Read luo Fweny 9 Bible Online

Fweny 9 - luo bible

Fweny 9

¹Eka malaika mar abich nogoyo tung’ne, mi aneno sulue moro mane oselwar e piny koa e polo. Sulueno ne omi rayaw mar Bur Matut Maonge Gikone.

² Ne oyawo burno, mi iro owuoke machalo gi ich mach maduong’, mi wang’chieng gi kor polo otimo mudho nikech iro mane owuok e burno.

³ Bonyo nowuok e irono mopiyo e piny, kendo ne omigi teko machalo gi teko ma thomoni mae piny nigo.

⁴ To nokwergi ni kik giketh lum manie piny, kata gimoro mang’ich, kata yath moro, to giketh mana jogo maonge gi alama mar Nyasaye e lela wengegi.

⁵Ne omi bonyogo thuolo mar sando jogo kuom dueye abich, to ne ok oyienigi mondo gineggi. Rem mane jogo nigo ne chalo gi rem maramo ng’at ma thomoni okayo.

⁶ E ndalo ma gigo notimre ji nodwar tho, to ok ginitho ngang’! Adier, ginigomb tho ahinya, to tho noringgi aringa!

⁷ Bonyogo ne chalo gi farese moikore ni lweny. E wigi ne nitie gik machalo gi osimbo mag dhahabu. Wang’gi to ne chalo gi wang’ dhano.

⁸ Ne gin gi yie wich machalo gi yie wi mon, to lekegi ne chalo gi leke sibuoche.

⁹ Ne girwako gilweny mag akor machalo gi akor mag nyinyo, kendo bwombegi ne wuo mana kaka geche lweny wuo ma farese mang’eny ywayo ka ringo dhi e lweny.

¹⁰Iwgi ne chalo gi iw thomoni, kendo iwgigo ema ne gikayogo ji, kendo ng’at ma gikayo ne bedo gi rem kuom dueye abich.

¹¹Ruodhigo to ne malaika mar Bur Matut Maonge Gikone. Nyinge ne iluongo gi dho Hibrania ni Abadon, to gi dho Grik ni Apoluon, tiende ni Jaketh.

¹²Masira mokwongo koro osekadho, to masiche ariyo mamoko pod biro.

¹³ Bang’ mano, malaika mar auchiel nogoyo tung’ne, mi awinjo dwol moro moa e tunge ang’wen mag kendo-mar-misango mar dhahabu manie nyim Nyasaye.

¹⁴Dwolno nowacho ni malaika mar auchiel man gi tung’ niya, “Gony malaika ang’wen motue e aora maduong’ mar Yufrate.”

¹⁵Omiyo ne ogony malaika ang’wen mane oseiki ni sano gi odiechieng’no gi dueno kod higano, mondo oneg achiel kuom adek mar ji duto.

¹⁶Ne onyisa ni kar romb jolweny mane oidho farese ne oromo tara mia ariyo.

¹⁷To farese mane aneno e fwenyno ne chalo kama: Joma ne oidhogi ne orwakore gi gilweny mag akor mag nyinyo makwar ka mach, kendo mambulu, kod ma onuria. Wi faresego to ne chalo gi wi sibuoche, kendo mach gi iro kod pilni mach ne wuok e dhogi.

¹⁸Masiche adekgo, ma gin mach gi iro kod pilni mach mane wuok e dho faresego nonego achiel kuom adek mar ji duto,

¹⁹nimar teko mane faresergo nigo ne nie dhogi kendo e wigi. Iwgi, mane nigi wigi, ne chalo gi thuonde, kendo iwgigo ema ne gihinyogo ji.

²⁰ To joma odong’ mane masichego ok onego, pod ne ok oloko chunygi oa kuom gik mane giseloso gi lwetgi, to ne gimedo mana lamo jochiende gi nyiseche manono molos gi dhahabu gi fedha gi mula gi kidi kod bao, ma gin gik ma ok nyal neno, kata winjo wach, kata wuotho.

²¹Bende ne ok giloko chunygi giweyo nek, kata timbe juok, kata terruok, kata kuo, mane gisebedo ka gitimo.