Read luo Fweny 19 Bible Online

Fweny 19 - luo bible

Fweny 19

¹Bang’ wechego nawinjo gima chalo gi koko maduong’ mar oganda mang’ongo e polo kawacho niya, “Opak Nyasaye! Warruok gi duong’ maler kod teko gin mag Nyasachwa,

² nikech pile ong’ado bura e yo ma adier kendo makare. Nong’ado bura ni jachode maduong’ mane oketho piny gi terruokne. Adier, Nyasaye osekume nikech nonego jotich Nyasaye.”

³ Eka ne gichako gikok kendo niya, “Opak Nyasaye! Iro mar dala maduong’ mawang’no nodum nyaka chieng’!”

⁴To jodongo piero ariyo gang’wen gi gik mangima ang’wen kande, nopodho piny mi olamo Nyasaye mobet e kom duong’, kawacho ni, “Ber mondo obed kamano! Opak Nyasaye!”

⁵ Bang’ mano, duol moro noa e kom duong’ kawacho niya, “Pakuru Nyasachwa un jotichne duto madongo gi matindo ma oluore!”

⁶ Bang’e ne achako awinjo gima chalo gi koko oganda mang’ongo, kendo machalo gi pige mang’eny kawuo, bende machalo gi polo mamor matek, kawacho niya, “Opak Nyasaye! Ruoth Nyasachwa Manyalo Gik Moko Duto osekawo lochne.

⁷Wabeduru mamor ahinya, kendo wamiyeuru duong’ nikech kinde mar kend mar Nyarombo osechopo. Chiege oseikore,

⁸kendo Nyasaye oseyiene mondo orwakre gi nanga maber mapichni kendo maler.” (Nanga maberno ochung’ kar tim makare mar jo-Nyasaye)

⁹ Eka malaikano nowachona ni, “Ndik niya, ‘Joma oluongi e kisera mar Nyarombo gin johawi.’ ” Eka nomedo wachona niya, “Mano e wach mar adier mar Nyasaye.”

¹⁰Ne apodho piny e tiende mondo olame, to nokwera ni, “Ngang’! Kik itim kamano! An mana jatich wadu matiyo kodi kaachiel gi oweteni mamoko. Wan duto wahulo wach man kuom Yesu. Nyasaye kende ema mondo ilam. Adiera ma Yesu kelo ema miyo jonabi koro wach.”

¹¹ Eka ne aneno polo ka oyawore, kendo ne aneno faras marachar ka ni kanyo, to Jal mane oidhe iluongo ni Ng’ama Igeno, kendo Jaadiera. Iluonge kamano nikech ong’ado bura kare, kendo okedo e yo makare.

¹² Wengene liel ka ligek mach, kendo osidhne osimbo mang’eny e wiye. En gi nying mondik kuome, ma onge ng’ama ong’eyo, to mak mana en owuon,

¹³kendo orwakore gi law moling’ore e remo. Iluonge ni Wach Nyasaye.

¹⁴Ogend lweny mag polo ne luwo bang’e koidho farese marachere, kendo korwakore gi lewni mabeyo kendo maler.

¹⁵ To ligangla mabith wuok e dhoge kendo ochwowogo ogendini. Obiro ritogi gi ludh nyinyo, kendo obiro ng’adonigi bura gi mirimb Nyasaye Manyalo Gik Moko Duto.

¹⁶En gi nying moro mondiki e lawe kendo eme ni, “Ruodh ruodhi, kendo Jaduong’ jodongo.”

¹⁷ Eka ne ang’iyo wang’chieng’ mi aneno malaika moro kochung’ kuno. Ne okok matek ni winy duto mane huyo e kor polo niya, “Chokreuru ubi e sawo maduong’ mar Nyasaye,

¹⁸mondo ucham ring ruodhi, gi ring jodong lweny, gi ring joma rateke, kod ring farese gi joma idhogi, kaachiel gi ring ji duto, joma ni thuolo gi wasumbini, joma tindo gi joma dongo.”

¹⁹Eka naneno Ondiek malichno gi ruodhi mag piny kod ogendni mag lweny kochokore mondo oked gi Jal moidho faras gi ogandane mar lweny.

²⁰ To ne olo Ondiek, mi omaki kaachiel gi Janabi mar Miriambo, mane osebedo katimo honni e nyime. Honnigo ema ne osewuondogo joma ne oketnigi alama mar Ondiek, kendo mane lamo gima ket gi Ondiegno. Ondiek gi Janabi ne owit kangima e ataro mar ligek mach.

²¹To joma odong’ ne oneg gi ligangla mane wuok e dho Jal moidho faras, kendo ringgi noyieng’o winy duto.