Read luo 1 Samuel 2 Bible Online

1 Samuel 2 - luo bible

1 Samuel 2

¹ Hana nolamo Ruoth Nyasaye, kowacho niya, “Chunya il gi Ruoth Nyasaye, nimar osemedo tekona. Achayo wasika, kendo amor nikech oseresa.

²Onge nyasaye moro maler machal gi Ruoth Nyasaye, nikech onge moro, to mana en kende. Bende onge lwanda moro, machal gi Nyasachwa

³Weuru sungruok mukwarorugo, kendo ng’ayi kik wuog e dhou, nikech Ruoth Nyasaye en Nyasaye mong’eyo gik moko duto, kendo en ema opimo timbe dhano.

⁴“Tunge mag joma rateke otur, to joma yomyom manore gi teko.

⁵Joma ne yieng’ koro tiyo ni jomoko mondo oyud chiemo, to joma ne denyo koro yieng’. Dhako ma migumba onywolo nyithindo abiriyo, to en ma nyithinde ng’eny odong’ nono.

⁶“Ruoth Nyasaye ema nego, kendo en ema ochiero. Oloro nyaka ei liel, bende ogolo oko.

⁷Ruoth Nyasaye kelo dhier, kendo okelo mwandu. Odwoko piny, bende oting’o malo.

⁸Ogolo jachan e buru, kendo oting’o ng’ama odhier a e pidh yugi, mondo omiye bedo e kom moyiedhi kaachiel gi ruodhi. Mise mar piny en mar Ruoth Nyasaye, kendo orenjo piny kuome.

⁹Orito tiend joge ni kik chwanyre, to joricho lal e mudho, nikech teko ng’ato owuon ok nyal miye loch.

¹⁰Joma piem gi Ruoth Nyasaye notur matindotindo, komiyo polo mor kuomgi. Ruoth Nyasaye ng’ado bura e tung’ piny gi tung’ piny. Enomi ruoth moyiero duong’, kendo nomede teko.”

¹¹Bang’ mano nodok Rama, to nyathi nodong’, katiyo ni Ruoth Nyasaye e nyim Eli jadolo.

¹²To yawuot Eli ne joma acheje, ma ok dew Ruoth Nyasaye.

¹³E ndalogo gima jodolo ne timo ni jolemo ne chalo kama: kane ng’at moro timo misango, jatich jadolo ne biro gi uma ma lekene adek ka pod itedo ring’o.

¹⁴Nonyumo umano e gima itedoe, kaka agulu, kata kabange, kata nyalaro. Ring’o duto mane lak uma omako ema ne jadolo kawo. Kamano e kaka ne gitimo ni jo-Israel duto ma nobiro Shilo.

¹⁵To bende kane pok owang’ bor e kendo-mar-misango, jatich jadolo ne biro kawacho ni ng’at matimo misango niya, “Chiw ring’o mondo obul ni jadolo, nikech ok odwar ring’o motedi, to odwaro mana manumu.”

¹⁶To kapo ni ng’atno odwoke niya, “We mondo okwong owang’ bor, eka ikaw gima ihero,” to jatich ne wacho ni, “Ngang’! Miyago mana sani. To ka ok itimo kamano, to abiro kawo gi thwon.”

¹⁷Ketho mag yawuowigo ne dongo ahinya e nyim Ruoth Nyasaye, nikech ne gichayo gima ochiw ni Ruoth Nyasaye.

¹⁸Samuel ne tiyo e nyim Ruoth Nyasaye ka pod en nyathi, korwakore gi nanga mar katana.

¹⁹Higa ka higa, min mare ne twang’one law matin, kendo kelone, kobiro gi chwore mondo otim misango mar higa.

²⁰Eli ne guedho Elkana gi chiege, kowacho niya, “Ruoth Nyasaye mondo omiyi nyithindo gi dhani kar mano misechiwone.” Kane oseguedhogi kamano, ne gidok thurgi.

²¹Ruoth Nyasaye noparo Hana, mi nonywolo yawuowi adek gi nyiri ariyo. To nyathi ma Samuel nodongo e nyim Ruoth Nyasaye.

²²Eli koro noti ahinya. Nowinjo gik mane yawuote timo ni jo-Israel duto, kendo kaka ne giterore gi mon matiyo e dho Hemb Romo.

²³Omiyo nowachonigi niya, “Mar ang’o utimo gik ma kamagi? Asewinjo wach timbeu maricho e dho ji duto.

²⁴Ooyo yawuota, wach masewinjo ka jo-Ruoth Nyasaye wacho kuomu ok en wach maber.

²⁵Ka ng’ato oketho ni wadgi, Nyasaye nobedne jathek, to ka ng’ato oketho ni Ruoth Nyasaye to ere ng’ama nokonye?” To ne gidagi winjo dwond wuon-gi, nimar Ruothn Nyasaye noseng’ado ni mondo githo.

²⁶ To nyathi ma Samuel nodongo, kendo Ruoth Nyasaye gi ji nomedo bedo mamor kode.

²⁷Ng’at Nyasaye moro nobiro ir Eli, monyise niya, “Ruoth Nyasaye owacho kama: ‘Nafwenyora ni kwaru kane en gi joode Misri e tuech e od Farao.

²⁸ Ne ayiere kuom dhout Israel duto mondo obed jadolona, kendo odhi e kendona-mar-misango, otim misengni, kendo orwakre gi law dolo miluongo ni efod e nyima. Namiyo dhoodu misengni duto miwang’o ma jo-Isarel chiwo.

²⁹Ang’o momiyo koro uchayo misengni maga gi mich masechiko? Imiyo yawuoti duong’ moloyo an awuon, kiweyo gichamo lemo mabeyo mag mich ma joga Israel kelo, mi gidoko machwe.

³⁰Nasingora ni dhoodu ni ginitina nyaka chieng’. To koro awacho ni ok nobed kamano ngang’, nimar joma miya duong’ ema nami duong’, to jogo mochaya, ok nokwan ka gimoro.

³¹Ndalo biro ma anang’adie tekoni oko gi teko mar dhoodu bende, nyaka chieng’.

³²Eka e chandruokni inine mwandu duto ma Nyasaye omiyo jo-Isarel, kendo inigombi, to onge ng’at ma noru e dhoodi nyaka chieng’.

³³Anatiek jogi duto matiyo e kendona-mar-misango, mak mana ja-dhoodi achiel ema nodong’, kaywak, kendo ka chunye chandore. To thoth jogi nonegi.

³⁴ Gima notimre ni yawuoti ariyo, ma Hofni gi Finehas, nobedni ranyisi. Ginitho giduto chieng’ achiel.

³⁵Mi anaket jadolona awuon, ng’at ma jaadiera, ma notim duto manie chunya gi parona. Anagur dhoode mondo nyikwaye oti nyaka chieng’ ni Ruoth mayiero mowir.

³⁶Jo-dhoodi duto ma nodong’ ka ngima nobi ire, kakwaye fedha matin, kata kuon matin. Giniwach niya, “Asayi, keta e tich kama jadolo moro tiyoe, mondo ayudie gima dacham.” ’ ”