Read luo 1 Samuel 19 Bible Online

1 Samuel 19 - luo bible

1 Samuel 19

¹Saulo nowuoyo gi Jonathan wuode, kendo gi joge duto, ni mondo gineg Daudi.

²To Jonathan nohero Daudi ahinya. Omiyo nonyiso Daudi wach niya, “Saulo wuora dwaro negi. Emomiyo tang’, mondo kiny ipond gokinyi kama ogeng’ore.

³An to kiny nawuog machung’ but wuora e pap kama intie, kendo nawuo kode kuomi. Ka awinjo wach moro, to nanyisi.”

⁴Jonathan nowuoyo maber gi Saulo wuon mare kuom Daudi, kowachone niya, “Ruoth, kik itim marach ni Daudi jatichni, nikech pok otimoni gimoro marach, to osekonyi ahinya.

⁵Noyie tho konego ja-Filistia cha, mi Ruoth Nyasaye nokelo konyruok maduong’ ni jo-Israel duto. Nineno mano, kendo nimor. Marang’o koro idwaro timo marach ni Daudi maonge ketho, kinege kayiem nono?”

⁶Saulo nowinjo wach Jonathan, mi nokuong’ore gi nying Ruoth Nyasaye ni ok noneg Daudi.

⁷Bang’e Jonathan noluongo Daudi monyiso wachno. Eka nokele ir Saulo, mi Daudi notiyone kaka chon.

⁸Lweny nochako owuok, mi Daudi nodhi kedo gi jo-Filistia, moloyogi chuth, nyaka ne giringo.

⁹Chieng’ moro kane Saulo obet e ode gi tong’ e lwete, to Daudi goyo thum, muya marach moa kuom Ruoth Nyasaye nobiro kuome,

¹⁰mi notemo chwowo Daudi gi tong, mondo oriw gi kor ot, to Daudi noleng’o, mi tong’ ochwowo mana kor ot. Eka Daudi nopusore motony.

¹¹ Gotienono Saulo nooro joote mondo orit od Daudi, nikech nodwaro nege gokinyi. To Mikal chi Daudi nonyise wach niya, “Ka ok ipondo gotienoni, to kiny nonegi.”

¹²Omiyo noloro Daudi piny gie dirisa, mi Daudi noringo motony.

¹³Bang’e Mikal nokawo kido mar nyasaye manono, moketo e kitanda, kendo noketone raten molos gi yie diek yo ka wiye, moumo duto gi nanga.

¹⁴Kane Saulo ooro joote mondo omak Daudi, Mikal nowachonigi ni otuo.

¹⁵Jootego noduoko ni Saulo wach, to noorogi kendo, mondo gidog gine Daudi kendgi giwegi. Nomedo wachonigi niya, “Keleuru gi kitanda, mondo anege.”

¹⁶To kane jootego odonjo, ne ginwang’o mana kido mar nyasaye manono e kitanda, kod raten molos gi yie diek yo ka wiye.

¹⁷Saulo nopenjo Mikal niya, “Marang’o iwuonda kamano, miweyo jasika odhi, motony?” To Mikal nodwoke niya, “Nokona ni mondo aweye odhi, nono to onega.”

¹⁸Kamano Daudi noringo, motony. Nodhi Rama ir Samuel monyise gik moko duto mane Saulo osetimone. Eka ne gidhi gi Samuel, mi gidak Nayoth.

¹⁹Nonyis Saulo wach ni Daudi ni kuno,

²⁰mi nooro joote mondo omake. To kane jootego oneno oganda jonabi ka dhumore, kod Samuel kochung’ ka jatendgi, Much Nyasaye nobiro kuomgi, mi gin bende ne gidhumore.

²¹Kane onyis Saulo wachno, nochako ooro joote moko, to gin bende ne gidhumore. Eka Saulo nooro joote kendo mar adek, mi kata jogo bende nodhumore.

²²Bang’e nodhi Rama en owuon, to kane ochopo e soko maduong’ man Seku, nopenjo kuma Samuel gi Daudi odakie, mi ng’at moro nodwoke ni gin Nayoth e Rama.

²³Kane oyudo odhi kuno, Much Nyasaye nobiro kuome en bende kendo nodhumore kowuotho nyaka nochopo Nayoth.

²⁴ En bende nolonyo lepe, kendo nodhumore e nyim Samuel mi noriere duk odiechieng’no gotienono duto. Emomiyo wachno olokore ngero ni, “Kara Saulo bende en achiel kuom jonabi.”