Read luo 1 Samuel 12 Bible Online

1 Samuel 12 - luo bible

1 Samuel 12

¹Samuel nowacho ni jo-Israel duto niya, “Uneno kaka asewinjo gik moko duto mane ukwaya, mi aseketonu ruoth.

²Koro Ruoth e jatendu. An to aseti, mi lwar omaka, kendo yawuota bende ni kodu. To asebet jatendu, chakre tinna nyaka kawuono.

³Era e. Koro donjnauru e nyim Ruoth Nyasaye, kendo e nyim ruoth moseyiero mowir. Rwadh ng’a, kata kanj ng’a masekawo? Ere ng’a ma asemayo gire? Koso ere ng’ama asethiro? Kata en ng’a ma asekawo asoya kuome, madinogo wang’a? Ng’eng’auru, mondo adwoknugo.”

⁴To ne gidwoke ni, “Pok imayowa gimoro, kata thirowa pok ithirowa, bende pok ikawo gimoro kuom ng’ato.”

⁵Samuel nowachonigi niya, “Tinende ruoth Nyasaye obedo janeno kuomu, kendo Ruoth moseyiero bende obedo janeno, ni pok amulo gimoro.” Mi ne gidwoke ni, “Ee, obedo janeno.”

⁶ Eka Samuel nowacho ni ji niya, “Adier, Ruoth Nyasaye mane omiyou Musa gi Harun, kendo mane ogolo kwereu e piny Misri, ema obedo janeno.

⁷Emomiyo chung’uru mos, mondo awuo kodu e nyim Ruoth Nyasaye, ka aparonu timbe makare duto mane Ruoth Nyasaye otimonu, kendo otimo ni kwereu.

⁸ Kane Jakobo gi yawuote osedhi Misri, jo-Misri koro ne sando nyikwagi ma kwereu. Omiyo ne giywak ni Ruoth Nyasaye, mi Ruoth Nyasaye nooro Musa gi Harun mogologi, kendo omiyogi kama wadakieni.

⁹ To wigi nowil gi Ruoth Nyasaye ma Nyasachgi, omiyo nojwang’ogi e lwet Sisera, jaduong’ jolweny ma Jabin ruodh Hazor, kendo e lwet jo-Filistia, kendo e lwet ruodh Moab, mi nyaka ne gikedo kodgi.

¹⁰ Ne giywak ni Ruoth Nyasaye ka giwacho niya, ‘Waseketho, nikech waseweyi, kendo waselamo Baal gi Ashtaroth, to koro mondo ireswa e lwet wasikwa, kendo wanatini.’

¹¹ Omiyo Ruoth Nyasaye nooro Jerubaal, Barak gi Jeftha, kod Samson, kendo noresou e lwet wasiku koni gi koni, mi nubedo gi kue.

¹² “Ne ung’eyo ni Ruoth Nyasaye e ruodhu, to kata kamano, kane uneno ni Nahash ruodh jo-Amon omonjou, nuwachona niya, ‘Nyaka wabed gi ruoth maritowa.’

¹³Emomiyo koro neuru ruoth museyiero, kendo ma nukwayo, nimar Ruoth Nyasaye osetimonu mana gima nukwaye.

¹⁴Ka unuluor Ruoth Nyasaye, mi utine, kendo uwinj dwonde, ma ok udagi chikene, kendo ka un kaachiel gi ruodhu unuluw Ruoth Nyasaye ma Nyasachu, to mano nokonyu

¹⁵To ka utamoru winjo dwond Ruoth Nyasaye, kendo udagi chikene, to nosandu kaachiel gi ruodhu.

¹⁶“Emomiyo koro ling’uru, une gima duong’ ma Ruoth Nyasaye biro timo e nyimu.

¹⁷Donge en ndalo kwayo Ruoth Nyasaye mondo omi polo omor, kendo koth ochue, mi ubiro neno kendo ng’eyo kaka nuketho ahinya kuom kwayo mondo ubed gi ruoth maritou.”

¹⁸Kamano Samuel nokwayo Ruoth Nyasaye, mi Ruoth Nyasaye nomiyo polo omor, kendo koth ochue, chieng’no. Omiyo ji duto noluoro Ruoth Nyasaye ahinya, kod Samuel bende.

¹⁹Ji duto nowacho ni Samuel niya, “Kwanua Ruoth Nyasaye ma Nyasachi mondo kik watho, kane wakwayo mondo wabed gi ruoth, to ne wamedo mana richo ewi moko.”

²⁰Samuel nodwokogi ni, “Kik uluor. En adier ni usetimo richogo duto, to kata kamano meduru mana luwo Ruoth Nyasaye, kendo tineuru gi chunyu duto.

²¹Weuru lamo nyiseche manono, ma ok nyal konyo, kata ma ok nyal reso gimoro, nikech gin mana gik manono.

²²Ruoth Nyasaye ok nojwang’ joge nikech dipo ka nyinge maduong’ okethore, nimar oseyierou mondo ubed joge owuon.

²³To an bende, asingora ni ok naketh e nyim Ruoth Nyasaye, kaweyo lemonu kendu nyisou yo maber kendo makare.

²⁴Mak mana ni, luoruru Ruoth Nyasaye, kutiyone gi adiera kod chunyu duto, kendo paruru gik madongo mosetimonu.

²⁵To kusiko kutimo richo, to obiro tiekou kaachiel gi ruodhu.”