Read luo Fweny 8 Bible Online

Fweny 8 - luo bible

Fweny 8

¹Kane Nyarombo oketho kido marabiriyo, to polo noling’ thi kuom kinde ma dirom nus sa.

²Eka ne aneno malaika abiriyo mochung’ e nyim Nyasaye, kendo ne omigi tunge abiriyo.

³ Eka malaika moro nobiro mochung’ e nyim kendo-mar-misango, ka en gi tap ubani mar dhahabu. Ne omiye ubani mathoth mondo ochiw gi lemo mar jo-Nyasaye duto e kendo-mar-misango mar dhahabu mane ni e nyim kom duong’.

⁴Iro mar ubani manie lwet malaikano nodum malo e nyim Nyasaye kaachiel gi lemo mag jo-Nyasaye.

⁵ Malaika nokawo tap ubani mi ogangoe mach mane okawo kuom kendo-mar-misango, bang’e nobolo majno piny. Bang’ mano, polo nomor kariadore matek, kendo duol moko nowinjore, bende polo nomil, kendo piny noyiengni.

⁶Eka malaika abiriyo man gi tunge abiriyogo ne oikore mondo ogo tungego.

⁷ Malaika mokwongo nogoyo tung’ne, mi pe kod mach mokikore gi remo obiro, mi opuk e piny, mi bath piny moromo achiel kuom adek nowang’ kendo achiel kuom adek mar yien bende nowang’. Lum mang’ich duto bende nowang’.

⁸Bang’e malaika mar ariyo nogoyo tung’ne, mi gima chalo gi got maduong’ maliel ka mach nowiti e nam, mi bath nam moromo achiel kuom adek nolokore remo,

⁹kendo achiel kuom adek mar gik mangima manie nam notho, bende achiel kuom adek mar yiedhi manie nam nokethore.

¹⁰ Eka malaika mar adek nogoyo tung’ne, mi sulue maduong maliel ka meny nolwar oa e polo. Ne olwar kuom achiel mar adek mar aore duto, kendo kuom sokni duto.

¹¹ Nying sulueno en ‘Gima kech’. Bath pi moromo achiel kuom adek nolokore makech, mi ji mang’eny otho nikech pigego nolokore makech.

¹² Bang’e malaika mar ang’wen nogoyo tung’ne, mi achiel kuom adek mar wang’chieng’, gi achiel kuom adek mar due kod achiel kuom adek mar odiechieng’ kod otieno, notimo mudho.

¹³Eka nang’icho mi awinjo ongo ka huyo e kor polo kaywak matek niya, “Lit! Lit! Mano kaka unune malit, un joma odak e piny, nikech tunge modong’ ma malaika adek biro goyo!”