Read luo Fweny 10 Bible Online

Fweny 10 - luo bible

Fweny 10

¹Bang’e ne aneno malaika machielo maratego koa e polo. Ne orwakore gi bor polo, kendo lihudu nolworo wiye, to wang’e ne chalo gi sirni makakni ka mach.

²Ne en gi kitabu matin moel e lwete. Tiende ma korachwich nonyono nam, to tiende ma koracham nonyono piny.

³Nokok gi dwol maduong’ machalo mana dwond sibuor maruto. Kane osekok kamano, to polo abiriyo nomor,

⁴kendo kane polo abiriyogo osemor kamano to ne adwaro ndiko gima ne asewinjo ka giwacho, to ne awinjo dwol moro koa e polo mawacho niya, “Kik indik gima polo abiriyogo osewacho, to ling’go mana e chunyi.”

⁵ Eka malaika mane aneno ka onyono nam kod piny cha noting’o bade kochiko polo,

⁶mi okuong’ore gi nying Jal mantie nyaka chieng’, kendo mane ochueyo polo gi piny gi nam kod gik moko duto manie igi. Nowacho niya, “Deko moro ok nochak obedie,

⁷to ka malaika mar abiriyo ogoyo tung’ne to Nyasaye nochop chenone mopondo kaka osenyiso jotichne ma jonabi.”

⁸ Bang’ mano, dwol mane asewinjo kawuoyo koa e polo cha nochako owuoyo koda ka wacho niya, “Dhiyo mondo ikaw kitabu moel manie lwet malaika ma onyono nam kod piny.”

⁹Omiyo ne adhi ir malaikano, mi akwaye mondo omiya kitabu matinno. To nowachona niya, “Kawe, mondo ichame. Obiro bedo mamit e dhogi ka mor kich; iyi to obiro chando.”

¹⁰Eka ne akawo kitabu matinno e lwet malaikano, mi achamo, kendo ne omit e dhoga ka mor kich, to kane asechame kamano to nochando iya.

¹¹Bang’ mano, ne owachna niya, “Nyaka ichak ikor wach kuom ogendini mang’eny, gi pinje mang’eny, kod joma wacho dhok mang’eny, kod ruodhi mang’eny.”