiepewa achiel achiel.