Read luo Fweny 7 Bible Online

Fweny 7 - luo bible

Fweny 7

¹ Bang’ wechego ne aneno malaika ang’wen kochung’ e tunge ang’wen mag piny. Ne gimako yembe ang’wen mag piny, mondo yamo kik kudhi e piny, kata e nam, kaka kuom yath moro.

²Eka ne aneno malaika machielo kawuok yo wuok chieng’, koting’o gima igoyogo alama mar Nyasaye mangima. Nokok matek ni malaika ang’wen mane osemi teko mondo ohiny piny kod nam,

³ kokwerogi niya, “Kik uhiny piny, kata nam, kata yien, nyaka chop waket kido e lela wang’ jotich Nyasachwa.”

⁴Bang’ mano, ne awinjo kar romb joma ne oketnigi kidono. Ne giromo ji alufu mia achiel gi piero ang’wen gang’wen, (144,000) mowuok e dhout jo-Israel duto.

⁵E dhood Juda ji mane oket kido kuomgi ne alufu apar gariyo. E dhood Reuben ji alufu apar gariyo. E dhood Gad ji alufu apar gariyo

⁶E dhood Asher ji alufu apar gariyo. E dhood Naftali ji alufu apar gariyo. E dhood Manase ji alufu apar gariyo.

⁷E dhood Simeon ji alufu apar gariyo. E dhood Lawi ji alufu apar gariyo. E dhood Isakar ji alufu apar gariyo.

⁸E dhood Zebulun ji alufu apar gariyo. E dhood Josef ji alufu apar gariyo. E dhood Benjamin ji alufu apar gariyo.

⁹Bang’ mano, ne ang’icho mi aneno ji mang’eny mokadho akwana moa e pinje duto gi dhoudi duto kod ogendini duto. Ne gichung’ e nyim kom duong’, kendo e nyim Nyarombo, ka girwakore gi lewni marachere, kendo giting’o othidhe e lwetgi.

¹⁰Ne gikok matek niya, “Warruok oa kuom Nyasachwa mobet e kom duong’ kendo oa kuom Nyarombo.”

¹¹Eka malaika duto nochung’ koluoro kom duong’ gi jodongo kod gik mangima ang’wen-go, mi okulore piny nyaka e lowo e nyim kom duong’, mi gilamo Nyasaye,

¹²ka giwacho niya, “Amin! Pak gi duong’ gi rieko gi erokamano gi pwoch gi teko kod nyalo obed ni Nyasachwa nyaka chieng’! Amin!”

¹³Eka achiel kuom jodongo nopenja niya, “Joma orwako lewni maracheregi gin ng’a gini, to gia kune?”

¹⁴ To ne adwoke ni, “Jaduong’, in ema ing’eyo.” Eka ne owachona niya, “Magi e joma oseneno Sand Maduong’. Giselwoko lepgi e remb Nyarombo, mi gimiyo odoko marachere.

¹⁵Mano emomiyo gin e nyim kom duong’ mar Nyasaye, ka gilame odiechieng’ gotieno e Hekalune, kendo Jal mobet e kom duong’ biro dak kodgi.

¹⁶ Kech ok nochak okagi, kendo riyo ok nochak ologi, bende liet mar wang’chieng’ ok nowang’gi,

¹⁷ nikech Nyarombo manie dier kom duong’ tir nobed jakwadhgi. Notelnigi e sokni mag pi ngima, kendo Nyasaye noywe pi wang’gi duto.”