Read luo Ruth 1 Bible Online

Ruth 1 - luo bible

Ruth 1

¹E ndalo mane jobura rito piny Israel kech nowuok, mi ng’at moro ma ja-Bethlehem-Juda nodhi gi chiege kod yawuote ariyo mondo odag e piny Moab.

²Nying ng’atno ne Elimelek, kendo nying chiege ne Naomi, to nying yawuote ne Malon kod Kilion. Ne gin jo-Efratha man Bethlehem-Juda. Ne gichopo e piny Moab mi gidak kuno.

³To Elimelek chwor Naomi notho, moweye gi yawuote ariyo.

⁴Yawuotego nokendo nyi Moab, ma nyinggi Orpa gi Ruth. Ne gidak kuno kuom higni ma dirom apar.

⁵Bang’e Malon gi Kilion ne jotho, mi Naomi nodong’ maonge yawuote gi chwore.

⁶Kane Naomi pod ni e piny Moab, nowinjo kaka Ruoth Nyasaye oseparo joge, momiyo chiemo. Omiyo nochako wuoth gi mond yawuote mondo oa kuno, odog thurgi.

⁷Kamano nowuok oa kuma ne entieno, kaachiel gi mond yawuote, mi gimako yo ma dok e piny Juda.

⁸To nowachonigi niya, “Ng’ato ka ng’ato kuomu mondo odog thurgi, kendo Ruoth Nyasaye mondo otimnu maber, mana kaka nutimona maber gi joga motho.

⁹Ruoth Nyasaye mondo oguedhu, kendo ng’ato ka ng’ato obed mamor e ode kokende.” To kane ogoyonigi oriti, ne gichako ywak matek,

¹⁰mi giwachone niya, “Ok kamano, to nyaka wadhi kodi ir jou.”

¹¹To Naomi nowachonigi niya, “Doguru nyiga. Ang’o ma dimi udhi koda? Bende pod danywol yawuowi ma dibed chwou?

¹²Doguru nyiga nikech tinde ati, ok danyal bedo gi dichwo kendo. Ka da anyalo wacho ni ageno bedo gi dichwo gotienoni, kendo nywolo yawuowi,

¹³bende da uyie rito nyaka gidok madongo? Duritru mak okendu? Ooyo nyiga, an ema anie chandruok moloyo un, nimar Ruoth Nyasaye osekuma.”

¹⁴Kane giwinjo kamano, ne gimedo ywak matek. Orpa nonyodho wuon odgi, moweye; Ruth to notuere kuome.

¹⁵Naomi nowacho ni Ruth niya, “Ne! Nyieki osedok thuru, kendo osedok ir nyisechegi. Dog iluw bang’e.”

¹⁶To Ruth nodwoke niya, “Kik ichuna ni mondo apogra kodi, mi adog mak aluwi, nikech kuma idhiye ema nadhiye, kendo kama idakie ema nadagie. Jou nobed jowa, kendo Nyasachu nobed Nyasacha.

¹⁷Kama nithoe ema nathoe, kendo kanyo ema noyikae. Ruoth Nyasaye mondo okweda ka wach moro opoga kodi, kata da obed mana tho.”

¹⁸Kane Naomi oneno kaka Ruth oketo chunye mar dhi kode, noling’.

¹⁹Mon ariyogo nowuotho kanyakla nyaka Bethlehem. To kane gichopo kuno, dala duto nobwok, mi mond dalano nopenjore niya, “Ma bende Naomi adier?”

²⁰To Naomi nowachonigi niya, “Kik uluonga ni Naomi, tiende ni Ng’ama Mor, to luongauru ni Malit, nikech Ng’ama Nyalo Gik Moko Duto osetimona malit ahinya.

²¹Nene aa ka, ka ang’eny gi mwandu, to Ruoth Nyasaye oduoga nono. Uluonga ni Naomi nang’o, ka Ruoth Nyasaye ma Ng’ama Nyalo Gik Moko Duto, osekuma malit kama?”

²²Kamano e kaka Naomi noduogo koa e piny Moab gi chi wuode ma nyar Moab. Ne gichopo Bethlehem e ndalo michako kayoe shairi.