Read luo Ruth 2 Bible Online

Ruth 2 - luo bible

Ruth 2

¹Naomi ne nigi watne moro ma nyinge Boaz, ja dhoodgi Elimelek. Ne en ng’at ma rahuma, kendo ma japith.

² Chieng’ moro Ruth nyar Moab nowacho ni Naomi niya, “Yiena adhi mondo ahul cham bang’ ng’ato ang’ata moyie kecha.” Nodwoke niya, “Dhiyo, nyara.”

³Omiyo nowuok modhi hulo cham e puodho bang’ jokeyo, kendo nopo kochopo e puoth Boaz, jadhoodgi Elimelek.

⁴To bang’e Boaz nobiro e puothe, koa Bethlehem, momoso jokeyo niya, “Ruoth Nyasaye obed kodu!” Ne gidwoke ni, “Ruoth Nyasaye oguedhi!”

⁵Eka Boaz nopenjo jatichne mane rito jokeyo ni, “Mano nyar ng’a?”

⁶Jatichneno nodwoke niya, “En nyar Moab, ma nobiro gi Naomi, koa e piny Moab cha.

⁷Nokwaya ni mondo ayiene ohul cham bang’ jokeyo e kind pidhe mosetue. Osebedo kotiyo ka chakre okinyi nyaka sani, ma ok oyue kata matin.”

⁸Boaz nowacho ni Ruth niya, “Nyara winji. Kik idhi ihul e puoth ng’ato, bende kik ia ka, to bed mana kod jotichna ma nyiri.

⁹Ket wang’i mana e puodho ma gikeyoeni, kendo ihul bang’gi. Asekwero yawuowi ni kik gimuli. Kendo ka riyo oloyi, to dhi kar dapige, imodh pi ma jotich oumbo.”

¹⁰Ruth nogoyo chonge piny, mokulore nyaka e lowo, kowachone niya, “Ang’o momiyo ipara, mikecha kama, to an wendo awenda?”

¹¹Boaz nodwoke niya, “Osenyisa malong’o gik moko duto misetimo ni wuon odu nyaka ne chwori tho, kendo kaka niweyo wuoru gi meru kod piny ma nonywolie, mibiro ir ji mane ok ing’eyo.

¹²Ruoth Nyasaye mondo ochuli kuom tichni, kendo iyud pok makare moa kuom Ruoth Nyasaye ma Nyasach Israel, ma nibiro e bwo tipone mondo iyud kar konyruok.”

¹³Eka Ruth nowachone niya, “Itimona maber, ruoth, nikech ihoyo chunya, kendo iwuoyo koda maber, kata obedo ni ok an achiel kuom jotichni kamano.”

¹⁴Kane sa chiemo ochopo, Boaz nowacho ni Ruth niya, “Bi ka, ichiem.” Omiyo nobet piny but jokeyo. Boaz nomiye shairi molodi, mi nochamo moyieng’ nyaka moko nodong’.

¹⁵Ka nowuok mondo odhi ohul cham, Boaz nogolo chik ni jotichne niya, “Weyeuru mondo ohul kata mana e kind tuche, kik ukwere.

¹⁶Bende ugol moko kuom mago mosechoki, uwene mondo ohul, kik utame.”

¹⁷Kamano nohulo e puodho nyaka chieng’ opodho. Eka nodino shairi mosehulo, moromo depe ariyo.

¹⁸Noting’o chamgo motero dala, kendo nonyiso wuon odgi kar rombgi. Bende nogolone chiemo ma nochamo odong’, momiye.

¹⁹Wuon odgi nopenje niya, “Nihulo kanye kawuono? Nitiyo kune? Oguedh jalo mane opari!” Mi Ruth nonyise ni notiyo ka ng’at ma nyinge Boaz.

²⁰ Naomi nowachone niya, “Ruoth Nyasaye, osetimonwa ng’wono kod jowa motho, mondo oguedh jalo.” Eka nomedo wacho niya, “Jalo en watwa mahie.”

²¹Ruth nowachone ni, “Bende nokona ni mondo ati but jotichne nyaka chieng’ ma gitieko keyone duto.”

²²Naomi nowachone niya, “En adier nyara, ber iluwri gi jotichne manyiri, nikech dipo kiyudo chandruok e puoth ng’ato.”

²³Omiyo Ruth nobedo ka tiyo but jotich Boaz manyiri, nyaka giko keyo mar shairi, gi mar ngano bende, kodak gi wuon odgi.