Read luo 1 Samuel 16 Bible Online

1 Samuel 16 - luo bible

1 Samuel 16

¹Ruoth Nyasaye nowacho ni Samuel niya, “Ibiro kuyo nyaka karang’o, to asedagi ni kik Saulo obed ruoth? Koro ol mo e tung’ni mondo aori ir Jesse ja-Bethlehem, nikech aseyiero wuode moro mondo obed ruoth.”

²Samuel nodwoke ni, “Anyalo dhi nadi? To ka Saulo owinjo to donega!” Ruoth Nyasaye nowacho niya, “Kaw roya idhigo, kendo iwach ni isebiro mondo itim misango ni Ruoth Nyasaye.

³To iluong Jesse obi e misango, eka nanyisi gima onego itim. Nyaka iwirna jal ma abiro nyisi.”

⁴Kuom mano Samuel nodhi Bethlehem kaka Ruoth Nyasaye nowachone. Jodong dala nobiro romone ka kirni, mi gipenje niya, “Ibiro gi kue koso?”

⁵Nodwokogi niya, “Ee, abiro gi kue, ni mondo atim misango ni Ruoth Nyasaye. Pwodhreuru mondo wadhi kar misango.” To Jesse gi yawuote, Samwel owuon ema nopwodho, moluongogi e misango.

⁶Kane gichopo, Samuel noneno Eliab, moparo ni, “Adier, ng’at ma Ruoth Nyasaye oyiero eri ochung’ e nyime.”

⁷To Ruoth Nyasaye nowacho ni Samuel niya, “Kik ing’i wang’e kata borne, nikech asedage. Ruoth Nyasaye ok ng’ichi kaka dhano ng’icho. Dhano ng’iyo ringruok, to Ruoth Nyasaye ng’iyo chuny.”

⁸Eka Jesse noluongo Abinadab, momiye okadho e nyim Samwel. To Samuel nowacho niya, “Ruoth Nyasaye ok oyiero jali bende.”

⁹Eka Jesse nomiyo Shama okadho, to Samuel nowacho niya, “Ruoth Nyasaye ok oyiero kata mana jali.”

¹⁰Kamano Jesse nomiyo yawuote abiriyo okadho e nyim Samuel, to Samuel nowacho ni, “Ruoth Nyasaye ok oyiero moro kuom jogi.”

¹¹Eka nopenjo Jesse niya, “Magi e kar romb yawuoti duto koso?” Nodwoke ni, “Ooyo, pod odong’ machogo. En to okwayo rombe.” Samuel nowacho ni Jesse niya, “Or ng’ato oluonge, nikech ok wanyal bet piny kapok obiro.”

¹²Mi nooro ng’ato mokele e nyimgi. Ne en wuowi ma silwal, kendo man gi chia. Eka Ruoth Nyasaye nowacho ni Samuel niya, “Chungi, iwire gi mo, nikech jali e en.”

¹³Omiyo Samuel nokawo mo, mowirogo Daudi e nyim owetene, mi Roho mar Nyasaye nobiro kuom Daudi gi teko, mobedo kode chakre chieng’no. Beng’e Samuel nowuok, modok Rama.

¹⁴To Roho mar Ruoth Nyasaye noseweyo Saulo, kendo muya marach moa kuom Ruoth Nyasaye ne chande.

¹⁵Jatich Saulo nokone niya, “Ruoth, ineno kaka muya marach moa kuom Nyasaye chandi.

¹⁶Dak ior jotichni odhi odwarni ng’at mong’eyo goyo thum, mondo ogo thum e kinde ma muya marachno chandie, eka iyud kue?”

¹⁷Omiyo Saulo nowacho ni jotichne niya, “Ara dwarnauru jagocho molony.”

¹⁸Eka achiel kuom jotichne nodwoke niya, “Ang’eyo wuowi moro ma wuod Jesse ja-Bethlehem, molony e goyo thum. En ng’at ma jachir, kendo ma ratego e lweny. Ong’eyo wuoyo, kendo en jaber. Ruoth Nyasaye bende ni kode.”

¹⁹Kuom mano, Saulo nooro joote ir Jesse, kowacho niya, “Orna Daudi wuodi, ma jakwath rombe.”

²⁰Omiyo Jesse nokawo makati apar, gi ndede mar divai, kod nyadiel, moorogo Daudi wuode mondo oter ni Saulo.

²¹Kamano Daudi nobiro ir Saulo, mobedo jatichne. Saulo nohere ahinya, mokete jating’ne gilweny.

²²Saulo nooro ni Jesse wach niya, “Yie iwe Daudi otina, nikech en jatich maber.”

²³Omiyo kinde mane muya marach moa kuom Nyasaye chandoe Saulo, to Daudi ne goyo thum. Kamano chuny Saulo ne oduogo, moyud kue, kendo muya marach ne weye.