Read luo Fweny 12 Bible Online

Fweny 12 - luo bible

Fweny 12

¹Bang’ mano, ranyisi malich ne onenore e kor polo. Ne en dhako morwakore gi wang’chieng’. Due ne nie bwo tiende, to wiye nosidh e osimb sulue apar gariyo.

²Ne en gi ich, kendo noywak ka muoch kaye, ka en gi rem mar nywol.

³ Eka ranyisi machielo bende ne onenore e polo. Ne en thuol mang’ongo, makwar kendo malich, man gi wiye abiriyo kod tunge apar, kendo ma osimbo abiriyo osidhi e wiyego.

⁴ Iwe noywayo achiel kuom adek mar sulue mae polo mi owito e piny. Thuol malichno nochung’ e nyim dhako mane dwaro nywolno mondo ocham nyathine kosenywolo.

⁵ Dhakono nonywolo nyathi mawuowi, mabiro rito ogendini gi ludh nyinyo. To nyathineno ne oyudhi moter malo ir Nyasaye e kom duong’ mar Nyasaye.

⁶Dhakono to noringo modhi e thim kuma ne Nyasaye oikonee kar bet, mondo oritee ka imiye chiemo kuom ndalo alufu gi mia ariyo kod piero auchiel.

⁷ Eka lweny nowuok e polo. Mikael gi malaikane nokedo gi thuol malichno. Thuol gi malaikane bende nokedo kodgi,

⁸to ne ologi, mi kargi ne ok ochako obetie e polo kata matin.

⁹ Thuol maduong’no ne owit mwalo e piny kaachiel gi malaikane duto. En e thuol mang’ongo machon miluongo ni Jachien kata Satan, mane owuondo piny ngima.

¹⁰ Eka ne awinjo dwol maduong moa e polo, kawacho niya, “Koro Nyasachwa oselocho. En kinde mar tekone gi lochne kaachiel gi mar Mesia mare, ma bende oyudo lochne. Oselo jadonj ni owetewa, madonjonigi e nyim Nyasaye odiechieng’ gotieno, mi owite e piny.

¹¹Owetewa ne oloye gi remb Nyarombo kendo gi Wach Nyasaye mane gihulo, bende ne ok gidewo ngimagi nyaka kar tho.

¹²Omiyo, polo kod joma odakie mondo obed mamor! To mano kaka nobednu malit un piny gi nam, nimar Satan oselor obiro iru ka nigi mirima mager nikech ong’eyo ni odongne mana ndalo matin kende.”

¹³To kane thuol malichno oneno ni osewite e piny, ne olawo dhako mane osenywolo nyathi ma wuowi cha.

¹⁴ To ne omi dhakono buom ariyo mag ongo maduong’ mondo ohugo ochop kare e thim, kuma ne idhi ritee kimiye chiemo kuom higni adek gi nus, ka en mabor gi thuol.

¹⁵To thuol nong’ogo pi moa e dhoge mondo oyuogo dhakono, mi pigno nomol bang’ dhakono mana ka aora.

¹⁶To piny noyawo dhoge, momwonyo pi mane thuol ong’ogono, mi okonyo dhakono.

¹⁷Kuom mano, thuol nokecho gi dhakono, mi odhi mondo oked gi nyithind dhakono modong’, marito chik Nyasaye, kendo mahulo ni giyie kuome,

¹⁸kendo ne ochung’ e kuoyo manie dhonam.