Read luo Fweny 21 Bible Online

Fweny 21 - luo bible

Fweny 21

¹ Bang’ mano, naneno polo manyien gi piny manyien. Polo mokwongo gi piny mokwongo noserumo, kendo nam bende noselal nono.

² Eka ne aneno Dala Maler, ma en Jerusalem manyien, kalor piny a e polo kuom Nyasaye, koikore ka miaha moikore ni chwore.

³ Ne awinjo dwol maduong’ moa e kom maduong’ kawacho niya, “Koro Nyasaye osebiro dak gi ji! Obiro dak kodgi kendo ginibed joge. Nyasaye owuon biro bet kodgi, mi obed Nyasachgi.

⁴ Enoywe pi wang’gi duto, kendo tho kata ywak kata nduru kata rem ok nochak obedie nikech gik machon noserumo.”

⁵Eka Jal mane obet e kom duong’ nowacho niya, “Neuru! Aloso gik moko duto bedo manyien!” Bende nokona ni, “Ndik wachno, nikech wechegi gin weche migeno kendo ma adiera.”

⁶ Bang’ mano nowachona niya, “Gik moko duto osetimore! An e Alfa gi Omega, tiende ni Chakruok gi Giko. Ng’at ma riyo oloyo anami pi soko mar ngima nono, ma ok ochulo gimoro.

⁷ Ng’at molocho noyud gigo, kendo anabed Nyasache, to enobed wuoda.

⁸To ngoche, gi joma ok oyie, kod jomriambo duto, kargi nobed mana ataro maliel gi ligek mach, ma en tho mar ariyo!”

⁹Eka achiel kuom malaika abiriyo mane nigi tewni moting’o masiche mogik abiriyo, nobiro ira, mowuoyo koda. Nowachona niya, “Bi mondo anyisi Miaha, ma en chi Nyarombo.”

¹⁰ Eka malaikano notera malo ewi got maduong’ kendo mabor, ka an ei Roho, mi onyisa Jerusalem, Dala Maler, kalor piny a e polo kuom Nyasaye,

¹¹ka nigi duong’ maler duto mar Nyasaye. Lerne ne rieny ka kidi ma nengone tek, kaka jasper maler ahinya.

¹² Ne en gi ohinga maduong’ kendo mabor man gi dhorangeye apar gariyo, ma malaika apar gariyo rito. To nying dhoudi apar gariyo mag nyithind Israel nondiki e dhorangeyego.

¹³Dhorangeye adek ne ni yo wuokchieng’, kendo adek yo nyandwat, to adek mamoko yo milambo, kendo adek yo podho chieng’.

¹⁴To ohinga mar dalano ne nigi kite mag mise apar gariyo ma ondikie nying joote apar gariyo mag Nyasaye.

¹⁵ Malaika mane wuoyo kodano, ne nigi luth mar rapim molos gi dhahabu mopimogo dalano gi dhorangeyene kod ohingane.

¹⁶Bor gi lach mar dalano romre koni gi koni. Malaikano nopime gi ludhno, mi oyudo ni oromo kilomita alufu ariyo. Borne gi lachne kod borne modhi malo ne romre duto.

¹⁷Eka nopimo ohingane, mi oyudo ni oromo bede mia achiel gi piero ang’wen, kipimo gi bat mar dhano, ma en rapim mane malaika otiyogo.

¹⁸ Kor ohinga noger ji jasper, to dala hie ne dhahabu lilo marieny ka rang’i maler.

¹⁹Mise mar ohinga mar dala, nolos gi kite ma nengogi tek mopogore opogore. Kidi mokwongo mar mise ne jasper, to mar ariyo ne safir, to mar adek ne kalkedo, to mar ang’wen ne zumaridi,

²⁰to mar abich ne sardonikso, to mar auchiel ne sardius, to mar abiriyo ne krusolith, to mar aboro ne berul, to mar ochiko ne topaz, to mar apar ne krusopraso, to mar apar gachiel ne huakintho, to mar apar gariyo ne amethuso.

²¹Dhorangeye apar gariyogo to ne kite apar gariyo ma nengogi tek, miluongo ni lulu, kendo dhorangach ka dhorangach nolos gi lulu achiel achiel. Yor dalano ne dhahabu lilo marieny ka rang’i.

²²Ne ok aneno Hekalu e dalano, nimar Ruoth Nyasaye Manyalo Gik Moko Duto kod Nyarombo ema obedo Hekalu mare.

²³ Dalano ok dwar chieng’ kata due marieny kuome, nikech duong’ maler mar Nyasaye ema miye ler, kendo Nyarombo e tache.

²⁴ Ogendini mag piny nowuoth e lerne, kendo ruodhi mag piny nokel duong’gi e iye.

²⁵ Dhorangeyene ok nolor godiechieng’, to gotieno bende nobed maonge kuno.

²⁶Duong’ gi mwandu mag ogendini nokel e iye.

²⁷ To gimoro amora ma ok ler, kata ng’at matimo gik mamono, kata mariambo, ok nodonjie ngang’ to mak mana jogo ma nyinggi ondiki e kitap Nyarombo mar ngima.