Read luo Fweny 16 Bible Online

Fweny 16 - luo bible

Fweny 16

¹Bang’e ne awinjo dwol maduong’ moa e Hekalu kawacho ni malaika abiriyogo niya, “Dhiuru uol tewni abiriyo mag mirimb Nyasaye e piny.”

² Kuom mano, malaika mokwongo nodhi moolo tape e piny, mi adhonde maricho kendo malit nomako joma ne nigi alama mar Ondiek, kendo mane lamo gima ket kode.

³Eka malaika mar ariyo noolo tape e nam, mi pi nam nolokore remo machalo remb ng’at motho, kendo gik mangima duto mae nam notho.

⁴ Kamano bende malaika mar adek noolo tape e aore gi sokni, mi pigegi nolokore remo.

⁵Eka ne awinjo malaika man gi teko kuom pige kawacho niya, “A Ng’ama Ler, mantie kendo mane nitie! Bura miseng’ado ni, iseng’ado e yo makare,

⁶nikech joma nochuero remb jo-Nyasaye kod jonabi isemiyo remo mondo omadhi!”

⁷Eka ne awinjo kendo-mar-misango kawacho niya, “Adier, in Ruoth Nyasaye Manyalo Gik Moko Duto, ing’ado bura madieri kendo makare!”

⁸Bang’ mano, malaika mar ang’wen noolo tape e wang’chieng’, mi wang’ chieng’ nomi teko mar wang’o ji ka mach.

⁹Omiyo ji nowang’ malit ahinya, to kata kamano ne giyanyo ayanya nying Nyasaye man gi teko mar kelo masichego, kendo ne gitamore loko chunygi mondo gimiye duong’.

¹⁰ Eka malaika mar abich noolo tape e kom duong’ mar Ondiek malichno, mi piny Ondiek notimo mudho! Ji nokayo lewgi nikech rem malit mane gin-go,

¹¹to ne giyanyo ayanya Nyasach polo nikech rem kod adhonde ma gi-go, to kendo ne ok gilokore giweyo timbegigo.

¹² Bang’e malaika mar auchiel noolo tape e aora maduong’ mar Yufrate, mi pige nodwono mondo yo olosre ni ruodhi mane biro a yo wuokchieng’.

¹³Bang’ mano naneno chuny adek mochido machalo gi ogwende, kawuok e dho Thuol malich, kendo e dho Ondiek, kendo e dho Janabi mar Miriambo.

¹⁴Chunygo gin jochiende, kendo gin gi teko mar timo honni. Gidhi ir ruodhi duto mag piny ngima mondo gichokgi ni lweny manobedie Chieng’ Maduong’ mar Nyasaye Manyalo gik Moko Duto.

¹⁵ (Neuru! Abiro ka jakuo! Ng’at ma neno, kendo ma orwako lepe mondo wiye kik kuodi kowuotho duk, en jahawi!)

¹⁶ Chunygo nochoko ruodhigo kama iluongo gi dho Hibrania ni Harmagedon.

¹⁷Malaika mar abiriyo noolo tape e kor yamo, mi dwol maduong’ nowuok e kom duong’ manie Hekalu kawacho niya, “Osetimore!”

¹⁸ Bang’ mano, ne nitie mil polo makakni, gi dwol moko, kod mor polo. Piny bende noyiengni matek mapok oyiengnie kamano nyaka a chuech dhano. Adier, ne en yiengni piny marachie moloyo!

¹⁹ Dala maduong’ nobarore didek, kendo mich ogendini duto mae piny nomukore. Nyasaye noparo Babulon dala maduong’, mi ne omiyo omadho kikombe mar divai mar mirimbe mager!

²⁰ Chulni duto nolal nono kaachiel gi gode duto.

²¹ Kite mag pe madongongo, ma achiel pekne dirom kilo piero abich, noa e polo mogoyo ji, mi ne giyanyo Nyasaye nikech masich peno, nimar ne en masira marach ahinya!